ଧାନବାଦ: କୋଇଲା ମୁଖ୍ୟତଃ ତାପଜ ଶକ୍ତି ପ୍ରକଳ୍ପ ଏବଂ ଇସ୍ପାତ କାରଖାନାଗୁଡିକରେ ବ୍ୟବହାର କରାଯାଉଥିବାବେଳେ ପରିବେଶ ପ୍ରଦୂଷଣ ପାଇଁ ଏହା ମୁଖ୍ୟତଃ ଦାୟୀ ବୋଲି କୁହାଯାଉଛି । ସେଥିପାଇଁ ଅଧିକାଂଶ ରାଷ୍ଟ୍ରରେ କୋଇଲା ଚାଳିତ ଶକ୍ତି ପ୍ରକଳ୍ପଗୁଡିକୁ ବନ୍ଦ କରିବାକୁ ଚାପ ପଡୁଥିବାବେଳେ ବୈଜ୍ଞାନିକମାନେ ସଂପ୍ରତି କୋଇଲାକୁ ନେଇ ଅଳଙ୍କାର ତିଆରି କରିବା ଏବଂ ଘର ସଜାଇବା ସାମଗ୍ରୀ ତିଆରି କରିବାର କୌଶଳ ବିକଶିତ କରିଛନ୍ତି । କୋଇଲା ବା ବ୍ଲାକ କାର୍ବନରୁ ପ୍ରସ୍ତୁତ ଏହି ଅଳଙ୍କାର ଏବଂ ସାଜସଜା ସାମଗ୍ରୀ ମୂଲ୍ୟବାନ ହୋଇଥିବାବେଳେ ସେଗୁଡିକ ହାଲୁକା ଅଥଚ ନିଦା ଓ ଦୀର୍ଘସ୍ଥାୟୀ । ସିଆଇଏମଏଫଆର-ଧାନବାଦ ପକ୍ଷରୁ ଏହି କୌଶଳ ବିକଶିତ କରାଯାଇଥିବା ଜଣାଯାଇଛି । ଖୁବଶୀଘ୍ର କୋଇଲାରୁ ପ୍ରସ୍ତୁତ ଏଭଳି ସାମଗ୍ରୀ ସିଆଇଏମଏଫଆର ଇ ପୋର୍ଟାଲ ଗ୍ରାମୀଣ ବଜାରରେ ଉପଲବ୍ଧ ହେବ ।
ଜଣାଯାଇଛି ଯେ ଧାନବାଦସ୍ଥିତ ସେଣ୍ଟ୍ରାଲ ଇନଷ୍ଟିଚ୍ୟୁଟ ଅଫ ମାଇନିଂ ଆଣ୍ଡ ଫୁଏଲ ରିସର୍ଚ୍ଚ (ସିଆଇଏମଏଫଆର) ପକ୍ଷରୁ କୋଇଲାକୁ ନେଇ ଦୀର୍ଘଦିନ ଧରି ଗବେଷଣା ଚାଲିଥିଲା । ଏବେ ଏଥିରୁ ହାର, କାନ ରିଂ ଏବଂ ଅନ୍ୟାନ୍ୟ ଅଳଙ୍କାର ସହିତ ସାଜସଜା ସାମଗ୍ରୀ ମଧ୍ୟ ତିଆରି କରାଯାଇପାରୁଛି । ସିଆଇଏମଏଫଆର ନିର୍ଦ୍ଦେଶକ ଡଃ.ପ୍ରଦୀପ କୁମାର ସିଂ କହିଛନ୍ତି, କୋଇଲାର ବର୍ଜ୍ୟ ଅଂଶକୁ ବ୍ୟବହାର କରାଯାଇ ଏହିସବୁ ସାମଗ୍ରୀ ପ୍ରସ୍ତୁତ କରାଯାଉଛି, ଯାହା ସ୍ଥାନୀୟ ସମ୍ପଦକୁ ମୂଲ୍ୟଯୁକ୍ତ କରୁଛି । ସୂଚନାଯୋଗ୍ୟ ଯେ ଧାନବାଦ ଅଞ୍ଚଳରେ କୋଇଲା ପର୍ଯ୍ୟାପ୍ତ ପରିମାଣରେ ଉପଲବ୍ଧ ହେଉଛି । ବୈଜ୍ଞାନିକଙ୍କ କହିବା ଅନୁଯାୟୀ ଅଳଙ୍କାର ତିଆରି କରାଯିବା ପରେ ୧ ଗ୍ରାମ କୋଇଲା ମୂଲ୍ୟ ୫୦୦ ଟଙ୍କା ହେବ ଏବଂ ଏହା କୋଇଲା ଖଣି ନିକଟରେ ବାସ କରୁଥିବା ପରିବାରଗୁଡିକର ମହିଳାମାନଙ୍କର ଅର୍ଥନୈତିକ ବିକାଷର ସହାୟକ ହୋଇପାରିବ ।
Comments are closed.