ବିଶ୍ୱରେ ୨୦.୭୧ ଲକ୍ଷ ନୂଆ ସଂକ୍ରମିତ ; ଅଷ୍ଟ୍ରେଲିଆରେ ରେକର୍ଡ ସଂଖ୍ୟକ ଓମିକ୍ରନ ଆକ୍ରାନ୍ତ

ଟୋକିଓ : ବିଶ୍ୱରେ ଗୋଟିଏ ଦିନରେ ୨୦.୭୧ ଲକ୍ଷ ନୂତନ କରୋନା ସଂକ୍ରମିତ ଚିହ୍ନଟ ହୋଇଥିବାବେଳେ ୫,୨୮୬ ଜଣଙ୍କର ମୃତ୍ୟୁ ହୋଇଛି। ନୂଆ ଆକ୍ରାନ୍ତଙ୍କ ସହ ଆମେରିକାରେ ୩.୮୯ ଲକ୍ଷ ସଂକ୍ରମିତଙ୍କ ସହ ଶୀର୍ଷରେ ରହିଛି। ଏହି ସମୟରେ, ମଙ୍ଗଳବାର ଦିନ ଅଷ୍ଟ୍ରେଲିଆ ପାଇଁ ମହାମାରୀର ସବୁଠାରୁ ମାରାତ୍ମକ ଦିନ। ଦ୍ରୁତ ଗତିରେ ବୃଦ୍ଧି ପାଉଥିବା ଓମିକ୍ରନ୍ ସଂକ୍ରମଣ ଫଳରେ ହସ୍ପିଟାଲରେ ଆକ୍ରାନ୍ତଙ୍କ ସହ ରେକର୍ଡ ସୃଷ୍ଟି କରିଛି। ଦେଶର ଡାକ୍ତରଖାନାଗୁଡ଼ିକରେ କେବଳ ୧୨ ପ୍ରତିଶତ ଶଯ୍ୟା ଏବେ ଉପଲବ୍ଧ ରହିଛି।
ଅଷ୍ଟ୍ରେଲିଆରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ବର୍ତ୍ତମାନ ଶୀର୍ଷରେ ରହିଛି ଏବଂ ମଙ୍ଗଳବାର ୭୩,୦୦୦ ନୂତନ ସଂକ୍ରମଣ ରେକର୍ଡ କରାଯାଇଛି । ବେସରକାରୀ ଡାକ୍ତରଖାନାଗୁଡ଼ିକରେ ୫୭,୦୦୦ ନର୍ସ ଏବଂ ୧୦୦,୦୦୦ ରୁ ଅଧିକ କର୍ମଚାରୀଙ୍କୁ ଓମିକ୍ରନ୍ ପ୍ରଭାବିତ ଅଞ୍ଚଳରେ ପଠାଇବା ପାଇଁ ସ୍ୱାସ୍ଥ୍ୟମନ୍ତ୍ରୀ ଗ୍ରେଗ ହଣ୍ଟ ଏକ ଯୋଜନା ପ୍ରସ୍ତୁତ କରିଛନ୍ତି। ଏହି ଯୋଜନା ଅଧୀନରେ ସ୍ୱାସ୍ଥ୍ୟ କର୍ମଚାରୀଙ୍କ ଛୁଟି ମଧ୍ୟ ବାତିଲ କରାଯାଇଛି।
ଦେଶର ଦ୍ୱିତୀୟ ବୃହତ୍ତମ ରାଜ୍ୟ ଡାକ୍ତରଖାନାରେ ସ୍ୱାସ୍ଥ୍ୟମନ୍ତ୍ରୀ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି। ଏହି ଡାକ୍ତରଖାନାଗୁଡ଼ିକରେ ରୋଗୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଏହାସହ କର୍ମଚାରୀଙ୍କ ସଂଖ୍ୟା ମଧ୍ୟ କମ ଥିବା ଦେଖାଯାଇଛି। ଗୋଟିଏ ଦିନରେ ତିନୋଟି ଜନବହୁଳ ରାଜ୍ୟରେ ୭୪ ସଂକ୍ରମିତ ଙ୍କର ମୃତ୍ୟୁ ହୋଇଥିଲା। ନ୍ୟୁ ସାଉଥ ୱେଲ୍ସରେ ୩୬ ଜଣ, ଭିକ୍ଟୋରିଆରେ ୨୨ ଏବଂ କ୍ୱିନ୍ସଲାଣ୍ଡରେ ୧୬ ଜଣଙ୍କର ମୃତ୍ୟୁ ହୋଇଥିଲା। ନ୍ୟୁ ସାଉଥ ୱେଲ୍ସରେ ସଂକ୍ରମଣ ହାର ଶିଖରରେ ରହିଛି। ଭିକ୍ଟୋରିଆର ରାଜଧାନୀ ମେଲବୋର୍ଣ୍ଣର ଡାକ୍ତରଖାନାଗୁଡ଼ିକରେ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଛି।
କରୋନାର ଓମିକ୍ରନ୍ ପ୍ରକରଣକୁ ଦୃଷ୍ଟିରେ ରଖି ରାଜଧାନୀ ଟୋକିଓ ଏବଂ ଅନ୍ୟାନ୍ୟ କ୍ଷେତ୍ରରେ ସାମାଜିକ ପ୍ରତିବନ୍ଧକ ଲଗାଇବାକୁ ଜାପାନ ସରକାର ପ୍ରସ୍ତୁତ ହେଉଛନ୍ତି। ମହାମାରୀ ହେତୁ ଜାପାନ ଏପର୍ୟ୍ୟନ୍ତ ତାଲାବନ୍ଦ କରାଯାଇ ନାହିଁ। ମାତ୍ର ରେସ୍ତେରାଁ ଓ ବାର ଗୁଡିକ ସମୟ ପୂର୍ବରୁ ବନ୍ଦ କରିବା ପାଇଁ ଧ୍ୟାନ ଦିଆଯାଉଛି। କୋଭିଡ -୧୯ ମାମଲାରେ ବୃଦ୍ଧି ସତ୍ତେ୍ୱ ଦେଶର ଅନେକ ସ୍ଥାନରେ ଭିଡ଼ ଦେଖାଯାଉଛି। ଏହାସହ ବହୁ ସଂଖ୍ୟାରେ ଲୋକ ଦୋକାନ ଏବଂ କାର୍ଯ୍ୟକ୍ରମରେ ଏକାଠି ହେଉଛନ୍ତି ।