ପ୍ରତାରଣା ଅଭିଯୋଗରେ ପ୍ରେମିକ ଗିରଫ

ପିପିଲି : ପିପିଲି ଥାନା ଅଞ୍ଚଳର ଜଣେ ୨୧ ବର୍ଷିୟା ଯୁବତୀଙ୍କ ସହ ପ୍ରେମ ସଂପର୍କ ସ୍ଥାପନ କରିବା ପରେ ବିବାହର ପ୍ରତିଶୃତି ଦେଇ ତାଙ୍କ ସହ ଶାରିରୀକ ସଂପର୍କ ରଖି ବ୍ଳାକ୍‍ମେଲିଂ କରିବା ଅଭିଯୋଗରେ ପିପିଲି ପୁଲିସ ଆଜି ଗଞ୍ଜାମ ଜିଲା ଆସ୍କା ଥାନା ଅନ୍ତର୍ଗତ ନବରତ୍ନପୁର ଗ୍ରାମର ଅଭିଯୁକ୍ତ ଆକାଶ ପ୍ରଧାନ(୨୬)କୁ ଗିରଫ କରି କୋର୍ଟ ଚାଲାଣ କରିଛି । ଜାମିନ ଆବେଦନ ଖାରଜ ହୋଇଯିବାରୁ ଅଭିଯୁକ୍ତକୁ ନିମାପଡା ସ୍ଥିତ ବିଚାର ବିଭାଗୀୟ ଜେଲ ହାଜତକୁ ପଠାଇ ଦିଆଯାଇଛି।
ଅଭିଯୋଗ ଅନୁଯାୟୀ, ସାମାଜିକ ଗଣମାଧ୍ୟମ ଦ୍ୱାରା ପିପିଲି ଥାନା ଅଞ୍ଚଳର ଏହି ୨୧ ବର୍ଷିୟା ଯୁବତୀଙ୍କ ସହ ଅଭିଯୁକ୍ତର ପ୍ରେମ ସଂପର୍କରେ ଗଢି ଉଠିଥିଲା। ଗତ ୨୦୨୦ ମସିହା ନଭେମ୍ବର ୧୫ ତାରିଖରେ ବ୍ରହ୍ମପୁର ଅଞ୍ଚଳର ଏକ ହୋଟେଲ୍‍ ମଧ୍ୟରେ ଯୁବତୀକୁ ନିଶା ଔଷଧ ଦେଇ ଅଭିଯୁକ୍ତ ଆକାଶ ତାଙ୍କ ସହିତ ଶାରିରୀକ ସଂପର୍କ ରଖିଥିଲା। ପରେ ଯୁବତୀଙ୍କୁ ବ୍ଲାକମେଲିଂ କରି ଅଭିଯୁକ୍ତ ତାଙ୍କ ଠାରୁ ୭୦ ହଜାର ଟଙ୍କା ନେଇଥିଲା । ଯୁବତୀ ଜଣକ ଟଙ୍କା ଫେରସ୍ତ ମାଗିବାରୁ ଅଭିଯୁକ୍ତ ଉକ୍ତ ଯୁବତୀଙ୍କ ଅଶ୍ଳିଳ ଫଟୋକୁ ସାମାଜିକ ଗଣମାଧ୍ୟମରେ ଭାଇରାଲ କରିଥିଲା। ବିବାହ କରିବାକୁ ପ୍ରତିଶୃତି ଦେଇ ଅଭିଯୁକ୍ତ ତାଙ୍କୁ ପ୍ରତାରଣା କରିଥିବା ନେଇ ଯୁବତୀ ଜଣକ ଗତ ଅଗଷ୍ଟ ମାସ ୩୦ ତାରିଖରେ ପିପିଲି ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ପିପିଲି ଥାନାରେ ଏକ ମାମଲା ରୁଜୁ ହୋଇଥିବା ବେଳେ ଅଭିଯୁକ୍ତ ଆକାଶ ଫେରାର ରହିଥିଲା । ଆଇଆଇସି ଅଭିମନ୍ୟୁ ନାୟକ ମାମଲାର ତଦନ୍ତ କରିବା ସହ ଆକାଶକୁ ଗତକାଲି ଗିରଫ କରିଥିବା ବେଳେ ଆଜି କୋର୍ଟ ଚାଲାଣ କରିଥିବା ସୂଚନା ମିଳିଛି ।