କଟକ: କଟକ ଜିଲା ନରସିଂହପୁର ଥାନା ମାଣିଆବନ୍ଧରେ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଛି। ଏଥିରେ ଜଣେ ବ୍ୟକ୍ତିଙ୍କର ମୃତ୍ୟୁ ହୋଇଥିବା ବେଳେ ଜଣେ ଆହତ ହୋଇଥିବାର ସୂଚନା ମିଳିଛି। ଗଞ୍ଜେଇ ଚୋରାଚାଲାଣକୁ ନେଇ ଉଭୟ ଗୋଷ୍ଠୀଙ୍କ ମଧ୍ୟରେ ଦୀର୍ଘଦିନ ଧରି ବିବାଦ ଲାଗି ରହିଥିଲା।
ସୁଚନାଯୋଗ୍ୟ ଯେ, ରବିବାର ରାତିରେ ଏହାକୁ ନେଇ ବୋମାମାଡ ଓ ଠେଙ୍ଗା ଦ୍ୱାରା ପରସ୍ପରକୁ ଆକ୍ରମଣ କରିଥିଲେ। ଆକ୍ରମଣରେ ତିଗିରିଆ ଥାନା ଅନ୍ତର୍ଗତ ବିନ୍ଧାରିମା ଗ୍ରାମର ବିକାଶ ସାହୁ (୨୭)ଙ୍କର ମୃତ୍ୟୁ ହୋଇଥିବା ବେଳେ ଇନ୍ଦ୍ରମଣି ସିଠ ଆହତ ହୋଇଥିବା ଜଣା ପଡିଛି। ଆହତଙ୍କ ବାମ ହାତ, ମୁହଁ ଓ ଛାତିରେ ବୋମାମାଡ ଦ୍ୱାରା କ୍ଷତ ସୃଷ୍ଟି ହୋଇଛି। ଆହତଙ୍କୁ ଉଦ୍ଧାର କରାଯାଇ ପ୍ରଥମେ ମାଣିଆବନ୍ଧ ଡାକ୍ତରଖାନା ଓ ପରେ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଛି। ବଡମ୍ବା ପୁଲିସ ଘଟଣାସ୍ଥଳରେ ପହଞ୍ଚି ୪ଜଣଙ୍କୁ ଗିରଫ କରିବା ସହ ତଦନ୍ତ ଆରମ୍ଭ କରିଛି।
