ଉତ୍ତରପ୍ରଦେଶର ବହରାଇଚ ଜିଲା ଅନ୍ତର୍ଗତ ବାବାଗଞ୍ଜ ଅଞ୍ଚଳର ଏହି ଘଟଣା । ବର୍ଷାଦିନରେ ସାପ ଗାତରେ ପାଣି ପଶି ଯିବାରୁ ବିଷାକ୍ତ ସାପ ବାହାରକୁ ବାହାରି ଆସିଛନ୍ତି । ଶଙ୍କରପୁର, ଚିଲବିଲା, ବେଲଭରିଆ ଆଦି କିଛି ଗାଁରେ ଗତ କିଛିଦିନ ମଧ୍ୟରେ ସାପ କାମୁଡ଼ାରେ ଅନ୍ୟୂନ ଦୁଇ ଡ଼ଜନ ଲୋକ ଓ ୧୦ରୁ ଅଧିକ ପଶୁଙ୍କୁ ସାପ କାମୁଡ଼ିଛି । ଗତ ନାଗପଞ୍ଚମୀ ଦିନ ପଶୁମାନଙ୍କୁ ଖାଦ୍ୟ ଦେବାକୁ ଯାଉଥିବା ଇବରାର ନାମକ ଜଣେ ବ୍ୟକ୍ତିକୁ ସାପ କାମୁଡ଼ିବାକୁ ଗୋଡ଼ାଇଥିଲା । ଇବ୍ରାର କୌଣସି ପ୍ରକାରେ ନିଜ ଜୀବନ ବଞ୍ଚାଇ ପଳାଇବାକୁ ସକ୍ଷମ ହୋଇଥିଲା । କିନ୍ତୁ ଏହା ମଧ୍ୟରେ କେହି ସେହି ସାପଟିକୁ ପିଟିପିଟି ମାରି ଦେବାରେ ସକ୍ଷମ ହୋଇଥିଲେ ।
ଏହାପରେ ଆରମ୍ଭ ହୋଇଥିଲା ଗାଁରେ ତାଣ୍ଡବ । ମୃତ ସାପର ଯୋଡ଼ି ଥିବା ନାଗୁଣୀ ଗାଁର ସନ୍ଦୀପ, ଗୁଲାବୀ ଦେବୀ, ଶୀଲା ଦେବୀ, ମାୟା ଦେବୀ, ଝାଲ୍ଲେ, ଧର୍ମପ୍ରକାଶ, ବିପିନ, ଚିର୍କୁ, ଭାଗିରଥୀ ଓ ନଗରିଆ, ପୱନ ସମେତ ୨୬ ଜଣଙ୍କୁ ଗୋଡ଼େଇ ଗୋଡ଼େଇ କାମୁଡ଼ିଛି । ଏମାନଙ୍କ ମଧ୍ୟରୁ ମୁନସୀରାମ ନାମକ ଜଣେ ବ୍ୟକ୍ତିର ମୃତ୍ୟୁ ଘଟିଛି । ଜଣେ ଗ୍ରାମବାସୀ କହିଛନ୍ତି ଯେ ନାଗପଞ୍ଚମୀରେ ଗାଁର ଏକ ମନ୍ଦିରରେ ରହୁଥିବା ନାଗ-ନାଗୁଣୀ ମଧ୍ୟରୁ ନାଗଟିକୁ କିଛି ବ୍ୟକ୍ତି ପିଟିପିଟି ମାରି ଦେଇଥିଲେ । ଏହାପରେ କ୍ରୋଧାନ୍ବିତ ନାଗୁଣୀ ଗାଁରେ ଆତଙ୍କ ସୃଷ୍ଟି କରିଛି । ସର୍ପ ଦଂଶନର ଶିକାର ହୋଇଥିବା ଜଣେ ବ୍ୟକ୍ତି କହିଛନ୍ତି ଯେ ଏହି ସାପ ରାତିରେ ଶୋଇଥିବା ବେଳେ ଆସି କାମୁଡ଼ୁଛି । ସେଥିପାଇଁ ଭୟରେ ପିଲାମାନଙ୍କୁ ଅନ୍ୟତ୍ର ପଠାଇ ଦେବା ବ୍ୟତୀତ ଅନ୍ୟ କିଛି ବାଟ ନାହିଁ ବୋଲି ସେ କହିଛନ୍ତି ।
କିଛି ଗ୍ରାମବାସୀ ସାପ ଧରିବା ପାଇଁ ସାପୁଆକେଳାଙ୍କୁ ଡ଼ାକିଛନ୍ତି । ହେଲେ ବର୍ଷା ଋତୁରେ ସବୁ ସାପଙ୍କୁ ଧରିବା ସମ୍ଭବ ନୁହେଁ ଓ ଯେଉଁ ନାଗୁଣୀଟି କ୍ରୋଧବଶତଃ କାମୁଡ଼ୁଛି ତାକୁ ଚିହ୍ନଟ କରିବା ମଧ୍ୟ ଅସମ୍ଭବ ବୋଲି ସାପୁଆ କେଳା କହିଛି । ଏହାପରେ ଗାଁରେ ଆତଙ୍କ ସୃଷ୍ଟି ହୋଇଛି ।
