ନୂଆଦିଲ୍ଲୀ: ଏସିଆ ମହାଦେଶରେ ଶକ୍ତିଶାଳୀ ହେବାକୁ ଚୀନର ଷଡ଼ଯନ୍ତ୍ର କ୍ରମଶଃ ଅଶାନ୍ତ ବାତାବରଣ ସୃଷ୍ଟି କରିବାରେ ଲାଗିଛି। ଚୀନର ବିସ୍ତାରବାଦ ନୀତି ବିଭିନ୍ନ ଦେଶ ପାଇଁ ଅଡୁଆ ପରିସ୍ଥିତି ସୃଷ୍ଟି କରିଛି। ଭାରତ, ଭୂଟାନ ପରେ ତାଜିକିସ୍ତାନର ଅଞ୍ଚଳ ଉପରେ ଚୀନ ନଜର ପକାଇଛି। ତାଜିସ୍ତାନର ପାମିର୍ ପର୍ବତକୁ ନିଜର ବୋଲି ଦାବି କରିଛି ଚୀନ। ମୁସଲମାନ ବହୁତ ତାଜିକିସ୍ତାନର ୯୦ ପ୍ରତିଶତ ଭୂପୃଷ୍ଠ ପାର୍ବତ୍ୟାଞ୍ଚଳ। ଏହି ଅଞ୍ଚଳରେ ଆସୁଥିବା ପାମିର ପର୍ବତ ଚୀନର ବୋଲି ଚୀନ ସରକାରୀ ଗଣମାଧ୍ୟମ ରିପୋର୍ଟ ପ୍ରକାଶ କରିଛି। ଏହି ପର୍ବତଟି ଆଫଗାନିସ୍ତାନ ଏବଂ ଚୀନ ସୀମାକୁ ଲାଗି ରହିଛି।
ଚୀନର ଜଣେ ଐତିହାସିକ ସରକାରୀ ସୂତ୍ରକୁ ଆଧାର କରି ଏପରି ଦାବି କରିଛନ୍ତି। ତାଜିକିସ୍ତାନର ପାମିର ପର୍ବତ ଚୀନର ଏବଂ ତାହାକୁ ଚୀନକୁ ଫେରାଇଦେବା ଜରୁରୀ ବୋଲି ରିପୋର୍ଟରେ ଦର୍ଶାଯାଇଛି। ଏ ସମ୍ପର୍କରେ ଚୀନର ଶାସକ କମ୍ୟୁନିଷ୍ଟ ପାର୍ଟି ପକ୍ଷରୁ କିଛି କୁହାଯାଇ ନ ଥିବାବେଳେ ତାଜିକିସ୍ତାନ ମଧ୍ୟ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇନାହିଁ। ତେବେ ଚୀନ ବାରମ୍ବାର ବିଭିନ୍ନ ଦେଶ ସହିତ ଏଭଳି ଆଞ୍ଚଳିକ ବିବାଦ ସୃଷ୍ଟି କରି ସମଗ୍ର ଏସିଆରେ ଅସ୍ଥିରତା ସୃଷ୍ଟି କରିବାକୁ ଉଦ୍ଦେଶ୍ୟ ରଖିଥିବା କୁହାଯାଇଛି।
