ବାଙ୍କୀ : ବାଙ୍କୀ ଅଞ୍ଚଳରେ ଦିନକୁ ଦିନ ଚୋରାମଦ ବ୍ୟବସାୟ ବଢିଚାଲିଥିଲା ବେଳେ ଅସାଧୁ ବ୍ୟବସାୟୀମାନେ ସହଜରେ ଖସିଯାଉଥିବା ଜଣାପଡିଛି। ବିଭିନ୍ନ ସମୟରେ ବାଙ୍କୀ ଅବକାରୀ ବିଭାଗ ପକ୍ଷରୁ ବିଭିନ୍ନ ସ୍ଥାନରେ ଚଢାଉ କରାଯାଇ ଚୋରା ମଦ ପ୍ରସ୍ତୁତ ପାଇଁ ମହଜୁଦ୍ ଥିବା ହଜାର ହଜାର ଲିଟର ପୋଚ ଜବତ କରି ଏହାକୁ ନଷ୍ଟ କରାଯାଇଛି। ହେଲେ ସମ୍ପୃକ୍ତ ଅଭିଯୁକ୍ତଙ୍କୁ ଧରିବାରେ ଅବକାରୀ ବିଭାଗ ବିଫଳ ହେଉଛି। ହେଲେ ଗୁରୁବାର ଦିନ ମଧ୍ୟାହ୍ନରେ ବାଙ୍କୀ ଅବକାରୀ ବିଭାଗକୁ ଗୋଟିଏ ବଡ ସଫଳତା ମିଳିଛି। ଅବକାରୀ ଅଧିକାରୀ ବିଶେଷ ସୂତ୍ରରୁ ଖବର ପାଇ ବାଙ୍କୀ କଟକ ମୁଖ୍ୟ ରାସ୍ତାର ଅବକାରୀ କାର୍ଯ୍ୟାଳୟ ସମ୍ମୁଖରେ ସାଧା ପୋଷାକରେ ଏକ ସୁଇଫ୍ଟ ଡିଜେଆର କାର ସହିତ ସେଥିରେ ଥିବା ଦେଶୀ ଚୋରା ମଦ ପ୍ଲାଷ୍ଟିକ ବ୍ୟାରେଲକୁ ଜବତ କରି ଡ୍ରାଇଭର ସମେତ ଜଣକୁ କାବୁ କରି ଗରିଫ କରିବାରେ ସଫଳ ହୋଇଛନ୍ତି। ଅଧିକାରୀଙ୍କ ସୂଚନା ଅନୁଯାୟୀ କାରଟି ବାଙ୍କୀ ଆଡକୁ ଆସୁଥିବାର ଖବର ପାଇ କାର୍ଯ୍ୟାଳୟ ସମ୍ମୁଖରେ ଅଟକାଇଥିଲେ। କାରରେ ଥିବା ପ୍ଲାଷ୍ଟିକ ବ୍ୟାରେଲରେ ପ୍ରାୟ ୪୦୦ଲିଟର ଚୋରା ମଦ ଥିବା ସୂଚନା ମିଳିଛି। ଏହି ଚଢାଉ ସମୟରେ ବିଶ୍ୱନାଥ ସୋରେନ, ଗୀତାଞ୍ଜଳି ବେହେରା, ସଞ୍ଜୟ କୁମାର ରାଉତ, ସନ୍ତୋଷ କୁମାର ମହାରଣା ପ୍ରମୁଖ ସାମିଲ ଥିଲେ। ଆଠଗଡ ଥାନା ଅନ୍ତର୍ଗତ କୋରଗାଁ ଅଞ୍ଚଳରୁ କାରଟି ମଦ ନେଇ ବାଙ୍କୀ ଥାନା ଅନ୍ତର୍ଗତ ତୁଳସୀପୁର ଗ୍ରାମକୁ ଯାଉଥିବାର ପ୍ରାଥମିକ ତଦନ୍ତରୁ ଜଣାପଡିଥିବା ଅବକାରୀ ଅଧିକାରୀ କହିଛନ୍ତି। ଆଠଗଡ ଥାନା ସଠିଳ ବାସୁଦେବପୁର ଗ୍ରାମର ଡ୍ରାଇଭର ଅଧିର ନାୟକ(୨୭) ହୋଇଥିଲା ବେଳେ ଗାଡିରେ ଥିବା ଅନ୍ୟ ଅଭିଯୁକ୍ତ ପ୍ରହଲ୍ଲାଦ ପାତ୍ର(୩୧) ମଧ୍ୟ ସେହି ଗ୍ରାମର ବୋଲି ସୂଚନା ମିଳିଛି।
Comments are closed.