ଗୁଣି ଗାରେଡ଼ି ସନ୍ଦେହରେ ଭାଇ ଓ ଭାଉଜଙ୍କୁ ହତ୍ୟା

ବାରିପଦା: ଗୁଣି ଗାରେଡ଼ି କରି କ୍ଷତି ଘଟାଉଥିବା ସନ୍ଦେହରେ ନିଜ ବଡ଼ ଭାଇ ଓ ଭାଉଜଙ୍କୁ ଗଳା କାଟି ହତ୍ୟା କରିଛି ଭାଇ। ଅଭିଯୁକ୍ତ ସାନ ଭାଇ ରଥ ହେମ୍ବ୍ରମ (୪୦)କୁ ପୁଲିସ ଗିରଫ କରିଛି। ପୁଲିସ ସୂତ୍ରରୁ ପ୍ରକାଶ ଯେ ମୟୂରଭଞ୍ଜ ଜିଲା, ବାରିପଦା ବ୍ଲକର ରାଜାବସା ପଞ୍ଚାୟତ ଅନ୍ତର୍ଗତ କୁକୁଡାଯୋଡି ଗାଁର ପୂର୍ଣ୍ଣ ହେମ୍ବ୍ରମ(୬୫) ଓ ପତ୍ନୀ ସିନ୍‍ଗ(୫୫) ଗତକାଲି ରାତିରେ ଘରେ ଶୋଇଥିଲେ। ସାନ ଭାଇ ରଥ ହେମ୍ବ୍ରମ ରାତି ପ୍ରାୟ ୧୧ଟାରେ ଶୋଇଥିବା ଭାଇ ପୂର୍ଣ୍ଣକୁ ଘର ବାହାରକୁ ଡାକି ନେଇ ହତ୍ୟା କରିଥିଲା। ପରେ ଘରେ ଶୋଇଥିବା ଭାଉଜକୁ ହତ୍ୟା କରିଥିଲା। ପୁଲିସ ୨ଟି ମୃତଦେହ ଉଦ୍ଧାର କରି ବ୍ୟବଚ୍ଛେଦ କରାଇଛି। ଏ ସଂପର୍କରେ ମୃତକଙ୍କ ପୁଅ କହ୍ନେଇ ଅଭିଯୋଗକ୍ରମେ ବାରିପଦା ସଦର ଥାନାରେ ମାମଲା ରୁଜୁ ହୋଇଛି। ଭାଇ ଓ ଭାଉଜ ଉଭୟେ ଗୁଣି ଗାରେଡି କରୁଥିବା ସାନ ଭାଇ ରଥ ସନ୍ଦେହ କରୁଥିଲା।