ଗତ ୨୪ ଘଣ୍ଟାରେ ୧,୯୬,୪୨୭ କରୋନା ସଂକ୍ରମିତ; ଦିନକରେ ୩୫୧୧ ଆକ୍ରାନ୍ତଙ୍କ ମୃତ୍ୟୁ

ନୂଆଦିଲ୍ଲୀ: ଦୀର୍ଘ ଏକମାସ ମଧ୍ୟରେ ଦେଶରେ ଦୈନିକ କରୋନା ସଂକ୍ରମଣ ସଂଖ୍ୟା ୨ ଲକ୍ଷ ତଳକୁ ଖସିଛି। କଡାକଡି ତାଲାବନ୍ଦ ସହିତ ସଂକ୍ରମିତଙ୍କୁ ଚିହ୍ନଟ ଓ ନମୁନା ପରୀକ୍ଷାକୁ ବ୍ୟାପକ କରାଯିବା ତଥା ଟିକାକରଣରୁ ସୁଫଳ ମିଳୁଥିବା ଚିକିତ୍ସା ବିଶେଷଜ୍ଞମାନେ ମତ ଦେଇଛନ୍ତି। ଗତ ୨୪ ଘଣ୍ଟା ମଧ୍ୟରେ ଦେଶରେ ୧,୯୬,୪୨୭ ନୂଆ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଏଥିସହିତ ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ୨,୬୯,୪୮,୮୭୪କୁ ବୃଦ୍ଧିପାଇଛି। ଏଥିସହିତ ୨୪ ଘଣ୍ଟା ମଧ୍ୟରେ ୩୫୧୧ ଜଣ କରୋନା ଆକ୍ରାନ୍ତଙ୍କର ମୃତ୍ୟୁ ଘଟିଛି। ଏହାକୁ ମିଶାଇ ଭାରତରେ କରୋନା ଜନିତ ମୃତ୍ୟୁସଂଖ୍ୟା ୩,୦୭,୨୩୧ରେ ପହଞ୍ଚିଛି। ଇତିମଧରେ ଦେଶରେ ୨,୪୦,୫୪,୮୬୧ ଜଣ କରୋନା ସଂକ୍ରମଣରୁ ସୁସ୍ଥ ହୋଇଛନ୍ତି। ଏହାଦ୍ୱାରା ଦେଶରେ ୨୫,୮୬,୭୮୨ ଜଣ ସକ୍ରିୟ ସଂକ୍ରମିତ ରହିଥିବା ଜଣାଯାଇଛି।