ସ୍ବାମୀଙ୍କ ବେକରେ କୁକୁର ବେଲ୍ଟ ବାନ୍ଧି ବୁଲାଉଥିଲେ ମହିଳା, ପୁଲିସ କଲା ୨ ଲକ୍ଷ ଟଙ୍କା ଜୋରିମାନା

କରୋନା କର୍ଫ୍ୟୁ ବେଳେ ବାହାରେ ବୁଲିବାକୁ ଫନ୍ଦି

ସାରା ଦୁନିଆ ଏବେ କରୋନା ସହ ଲଢ଼ୁଛି । ନୂଆ ବର୍ଷ ଆସିବା ପରେ ଅନେକ ଲୋକ ଭାବୁଛନ୍ତି କରୋନା ଶେଷ ହୋଇ ଯାଇଛି । ମାତ୍ର ବାସ୍ତବ କଥା ହେଲା ଏବେ ବି କରୋନା ବ୍ୟାପୁଛି, ଦୈନିକ ହଜାର ହଜାର ଲୋକ ମରୁଛନ୍ତି । ବିଶ୍ବର ଅନେକ ସହରରେ ଏବେ ବି କର୍ଫ୍ୟୁ ଓ ତାଲାବନ୍ଦ ଚାଲିଛି। ଲୋକଙ୍କୁ ଘରୁ ବାହାରକୁ ମନା ହୋଇଛି । ମାତ୍ର କାନାଡ଼ାରେ ଏହି ସମୟରେ ଏକ ଅଦ୍ଭୁତ ଖବର ବିଶ୍ବବ୍ୟାପୀ ଚର୍ଚାର ବିଷୟ ହୋଇଛି ।

ଘଟଣାଟି କାନାଡ଼ାର ଇଷ୍ଟ କିଙ୍ଗସ ଷ୍ଟ୍ରୀଟ୍ ଅଞ୍ଚଳର । ଏହି ଅଞ୍ଚଳରେ ରାତି ୮ଟାରୁ ସକାଳ ୫ଟା ପର୍ଯ୍ୟନ୍ତ କର୍ଫ୍ୟୁ ଲଗାଯାଇଛି । ମାତ୍ର ଏହି ସମୟରେ ଲୋକମାନେ ନିଜର ଗୃହପାଳିତ ପଶୁମାନଙ୍କୁ ବାହାରକୁ ବୁଲାଇ ନେବା କିମ୍ବା ଜରୁରୀ କାମରେ ବାହାରକୁ ଯିବା ପାଇଁ ସୁଯୋଗ ଦିଆଯାଇଛି ।

ମାତ୍ର ଏହି ଅଞ୍ଚଳର ଜଣେ ମହିଳା ବାହାରେ ବୁଲିବା ପାଇଁ ଏକ ନୂଆ ଫନ୍ଦି ବାହାର କରିଥିଲେ । ନିଜ ସ୍ବାମୀଙ୍କ ବେକରେ କୁକୁର ପଟି ପକାଇ ବାହାରକୁ ବୁଲିବାକୁ ଯାଇଥିଲେ । ଯେତେବେଳେ ପୁଲିସ କାହିଁକି ବାହାରକୁ ବାହାରିଛନ୍ତି ବୋଲି ପଚାରିଥିଲା, ସେତେବେଳେ ସେ କହିଥିଲେ ମୁଁ କୁକୁର ବୁଲାଉଛି । କର୍ଫ୍ୟୁ ସମୟରେ ଘରର ଗୃହପାଳିତ ପଶୁମାନଙ୍କୁ ବୁଲାଇବାକୁ ତ ସୁଯୋଗ ରହିଛି । ମୁଁ ଭୂଲ କଣ କଲି ବୋଲି ଓଲଟି ମହିଳା ଜଣକ ଯୁକ୍ତି କରିଥିଲେ ।

ମାତ୍ର ମଣିଷ ବେକରେ କୁକୁର ପଟି ବାନ୍ଧି ପଦାକୁ ବୁଲାଇବାକୁ ନେଲେ ତାହା ପୋଷା କୁକୁର ହୋଇଯାଏ ନାହିଁ ବୋଲି ପୁଲିସ ଯୁକ୍ତି ବାଢ଼ିଥିଲା। ତେଣୁ ଉଭୟ ମହିଳା ଓ କୁକୁର ପଟି ବନ୍ଧା ହୋଇଥିବା ତାଙ୍କ ସ୍ବାମୀଙ୍କ ଉପରେ ୩୦୦୦ ଡ଼ଲାର ଜୋରିମାନା କରିଥିଲା । ଭାରତୀୟ ମୁଦ୍ରାରେ ଏହାର ମୂଲ୍ୟ ପ୍ରାୟ ୨ ଲକ୍ଷ ଟଙ୍କାରୁ କିଛି ବେଶୀ ହେବ ।

ଅବଶ୍ୟ ଏପରି ଜୋରିମାନା କିଛି ନୂଆ କଥା ନୁହେଁ। ଗତ ନଭେମ୍ବର ମାସରେ ଚେକ୍ ରିପବ୍ଲିକର ଜଣେ ବ୍ୟକ୍ତି ନିଜର କୁକୁର ବୁଲାଇବା ବାହାନାରେ ପଦାରେ ବୁଲୁଥିଲେ । ଚେନରେ ଏକ ଖେଳନା କୁକୁର ସେ ବାନ୍ଧିଥିଲେ । ମାତ୍ର ପୁଲିସ ଆଖିରୁ ତାହା ବାଦ ପଡ଼ି ନ ଥିଲା । କୁକୁର ବାହାନାରେ ଖେଳନା ଧରି ରାସ୍ତାରେ ବୁଲୁଥିବା ବ୍ୟକ୍ତିକୁ ପୁଲିସ ଚେତାବନୀ ଦେଇ ଛାଡ଼ି ଦେଇଥିଲା । ଆଉଥରେ ଏପରି ଭୁଲ କଲେ କଠୋର କାର୍ଯ୍ୟାନୁଷ୍ଠାନ ହେବ ବୋଲି ପୁଲିସ ଧମକ ଦେଇଥିଲା ।