ନବରଙ୍ଗପୁର: ନବରଙ୍ଗପୁର ଜିଲ୍ଲାର ଅନ୍ୟ ବ୍ଲକ ତୁଳନାରେ ନନ୍ଦାହାଣ୍ଡି , ରାଇଘର , ଓ ଝରିଗାଁ ବ୍ଳକରେ ରକ୍ତହୀନତା ଯୋଗୁଁ ମାତୃ ଓ ଶିଶୁ ମୃତ୍ୟୁ ହାର ଅଧିକ। ଏଣୁ ନୀତି ଆୟୋଗ ଦ୍ୱାରା ଅନୁଦାନ ପ୍ରାପ୍ତ ଆକାଂକ୍ଷା ଜିଲ୍ଲା ଅନ୍ତର୍ଗତ ନବରଙ୍ଗପୁର ଜିଲ୍ଲାର ଏହି ତିନୋଟି ବ୍ଲକକୁ ରକ୍ତହୀନତା ମୁକ୍ତ ବ୍ଳକରେ ପରିଣତ କରିବା ପାଇଁ ଏକ କାର୍ଯ୍ୟକ୍ରମ ଆରମ୍ଭ କରାଯାଇଛି । ନନ୍ଦାହାଣ୍ଡି ବ୍ଳକର ଡଙ୍ଗରଭେଜା ଠାରେ ଏହି କାର୍ଯ୍ୟକ୍ରମକୁ ନବରଙ୍ଗପୁର ଜିଲ୍ଲାପାଳ ଡଃ. ଅଜିତ କୁମାର ମିଶ୍ର ଶୁଭାରମ୍ଭ କରିଛନ୍ତି। ଉକ୍ତ କାର୍ଯ୍ୟକ୍ରମରେ ଗୋଷ୍ଠୀ ଉନ୍ନୟନ ଅଧିକାରୀ, ବ୍ଳକ ଅଧ୍ୟକ୍ଷ, ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ, ଜିଲ୍ଲା ସାମାଜିକ କଲ୍ୟାଣ ଅଧିକାରୀ , ଅତିରିକ୍ତ ପ୍ରକଳ୍ପ ନିର୍ଦେଶକ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା , ସାଂସଦ ପ୍ରତିନିଧି ଏବଂ ବିଧାୟକ ପ୍ରତିନିଧି ଉପସ୍ଥିତ ଥିଲେ। ଏହି କାର୍ଯ୍ୟକ୍ରମରେ ଏକ କୋଟି ଚାରି ଲକ୍ଷ ଟଙ୍କାର ଅନୁଦାନ ରାଶି ମଞ୍ଜୁର କରାଯାଇଛି। ଏହା ଦ୍ୱାରା ତିନି ଟି ବ୍ଳକର ଷାଠିଏଟି ପଂଚାୟତ, ୨୭୫ ଟି ରାଜସ୍ବ ଗ୍ରାମ ର ୧୫୯୫୬ ଜଣ କିଶୋରୀ ବାଳିକା ୧୧୧୧୦ ଜଣ ଗର୍ଭବତୀ ମହିଳା ଓ ୫୫୫୫ ଜଣ ପ୍ରସୂତୀ ମହିଳା ଉପକୃତ ହୋଇପାରିବେ। ଦୁଇ ବର୍ଷ ଅବଧି ବିଶିଷ୍ଟ ଏହି କାର୍ଯ୍ୟକ୍ରମରେ ମୁଖ୍ୟ ଉଦ୍ଦେଶ୍ୟ କିଶୋରୀ ମାନଙ୍କ ଠାରେ ଲୋହିତ ରକ୍ତ କଣିକାର ବୃଦ୍ଧି, କମ ଓଜନ ଓ ସମୟ ପୂର୍ବରୁ ଜନ୍ମିତ ଶିଶୁଙ୍କ ମୃତ୍ୟୁହାର କମାଇବା ଓ ମାତୃ ମୃତ୍ୟୁହାର କମାଇବା। ୧୦ ରୁ ୧୯ ବର୍ଷ ର କିଶୋରୀ ବାଳିକା ଗର୍ଭବତୀ ଓ ପ୍ରସୂତୀ ମହିଳା ମାନଙ୍କ ତଥ୍ୟ ସଂଗ୍ରହ କରି ସେମାନଙ୍କୁ ପୃଷ୍ଟିକର ଖାଦ୍ୟ ଓ ଔଷଧ ପ୍ରଦାନ କରାଯିବ ବୋଲି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କହିଛନ୍ତି। ହିମୋଗ୍ଲୋବିନ ମିଟରର ବ୍ୟବହାର ରକ୍ତହୀନତାର ପରିଚାଳନା ଓ ଔଷଧର ବ୍ୟବହାର ଇତ୍ୟାଦି ପାଇଁ ସ୍ୱାସ୍ଥ୍ୟକର୍ମୀ, ଆଶା , ଅଙ୍ଗନବାଡି କର୍ମୀ ମାନଙ୍କ ଦକ୍ଷତା ବୃଦ୍ଧି ପାଇଁ ତାଲିମ ପ୍ରଦାନ କରାଯିବ ଏବଂ ରକ୍ତହୀନତା ପରିଚାଳନା ଏବଂ ବାଲ୍ୟ ବିବାହ ନିରାକରଣ ପାଇଁ ନାଚ ଓ ଗୀତ ମାଧ୍ୟମରେ ସଚେତନତା ସୃଷ୍ଟି କରାଯିବା ସହ କିଶୋରୀ ବାଳିକା ମାନଙ୍କର ଲୋହିତ ରକ୍ତ କଣିକାର ସ୍ଥିତି ଜାଣିବା ପାଇଁ ସ୍ବତନ୍ତ୍ର କାର୍ଡ଼ ପ୍ରଦାନ କରାଯିବ ବୋଲି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କହିଛନ୍ତି।
Popular Categories
Previous article
Next article