ପୁରୀ : ରାଷ୍ଟ୍ରପତି ରାମନାଥ କୋବିନ୍ଦ ଆଗାମୀ ୧୮ତାରିଖ ଦିନ ପୁରୀ ଗସ୍ତରେ ଆସିବେ। ରାଷ୍ଟ୍ରୀୟ ସଂସ୍କୃତ ସଂସ୍ଥାନ ଶ୍ରୀସଦାଶିବ ପରିସର ଶତବାର୍ଷିକୀ ଉତ୍ସବରେ ସେ ଯୋଗଦେବାର କାର୍ଯ୍ୟକ୍ରମ ରହିଛି। ଏଥିନେଇ ରାଷ୍ଟ୍ରପତି ଭବନ ପକ୍ଷରୁ ଆନୁଷ୍ଠାନିକ ଭାବେ ଘୋଷଣା କରାଯାଇଛି। ସଭା କାର୍ଯ୍ୟସୂଚୀ ସମ୍ପର୍କରେ ବିସ୍ତୃତ ତଥ୍ୟ ମୁଖ୍ୟ ଶାସନ ସଚିବଙ୍କ ମାଧ୍ୟମରେ ପଠାଇବାକୁ ରାଷ୍ଟ୍ରପତିଙ୍କ ବ୍ୟକ୍ତିଗତ ସଚିବ ବିକ୍ରମ ସିଂ ମଙ୍ଗଳବାର ଚିଠି ଲେଖିଛନ୍ତି। ଏହାଛଡା ଶତବାର୍ଷିକୀ ମହୋତ୍ସବ ମଞ୍ଚରେ ଆଉ କେଉଁମାନେ ଉପସ୍ଥିତ ରହିବେ ସେଥିନେଇ ରାଷ୍ଟ୍ରପତି ଭବନ ତଥ୍ୟ ମାଗିଛି। ମିଳିଥିବା ସୂଚନା ଅନୁଯାୟୀ କେନ୍ଦ୍ର ମାନବ ସମ୍ବଳ ମନ୍ତ୍ରୀ ପ୍ରକାଶ ଜାଭଡେକର, କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ ଏବଂ ପୁରୀ ଗଜପତି ମହାରାଜା ଶ୍ରୀଦିବ୍ୟସିଂହ ଦେବ ଅତିଥି ଭାବେ ଯୋଗଦେବେ। ରାଷ୍ଟ୍ରୀୟ ସଂସ୍କୃତ ସଂସ୍ଥାନ କୁଳପତି ପ୍ରଫେସର ପି.ଏନ. ଶାସ୍ତ୍ରୀ ସେଥିରେ ଅଧ୍ୟକ୍ଷତା କରିବେ। ଦେଶର ୯ଜଣ ସଂସ୍କୃତ ବିଦ୍ୱାନଙ୍କୁ ସମ୍ବର୍ଦ୍ଧିତ କରାଯିବ ବୋଲି କଲେଜ ଅଧ୍ୟକ୍ଷ ପ୍ରଫେସର ଅତୁଲ କୁମାର ନନ୍ଦ ସୂଚନା ଦେଇଛନ୍ତି। ସଂସ୍କୃତ ସଂସ୍ଥାନ ପକ୍ଷରୁ ବୁଧବାର ମିନିଟ୍ ଟୁ ମିନିଟ କାର୍ଯ୍ୟକ୍ରମ ପ୍ରସ୍ତୁତ କରାଯାଇ ରାଷ୍ଟ୍ରପତିଙ୍କ ଅନୁମୋଦନ ପାଇଁ ପଠାଯାଇଛି। ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ ରାଷ୍ଟ୍ରପତି ଶ୍ରୀ କୋବିନ୍ଦ ଦିନ ୧୦ଟାରେ ଶତବାର୍ଷିକୀ ଉତ୍ସବ ସ୍ଥାନରେ ପହଞ୍ଚିବେ। ଦିନ ୧୦ଟା ୪୫ରେ ସେ ସଭାସ୍ଥଳ ଛାଡିବାର କାର୍ଯ୍ୟକ୍ରମ ରହିଛି। ଶ୍ରୀମନ୍ଦିରକୁ ଯାଇ ସେ ଶ୍ରୀଜୀଉଙ୍କୁ ଦର୍ଶନ କରିବେ କି ନାହିଁ ଏବଂ ଯଦି ଯିବେ କେତେବେଳେ ଯିବେ ସେ ସମ୍ପର୍କରେ କୌଣସି ସୂଚନା ଏପର୍ଯ୍ୟନ୍ତ ମିଳିନାହିଁ।
Popular Categories
Previous article
Next article