ଛତ୍ରପୁର : କରୋନା ମୁକାବିଲା ଦିଗରେ ବିଭିନ୍ନ ସମୟରେ ବିଭିନ୍ନ ପଦକ୍ଷେପ ନେଇ ରାଜ୍ୟର ଉଦାହରଣ ସୃଷ୍ଟି କରିଥିବା ଗଞ୍ଜାମ ଜିଲା ପ୍ରଶାସନ ପୁଣି ଏକ ନିର୍ଦେଶନାମା ଜାରି କରିଛନ୍ତି। କରୋନାର ଦ୍ବିତୀୟ ଲହର ଆଶଙ୍କା ସତ୍ତ୍ବେ ଲୋକେ ବେପରୁଆ ମନୋଭାବ ପୋଷଣ କରୁଥିବାରୁ ସେଥିରେ ବ୍ରେକ ଦେବାକୁ ‘ମାସ୍କ ନାହିଁ ତ ସରକାରୀ ଏବଂ ବେସରକାରୀ ସେବା ନାହିଁ’ ଘୋଷଣା କରିଛି ଗଞ୍ଜାମ ଜିଲା ପ୍ରଶାସନ।
ଭିଡିଓ କନଫରେନ୍ସି ଜରିଆରେ ଜିଲାସ୍ତରୀୟ କୋଭିଡ୍ ପରିଚାଳନା ବୈଠକରେ ଏଭଳି ନିର୍ଦେଶନାମା ଜାରି କରିଛନ୍ତି ଗଞ୍ଜାମ ଜିଲାପାଳ ବିଜୟଅମୃତା କୁଲାଙ୍ଗେ। ମାସ୍କ ପରିଧାନ କରିନଥିବା ବ୍ୟକ୍ତିଙ୍କୁ ଦୋକାନଠାରୁ ଆରମ୍ଭ କରି ବ୍ୟାଙ୍କ, ବସ୍, ତହସିଲ, ବ୍ଲକ କାର୍ଯ୍ୟାଳୟ ଏବଂ ଡାକ୍ତରଖାନା ଆଦି ସରକାରୀ ଓ ବେସରକାରୀ ଅନୁଷ୍ଠାନ ସେବା ଯୋଗାଇ ନଦେବାକୁ ଜିଲାପାଳ କହିଛନ୍ତି। ଲୋକେ କୌଣସି କାମରେ ଘରୁ ବାହାରିଲେ ମାସ୍କ ପିନ୍ଧିବାକୁ ସୁନିଶ୍ଚିତ କରିବାକୁ ସେ ଆହ୍ବାନ କରିଛନ୍ତି। ସବୁ ସ୍ଥାନରେ ମାସ୍କ ବଣ୍ଟନ ଓ ସଚେତନ କାର୍ଯ୍ୟକୁ ବ୍ୟାପକ କରାଯିବ। ମନ୍ଦିରକୁ ଯାଇ ସଂକ୍ରମିତ ନହେବାକୁ ବୟସ୍କ ଓ ବିଭିନ୍ନ ରୋଗରେ ପୀଡିତ ବ୍ୟକ୍ତିଙ୍କୁ ସତର୍କ କରାଇ ଦିଆଯାଉଛି । ସଂକ୍ରମଣ ପୁଣି ଥରେ ବ୍ୟାପି ପାରେ । ଏହି କାରଣରୁ ମନ୍ଦିର ଖୋଲିବାକୁ ବାରଣ କରାଯାଇଛି ବୋଲି ଜିଲାପାଳ ସ୍ପଷ୍ଟ କରିଛନ୍ତି। ଜଣେ ହେଲେ କୋଭିଡ୍ ଯୋଦ୍ଧା ଯେପରି ସଂକ୍ରମିତ ନହୁଅନ୍ତି ସେଥିପ୍ରତି ସଜାଗ ରହିବାକୁ ବୈଠକରେ ପରାମର୍ଶ ଦିଆଯାଇଛି। ଦୈନିକ ପରୀକ୍ଷା ସକାଶେ ଯାହା ଲକ୍ଷ୍ୟଧାର୍ଯ୍ୟ କରାଯାଇଛି ତାହା ଯେମିତି ପୂରଣ ହେବ ସେ ଦିଗରେ ଧ୍ୟାନ ଦେବା, ଦୀପାବଳି ପୂର୍ବରୁ ଘରକୁ ଘର ବୁଲି ସ୍ୱାସ୍ଥ୍ୟ ଯାଞ୍ଚ କାମ ଶେଷ କରି ଷ୍ଟିକର ଲଗାଇବାକୁ ଜିଲାପାଳ ନିେର୍ଦଶ ଦେଇଛନ୍ତି।
ଜିଲାରେ ଯେପରି ଗ୍ରୀନ ଦୀପାବଳି ପାଳନ ହେବ ସେଥି ସକାଶେ ଲୋକଙ୍କୁ ଜିଲାପାଳ ଅନୁରୋଧ କରିଛନ୍ତି। ପାର୍କ ଓ ଖେଳ ପଡିଆକୁ ଯାଇ ଲୋକେ ୱାକ କରିପାରିବେ। କିନ୍ତୁ ସାମାଜିକ ଦୂରତା ପ୍ରତି ସଜାଗ ରହିବାକୁ ପରାମର୍ଶ ଦେଇଛନ୍ତି। ବୈଠକରେ ମହାନଗର ନିଗମ କମିଶନର ଡଃ ସିଦ୍ଧେଶ୍ୱର ବଳିରାମ ବନ୍ଦାର, ଜିଲା ଗ୍ରାମ୍ୟ ଉନ୍ନୟନ ପ୍ରକଳ୍ପ ନିର୍ଦେଶକ ସିନ୍ଧେଦତ୍ତାତ୍ରେୟ ଭାଉ ସାହେବ, ଅତିରିକ୍ତ ଜିଲାପାଳ କବିନ୍ଦ୍ରକୁମାର ସାହୁ ଓ ଅମୀୟ କୁମାର ସାହୁ, ସହରାଞ୍ଚଳ ପ୍ରକଳ୍ପ ନିର୍ଦ୍ଦେଶକ ସୁଦାମଚରଣ ମଣ୍ଡଳ, ବ୍ରହ୍ମପୁର ଉପଜିଲାପାଳ କୀର୍ତ୍ତି ଭାସନାନ,ଛତ୍ରପୁର ଉପଜିଲାପାଳ ପ୍ରିୟରଞ୍ଜନ ପୃଷ୍ଟି, ମୁଖ୍ୟ ଜିଲା ଚିକିତ୍ସାଧୀକାରୀ ଡା.ଉମାଶଙ୍କର ମିଶ୍ର, ଜରୁରୀ କାଳୀନ ଅଧୀକାରୀ ଡ. ଦିବ୍ୟଲୋଚନ ମହାନ୍ତ, ଜିଲା ଶିକ୍ଷାଧିକାରୀ ଅମୁଲ୍ୟକୁମାର ପ୍ରଧାନ, ଜିଲା ମଙ୍ଗଳ ଅଧିକାରୀ ପରିକ୍ଷିତ ଦାଶ, ସୂଚନା ଓ ଲୋକ ସଂପର୍କ ଅଧିକାରୀ ରବିନାରାୟଣ ବେହେରା ପ୍ରମୁଖ ଉପସ୍ଥିତ ଥିଲେ ।
