କରୋନା ଟୀକାକରଣ ପାଇଁ ଦିନକୁ ଦିନ ସମ୍ଭାବନା ବୃଦ୍ଧି ପାଉଥିବା ବେଳେ କାହାକୁ କେଉଁଠି ଓ କେଉଁ ସମୟରେ ଟୀକାକରଣ କରାଯିବ ସେ ନେଇ ଜାଣିବା ଆବଶ୍ୟକ ହୋଇପଡିଛି। ତେବେ ମିଳିଥିବା ସୂଚନା ଅନୁଯାୟୀ ଏଏନଏମ, ଆଶା କର୍ମୀ ଏବଂ ଅଙ୍ଗନୱାଡି କର୍ମୀମାନେ ପୂର୍ବରୁ ସ୍ଥିରୀକୃତ ଲୋକଙ୍କ ଘରକୁ ଯାଇ ଭୋଟର ସ୍ଲିପ୍ ପରି କରୋନା ଟୀକାକରଣ ସ୍ଲିପ୍ ବିତରଣ କରିବେ। ଏହି ସ୍ଲିପରେ କିଏ ଟିକା ଦେବେ ତାଙ୍କ ନାମ ସହିତ ସମ୍ପୂର୍ଣ୍ଣ ସୂଚନା ରହିବ।
କରୋନା ଟିକା ପ୍ରସ୍ତୁତି ପାଇଁ ଯୁଦ୍ଧକାଳୀନ ସ୍ଥରରେ ପଦକ୍ଷେପ ନିଆଯାଉଥିବା ବେଳେ ଟୀକାକରଣ ପାଇଁ ହିତାଧିକାରୀଙ୍କ ତାଲିକା ପ୍ରସ୍ତୁତ କରାଯାଉଛି। ସର୍ବପ୍ରଥମେ ସ୍ୱାସ୍ଥ୍ୟ କର୍ମୀଙ୍କୁ ଟୀକାକରଣ ପାଇଁ ଟୀକାକରଣ କେନ୍ଦ୍ର ନିର୍ଦ୍ଧାରିତ କରାଯାଉଛି। ରାଜ୍ୟଗୁଡ଼ିକରେ ଆଗ ଧାଡ଼ିର ଯୋଦ୍ଧାମାନଙ୍କ ପାଇଁ ଦୁଇ ହଜାର କେନ୍ଦ୍ର ଏବଂ ୫୦ ବର୍ଷରୁ ଅଧିକ ଲୋକଙ୍କୁ ଟୀକାକରଣ ପାଇଁ ତିନି ହଜାର କେନ୍ଦ୍ର ବ୍ୟବସ୍ଥା କରାଯାଉଥିବା ଜଣାପଡିଛି। ଟୀକାକରଣ ପାଇଁ ତଥ୍ୟ ବ୍ଲକ ସ୍ତରରେ କମ୍ପ୍ୟୁଟରରେ ରେକର୍ଡ କରାଯାଉଛି। ଏଥିରେ ହିତାଧିକାରୀଙ୍କ ନାମ, ବୟସ, ଠିକଣା ଓ ମୋବାଇଲ୍ ନମ୍ବର ଅନ୍ତର୍ଭୁକ୍ତ କରାଯିବ। ଏହି ଆଧାରରେ ଘରକୁ ଘର ଟୀକାକରଣ ବିଷୟରେ ଅବଗତ କରାଯିବ।
