୪ ଦିନିଆ ଲଦାଖ ଓ ଜମ୍ମୁକାଶ୍ମୀର ଗସ୍ତରେ ଯାଇ ଆଜି ରାଷ୍ଟ୍ରପତି ରାମ ନାଥ କୋବିନ୍ଦ ଗ୍ରୀଷ୍ମ ରାଜଧାନୀ ଶ୍ରୀନଗରରେ ପହଞ୍ଚିଛନ୍ତି। ସୂଚନା ଅନୁଯାୟୀ, ରାଷ୍ଟ୍ରପତି କୋବିନ୍ଦ ଶ୍ରୀନଗରର ବୈଷୟିକ ବିମାନବନ୍ଦରରେ ପୂର୍ବାହ୍ନ ୧୧.୧୫ ମିନିଟରେ ପହଞ୍ଚିଥିଲେ। ରାଷ୍ଟ୍ରପତିଙ୍କୁ ଜମ୍ମୁକାଶ୍ମୀର ଉପରାଜ୍ୟପାଳ ମନୋଜ ସିହ୍ନା, ବରିଷ୍ଠ ପୁଲିସ ଅଧିକାରୀ ଓ ପ୍ରଶାସନିକ ଅଧିକାରୀମାନେ ପାଛୋଟି ନେଇଥିଲେ।
ରାଷ୍ଟ୍ରପତି ଭାବେ ଆଜି ଚାରି ବର୍ଷ ପୂରଣ କରିଥିବା ଶ୍ରୀ କୋବିନ୍ଦଙ୍କୁ ଗାର୍ଡ ଅଫ୍ ଅନର ପ୍ରଦାନ କରାଯାଇଛି। ଏହି ସମୟରେ, କାଶ୍ମୀର ଉପତ୍ୟକାରେ ବହୁ ସ୍ତରୀୟ ସୁରକ୍ଷା ବ୍ୟବସ୍ଥା ସହ ବିଭିନ୍ନ ସଭାସ୍ଥଳଗୁଡିକରେ ସୁରକ୍ଷା ବ୍ୟବସ୍ତା କଡାକଡି କରାଯାଇଛି। ରାଜଭବନକୁ ଯାଉଥିବା ରାସ୍ତା, ଯେଉଁଠାରେ ଶ୍ରୀ କୋବିନ୍ଦ ରହିବେ – ବିଶ୍ୱ ପ୍ରସିଦ୍ଧ ଡାଲ ହ୍ରଦ ଏବଂ ଗୁପକର ରାସ୍ତା ସାଧାରଣ ଲୋକଙ୍କ ପାଇଁ ବନ୍ଦ କରାଯାଇଛି। ପୂର୍ବରୁ ଟ୍ରାଫିକ ପୋଲିସ ଏହି ରାସ୍ତାଗୁଡିକୁ ଆଜିଠାରୁ ଜୁଲାଇ ୨୭ ପର୍ଯ୍ୟନ୍ତ ବନ୍ଦ ରହିବା ବିଷୟ ଘୋଷଣା କରିସାରିଛି।
କେନ୍ଦ୍ରଶାସିତ ଅଂଚଳ ଗସ୍ତ ସମୟରେ ୧୯୯୯ରେ କାର୍ଗିଲ ବିବାଦ ସମୟରେ ଭାରତୀୟ ସଶସ୍ତ୍ର ବାହିନୀର ଅଦମ୍ୟ ସାହସ ଏବଂ ବଳିଦାନକୁ ସମ୍ମାନ ଜଣାଇ ରାଷ୍ଟ୍ରପତି ଜୁଲାଇ ୨୬ରେ ଦ୍ରାସ ଯୁଦ୍ଧ ସ୍ମାରକୀରେ ଶ୍ରଦ୍ଧାଞ୍ଜଳି ଅର୍ପଣ କରିବେ।। ୨୦୧୯ରେ ରାଷ୍ଟ୍ରପତି କାର୍ଗିଲ ଶହୀଦଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ଡ୍ରାସ ପରିଦର୍ଶନ କରିବାର କାର୍ଯ୍ୟକ୍ରମ ଥିଲା କିନ୍ତୁ ଖରାପ ପାଗ ହେତୁ ଶ୍ରୀନଗର ବିମାନ ବନ୍ଦରରୁ ବିମାନ ଉଡ଼ାଣ କରିପାରି ନଥିଲା। ଏହା ବଦଳରେ ସେ ସହରର ବାଦାମିବାଗସ୍ଥିତ ସେନାର ୧୫ କର୍ପସ ମୁଖ୍ୟାଳୟରେ ଏକ ଯୁଦ୍ଧ ସ୍ମାରକୀରେ ପୁଷ୍ପମାଲ୍ୟ ଅର୍ପଣ କରି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
ଜୁଲାଇ ୨୭ରେ ରାଷ୍ଟ୍ରପତି ଶ୍ରୀନଗରରେ କାଶ୍ମୀର ବିଶ୍ୱବିଦ୍ୟାଳୟର ୧୯ତମ ସମାବର୍ତ୍ତନ ଉତ୍ସବରେ ଉଦବୋଧନ ଦେବେ। ରାଷ୍ଟ୍ରପତିଙ୍କ ଗସ୍ତକୁ ଦୃଷ୍ଟିରେ ରଖି ଜାମ୍ମୁ କାଶ୍ମୀର ପୋଲିସ ଏହାର କର୍ମଚାରୀଙ୍କ ଛୁଟି ବାତିଲ କରିବାକୁ ନିର୍ଦ୍ଦେଶ ଦେଇଛି।
