ଜ୍ବାଇଁକୁ ଯୌତୁକରେ ଶାଶୁ ଦେଲେ ଏକେ-୪୭ ରାଇଫଲ; ଦେଖନ୍ତୁ ଭାଇରାଲ ଭିଡ଼ିଓ

ଇସଲାମାବାଦ : ପାକିସ୍ତାନରେ ଏକ ବିବାହରେ ଜଣେ ଶାଶୁ ନିଜ ଜ୍ବାଇଁଙ୍କୁ ଏକ ଏକେ-୪୭ ରାଇଫଲ ଯୌତୂକ ଦେଉଥିବା ଦୃଶ୍ୟ ଏବେ ସୋସିଆଲ ମିଡ଼ିଆରେ ଭାଇରାଲ ହୋଇଛି । ଏହି ଭିଡିଓରେ ଦେଖାଯାଉଛି ଯେ ଏକ ବିବାହରେ ବର ସେଠାରେ ଉପସ୍ଥିତ ଥିବା ଅତିଥିମାନଙ୍କ କରତାଳି ମଧ୍ୟରେ ତାଙ୍କ ଶାଶୁଙ୍କଠାରୁ ରାଇଫଲ ଉପହାର ଗ୍ରହଣ କରିଛନ୍ତି।

ایسی ساسیں ہونی چاہیے۔۔۔۔ ہمارے جذبات پر بھی غور کیا جاۓ۔۔۔۔۔۔ pic.twitter.com/huSMjH9UGH

— Syed Ikhteyaar (@HussainIkhteyar) November 25, 2020

ଏହି ଭିଡିଓ ପାକିସ୍ତାନରେ କେଉଁ ସ୍ଥାନର ତାହା ସ୍ପଷ୍ଟ ହୋଇନାହିଁ । ଏହି ଉପହାର ଦେଖି ବର ଏବଂ ତାଙ୍କ ଶାଶୁ, ସେଠାରେ ଉପସ୍ଥିତ ଥିବା ଅନ୍ୟ ଲୋକମାନେ ମଧ୍ୟ ହସୁଛନ୍ତି। ମହିଳାଙ୍କ ଝିଅ ମଧ୍ୟ ତାଙ୍କ ସ୍ୱାମୀଙ୍କୁ ମିଳିଥିବା ଉପହାରରେ ବେଶ୍ ଖୁସି ଥିବା ଦେଖାଯାଉଛି ।   ସେଠାରେ ଉପସ୍ଥିତ ଥିବା ସମସ୍ତ ବ୍ୟକ୍ତି ଉପହାରକୁ ନେଇ କୌଣସି ଆଶ୍ଚର୍ଯ୍ୟ ପ୍ରକଟ କରୁଥିବା ଦେଖାଯାଉନାହିଁ ।

ସାଧାରଣତଃ ଏକେ ୪୭ ରାଇଫଲ ଏକ ବିଧ୍ବଂସକ ଅସ୍ତ୍ର ଭାବରେ ଜଣାଶୁଣା ଓ ଏହାକୁ ସୁରକ୍ଷା କର୍ମୀମାନେ ବ୍ୟବହାର କରିଥାଆନ୍ତି । ଏପରିକି ପାକିସ୍ଥାନରେ କିଛି ସ୍ଥାନରେ ବିବାହରେ ଗୁଳି ଫୁଟାଇବା ଏକ ପରମ୍ପରା ପାଲଟିଛି । କିନ୍ତୁ ଯୌତୂକରେ ଶାଶୁ ନିଜ ଜ୍ବାଇଁଙ୍କୁ ଏକେ ୪୭ ରାଇଫଲ ଦେବା ବୋଧହୁଏ ନୂଆ କଥା ।

ସୂଚନାଯୋଗ୍ୟ ଯେ ଗତ ବର୍ଷ ସାଉଦି ଆରବର ପ୍ରିନ୍ସ ଫାହାଦ୍ ବିନ୍ ସୁଲତାନ୍ ବିନ୍ ଅବଦୁଲ୍ ଅଜିଜ୍ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଏକ ସୁନାରେ ନିର୍ମିତ ଏକେ-୪୭ ଉପହାର ଦେଇଥିଲେ। ମାତ୍ର ଏହା କେବଳ ସୁନା ନିର୍ମିତ ପ୍ରତିକୃତି ଥିଲା । ଏଥିରୁ ଗୁଳି ଚଳାଯାଇ ପାରୁ ନ ଥିଲା ।