ବଡ଼ମ୍ବା: ମାଣିଆବନ୍ଧ ବୌଦ୍ଧ ସଂଘ, ଜିଲା ପ୍ରଶାସନ ତଥା ରାଜ୍ୟ ସଂସ୍କୃତି ବିଭାଗର ମିଳିତ ସହଯୋଗରେ ବଡ଼ମ୍ବା ବ୍ଲକ ଅନ୍ତର୍ଗତ ମାଣିଆବନ୍ଧ ବୁଦ୍ଧ ବିହାର ପରିସରରେ ଦଶମ ବୁଦ୍ଧ ମହୋତ୍ସବ ଉଦଘାଟିତ ହୋଇଯାଇଛି। ଯୁଦ୍ଧ, ହିଂସା, ଆତଙ୍କବାଦର ପନ୍ଥା ପରିତ୍ୟାଗ କରିବାସହ ଜୀବଜଗତକୁ ଏ ଧରାପୃଷ୍ଠରେ ତିଷ୍ଠି ରହିବାକୁ ହେଲେ ପରମ କାରୁଣିକ ବୁଦ୍ଧଦେବଙ୍କ ଅହିଂସା ବାଣୀ ଆଜିର ଦିନରେ ମାନବ ସମାଜ ଲାଗି ଏକ ଆହ୍ୱାନ ବୋଲି ଉତ୍ସବରେ ଯୋଗଦେଇଥିବା ଅତିଥିମାନେ ପ୍ରକାଶ କରିଛନ୍ତି। କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ ଯୋଗଦେଇଥିଲେ ବିଧାୟକ ଦେବୀପ୍ରସାଦ ମିଶ୍ର ମହୋତ୍ସବକୁ ଉଦଘାଟନ କରିଥିଲେ। ବୁଦ୍ଧ ସଂଘର ସଭାପତି ଅରକ୍ଷିତ ଦେବତାଙ୍କ ପୌରୋହିତ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଆଠଗଡ଼ ଉପଜିଲାପାଳ ହେମନ୍ତକୁମାର ସ୍ୱାଇଁ,ବଡ଼ମ୍ବା ତହସିଲଦାର ତପନକୁମାର ପରିଡ଼ା,ବ୍ଲକ ଅଧ୍ୟକ୍ଷ ରଘୁପତି ମହାନ୍ତି, ଉପାଧ୍ୟକ୍ଷା ସ୍ୱର୍ଣ୍ଣଲତା ବେହେରା, ସାନବାରସିଂହ ପଞ୍ଚାୟତ ସରପଞ୍ଚ ସଦାନନ୍ଦ ସ୍ୱାଇଁ, ଜିଲାପରିଷଦ ସଦସ୍ୟ ରବୀନ୍ଦ୍ରକୁମାର ସ୍ୱାଇଁ ପ୍ରମୁଖ ଯୋଗଦେଇଥିଲେ। ମହୋତ୍ସବ କମିଟିର ସଭାପତି ଚକ୍ରଧର ଦଳେଇ,ମାଣିଆବନ୍ଧର ସରପଞ୍ଚରଶ୍ମିତା ସ୍ୱାଇଁ,ନିକଟସ୍ଥ ସନ୍ତରାବାଳୀ ସରପଞ୍ଚ ମୀତା ଜେନା,ମହୁଲିଆ ସରପଞ୍ଚ ପ୍ରଭାକର ପ୍ରଧାନ, ମାଣିଆବନ୍ଧ ସମିତିସଭ୍ୟା ମନସ୍ୱିନୀ ଜେନା, ମହୁଲିଆ ସମିତିସଭ୍ୟ ମନୋଜକୁମାର ନନ୍ଦ, ସନ୍ତରାବାଳୀ ସମିତିସଭ୍ୟ ବିଭୁତି ଜେନା ପ୍ରମୁଖ ଉପସ୍ଥିତ ଥିଲେ।
ଏହି ଅବସରରେ ରାଜ୍ୟର ପ୍ରତିଷ୍ଠିତ କଣ୍ଠଶିଳ୍ପୀ ଶରତଚନ୍ଦ୍ର ବାରିକ ଓ ସାଥୀ କଳାକାର ଭଜନ ପରିବେଷଣ କରିଥିବା ବେଳେ କଟକର ଶିଳ୍ପୀକା ଏବଂ ଉଡ୍ର ଅନୁଷ୍ଠାନର କଳାକାରମାନେ ଓଡ଼ିଶୀ ତଥା ସମ୍ବଲପୁରୀ ଲୋକନୃତ୍ୟ ପରିବେଷଣ କରିଥିଲେ। ଉତ୍ସବ କମିଟିର ସମ୍ପାଦକ ଅଜିତପ୍ରସାଦ ଚୌଧୁରୀ ମହୋତ୍ସବ ସଂଯୋଜନା କରିବାସହ ପ୍ରାରମ୍ଭରେ ସମ୍ପାଦକ ବିବରଣୀ ପାଠ ଏବଂ ଶେଷରେ ଧନ୍ୟବାଦ ପ୍ରଦାନ କରିଥିଲେ। ୫ଦିନ ଧରି ଅନୁଷ୍ଠିତ ହେବାକୁଥିବା ଏହି ଉତ୍ସବ ଆସନ୍ତା ୧୮ତାରିଖରେ ସମ୍ପନ୍ନ ହେବ ବୋଲି ଆୟୋଜକଙ୍କ ସୂତ୍ରରୁ ପ୍ରକାଶ।
