ପାଣାଜୀ : ଜାନୁଆରୀ ୧୬ରୁ ଆରମ୍ଭ ହୋଇଥିବା ଆନ୍ତର୍ଜାତିକ ଚଳଚ୍ଚିତ୍ର ମହୋତ୍ସବ ଭାରତ (ଆଇଏଫଏଫଆଇ)ର ୫୧ତମ ସଂସ୍କରଣ ରବିବାର ଉଦ୍ଯାପିତ ହୋଇଛି। ଶ୍ୟାମାପ୍ରସାଦ ମୁଖାର୍ଜୀ ଷ୍ଟାଡିୟମରେ ଚାଲିଥିବା ଏହି ମହୋତ୍ସବରେ ‘ଇନ ଟୁ ଦ ଡାର୍କନେସ୍’ ଶ୍ରେଷ୍ଠ ଚଳଚ୍ଚିତ୍ର ଭାବେ ଗୋଲଡେନ ପିକକ୍ ପୁରସ୍କାର ଲାଗି ମନୋନୀତ ହୋଇଛି। ସେହିପରି ଶ୍ରେଷ୍ଠ ଅଭିନେତା ଭାବେ ଜୁ ଚୌଆନ ଲିଉ ସିଲଭର ପିକକ୍ ପୁରସ୍କାର ପାଇବାକୁ ମନୋନୀତ ହୋଇଛନ୍ତି। ଲିଉଙ୍କୁ ତାଙ୍କର ଚଳଚ୍ଚିତ୍ର ଦ ସାଇଲେଣ୍ଟ ପରେଷ୍ଟର ଅଭିନୟ ପାଇଁ ଏହି ପୁରସ୍କାର ଦିଆଯାଇଛି। ସେହିପରି ଶ୍ରେଷ୍ଠ ଅଭିନେତ୍ରୀ ଭାବେ ଜୋଫିଆ ଷ୍ଟାଫିଏଜ ସିଲଭର ପିକକ୍ ପୁରସ୍କାର ପାଇବାକୁ ମନୋନୀତ ହୋଇଛନ୍ତି। ଆଇ ନେଭର କ୍ରାଏ ଚଳଚ୍ଚିତ୍ରର ଅଭିନୟ ପାଇଁ ଜୋଫିଆ ଏହି ପୁରସ୍କାର ପାଇଛନ୍ତି।
ସେହିପରି ଶ୍ରେଷ୍ଠ ନିର୍ଦେଶକ ଚେନ ନିଏନ କୋ, ଶ୍ରେଷ୍ଠ ନବାଗତ ନିର୍ଦେଶକ କାସିଓ ପେରେରା, ସ୍ପେସାଲ ମେନସନ ପୁରସ୍କାର କ୍ରିପାଲ କାଲିଟା, ସ୍ପେସାଲ ଜୁରି ପୁରସ୍କାର କାମିନା କାଲଭେ ଓ ଇଣ୍ଡିଆନ ପର୍ସନାଲିଟି ପୁରସ୍କାର ପାଇଁ ବିଶ୍ବଜିତ୍ ଚାଟାର୍ଜୀଙ୍କୁ ମନୋନୀତ କରାଯାଇଛି। ଉଦ୍ଯାପନୀ ଉତ୍ସବରେ ବିଚାରକ ମଣ୍ଡଳୀ ଅଧ୍ୟକ୍ଷ ପାବ୍ଲେ ସେସାର ପ୍ରତିଯୋଗିତାରେ ଭାଗ ନେଇଥିବା ଚଳଚ୍ଚିତ୍ରଗୁଡିକୁ ଉଚ୍ଚ ପ୍ରଶଂସା କରିଥିଲେ। ସେ କହିଛନ୍ତି ଯେ ଯେଉଁ ସବୁ ଚଳଚ୍ଚିତ୍ରକୁ ପୁରସ୍କାର ଲାଗି ମନୋନୀତ କରାଯାଇଛି ସେଗୁଡିକ ବ୍ୟକ୍ତି ସ୍ବାଧୀନତା ଏବଂ ଶିଶୁ ଓ ବ୍ୟକ୍ତିର ଅଧିକାର ଉପରେ ଗୁରୁତ୍ବ ଦେଇଛନ୍ତି।
