ଆଠଗଡ: ପବିତ୍ର ଉତ୍କଳ ଦିବସ ଅବସରରେ ସ୍ଥାନୀୟ ମହୋତ୍ସବ ପଡିଆଠାରେ ଗଣମାଧ୍ୟମ ଏକାଦଶ ଏବଂ ପ୍ରଶାସନ ଏକାଦଶ ମଧ୍ୟରେ ଏକ ବନ୍ଧୁତ୍ୱପୂର୍ଣ୍ଣ କ୍ରିକେଟ ମ୍ୟାଚ ଅନୁଷ୍ଠିତ ହୋଇଯାଇଛି। ଗଣମାଧ୍ୟମ ଏକାଦଶ ପ୍ରଶାସନ ଏକାଦଶକୁ ୮ୱିକେଟ ବ୍ୟବଧାନରେ ପରାସ୍ତ କରି ଚମ୍ପିଆନ ହୋଇଥିଲା। ଉପଜିଲ୍ଲାପାଳ ହେମନ୍ତ କୁମାର ସ୍ୱାଇଁ ଏହି ବନ୍ଧୁତ୍ୱପୂର୍ଣ୍ଣ ମ୍ୟାଚକୁ ଉଦ୍ଘାଟନ କରିଥିବାବେଳେ ତହସିଲଦାର ପ୍ରିୟବ୍ରତ ଦାସ ପ୍ରଶାସନ ଏକାଦଶର ଅଧିନାୟକ ଦାୟିତ୍ୱ ତୁଲାଇଥିଲେ। ପ୍ରଥମେ ବ୍ୟାଟିଂ କରିଥିବା ପ୍ରଶାସନ ଏକାଦଶ ୧୫ ଓଭର ବିଶିଷ୍ଟ ମ୍ୟାଚରେ ୧୦.୨ ଓଭର ମଧ୍ୟରେ ସମସ୍ତ ୱିକେଟ ହରାଇ ୯୭ରନ୍ ସଂଗ୍ରହ କରିଥିଲେ। ଗଣମାଧ୍ୟମ ଏକାଦଶର ଅଫସ୍ପିନର ବିରୁପାକ୍ଷ ପ୍ରଧାନଙ୍କ ଘାତକ ବୋଲିଂରେ ପ୍ରଶାସନ ଏକାଦଶର ମୂଲ୍ୟବାନ ୩ଟି ୱିକେଟ ପଡିବା ପରେ ସେମାନଙ୍କର ବ୍ୟାଟିଂ ବିପର୍ଯ୍ୟୟ ସୃଷ୍ଟି ହୋଇଥିଲା। ଗଣମାଧ୍ୟମ ଏକାଦଶ ୯୮ରନ ବିଜୟଲକ୍ଷ୍ୟର ପିଛାକରି ମାତ୍ର ୮.୨ ଓଭରରେ ୨ଟି ୱିକେଟ ହରାଇ ଆବଶ୍ୟକୀୟ ରନ୍ ସଂଗ୍ରହ କରି ସହଜ ବିଜୟ ହାସଲ କରିଥିଲେ। ସନ୍ଧ୍ୟାରେ ସେହି ମହୋତ୍ସବ ପଡିଆରେ ଆୟୋଜିତ ଉତ୍କଳ ଦିବସ ସମାରୋହରେ ଚମ୍ପିଆନ ଗଣମାଧ୍ୟମ ଏକାଦଶ ଏବଂ ରନର୍ସଅପ ପ୍ରଶାସନ ଏକାଦଶକୁ ମୁଖ୍ୟ ଅତିଥି ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଟ୍ରଫି ପ୍ରଦାନ କରିଥିଲେ। ପ୍ରିୟରଞ୍ଜନ ଗୋଚ୍ଛାୟତ ଓ ଶଶାଙ୍କ ଶେଖର ବାରିକ ମ୍ୟାଚ ପରିଚାଳନା କରିଥିଲେ।
Comments are closed.