ପାଟନା: ବିହାରର କଟିହାରରେ ଛେଳି ଚୋରି ଅଭିଯୋଗରେ ଦୁଇ ମହିଳା ଓ ୨ ଯୁବକଙ୍କୁ ନିର୍ମମ ଭାବେ ପିଟିବା ଘଟଣା ସାମ୍ନାକୁ ଆସିଛି। କେବଳ ଏତିକି ନୁହେଁ ଦୁଇ ମହିଳାଙ୍କୁ ଲଣ୍ଡା କରି ମୁଣ୍ଡରେ ଗୋବର ଲଗାଇ ଅଞ୍ଚଳରେ ବୁଲାଇବା ସହ ଦୁଇ ଯୁବକଙ୍କୁ କାନ ଧରାଇ ଉଠ୍ ବସ୍ କରାଇଛନ୍ତି ସ୍ଥାନୀୟ ଲୋକେ।
ସାମାଜିକ ଗଣମାଧ୍ୟମରେ ଏହି ଖବର ଭାଇରାଲ ହେବା ପରେ ଘଟଣା ଉପରୁ ପରଦା ଉଠିଛି। ପାଟନା ଜିଲାର କୋଢା ଥାନା ଅଧିନସ୍ଥ ଉତ୍ତର ସିମରିୟା ପଞ୍ଚାୟତର କୋଲାସୀ ଆଦିବାସୀ ଅଞ୍ଚଳରେ ଘଟିଛି ଏହି ଲଜ୍ଜାଜନକ ଘଟଣା। ପୁଲିସଠାରୁ ମିଳିଥିବା ସୂଚନା ମୁତାବକ, କୋଲାସୀ ପୁଲିସ ପୋଷ୍ଟଠାରୁ କିଛି ଦୂରରେ ଛେଳି ଚୋରି ଅଭିଯୋଗରେ ଦୁଇ ମହିଳା ଓ ଦୁଇ ଯୁବକଙ୍କୁ ଅଟକ ରଖାଯାଇଥିଲା। ଏହାପରେ ଚାରି ଜଣଙ୍କୁ ଅମାନୁଷିକ ନିର୍ଯାତନା ଦିଆଯାଇଥିଲା। ପୁଲିସକୁ ଏହି ହିଂସା ଘଟଣା ବିଷୟରେ କିଛି ଜଣାପଡ଼ି ନ ଥିଲା। ଘଟଣାର ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ୍ କରାଯାଇଥିଲା।
ପୁଲିସ ଏନେଇ ଖବର ପାଇବା ପରେ ଘଟଣାସ୍ଥଳରେ ପହଞ୍ଚି ତନାଘନା କରିଥିଲା। ଡିଏସପି ଅମରକାନ୍ତ ଝା ଘଟଣାକୁ ନିନ୍ଦା କରିବା ସହ ଏହା ଅତ୍ୟନ୍ତ ଦୁଃଖଦ ବୋଲି କହିଛନ୍ତି। ପୀଡ଼ିତମାନଙ୍କୁ ଚିକିତ୍ସା ପାଇଁ ପଠାଯାଇଛି ଏବଂ ଘଟଣାରେ ସମ୍ପୃକ୍ତ ଅଭିଯୁକ୍ତମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଏସପି କହିଛନ୍ତି।
