କରୋନା ବିରୋଧୀ ଲଢ଼େଇରେ ମୁଖ୍ୟ ଅସ୍ତ୍ର ହେଉଛି ମାସ୍କ ଏବଂ ସାମାଜିକ ଦୂରତା। ଜନସାଧାରଣ ଏହାକୁ ପାଳନ କରିବା ଲାଗି ସରକାର ନିୟମକୁ ବାଧ୍ୟତାମୂଳକ କରିଛନ୍ତି। କିନ୍ତୁ ଏହି ଲଢ଼େଇରେ ଆଗଧାଡ଼ିର ଯୋଦ୍ଧା କୁହାଯାଉଥିବା ଜଣେ ଡାକ୍ତର ଏହାକୁ ନିର୍ବୋଧ ନିୟମ ବୋଲି କହି ଚର୍ଚ୍ଚାକୁ ଆସିଛନ୍ତି। ପୁଲିସ ତାଙ୍କ ବିରୋଧରେ ଏକ ମାମଲା ରୁଜୁ କରିଛି। ଏଭଳି ଏକ ଘଟଣା ଘଟିଛି କର୍ଣ୍ଣାଟକରେ।
ମାଙ୍ଗାଲୁରୁର ଏକ ଶପିଂ ମଲ୍କୁ ଡାକ୍ତର ଶ୍ରୀନିବାସ ଗ୍ରୋସରୀ ସାମଗ୍ରୀ କିଣିବାକୁ ଯାଇଥିଲେ। କରୋନା ସମୟରେ ମଲ୍ ପକ୍ଷରୁ ମାସ୍କ ପିନ୍ଧିବା ଏବଂ ସାମାଜିକ ଦୂରତା ପାଳନ ଲାଗି ବାଧ୍ୟତାମୂଳକ କରାଯାଇଥିବାବେଳେ ଡାକ୍ତର ଜଣକ କିନ୍ତୁ ମାସ୍କ ପିନ୍ଧି ନ ଥିଲେ। ସାମଗ୍ରୀ କିଣୁଥିବା ଅନ୍ୟ ଜଣେ ଗ୍ରାହକ ଡାକ୍ତର ଶ୍ରୀନିବାସଙ୍କୁ ମାସ୍କ ପିନ୍ଧିବାକୁ ଅନୁରୋଧ କରିଥଧିଲେ। କିନ୍ତୁ ଡାକ୍ତର ଶୁଣି ନ ଥିଲେ। ବିଲିଂ କାଉଣ୍ଟରେ ଷ୍ଟୋର ମ୍ୟାନେଜର ମଧ୍ୟ ତାଙ୍କୁ ମାସ୍କ ପିନ୍ଧିବାକୁ କହିଥିଲେ। ଏହାପରେ ଡାକ୍ତର ଶ୍ରୀନିବାସ ତାଙ୍କ ଉପରେ ହଠାତ୍ ରାଗିଯାଇ ଯୁକ୍ତିତର୍କ କରିଥିଲେ। ଏପରି କି ମାସ୍କ ପିନ୍ଧିବା ଏକ ‘ନିର୍ବୋଧ ନିୟମ’ ବୋଲି କହିଥିଲେ। ଏହାର ଭିଡିଓ ଏବେ ଭାଇରାଲ ହୋଇଛି।
ଭିଡିଓରେ ଡାକ୍ତର ଜଣକ ପୂର୍ବରୁ କରୋନାରେ ଆକ୍ରାନ୍ତ ହୋଇଥିବା ନେଇ କହୁଥିବା ମଧ୍ୟ ଶୁଣିବାକୁ ମିଳିଛି। ଏପରି କି କରୋନା କାହା ପାଇଁ ବିପଦ ନୁହେଁ ବୋଲି ସେ କହିଥିଲେ। ଏ ନେଇ ପୁଲିସକୁ ଖବର ଦିଆଯିବା ପରେ ପୁଲିସ ସମ୍ପୃକ୍ତ ଡାକ୍ତରଙ୍କ ନାଁରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
