ନୂଆଦିଲ୍ଲୀ: ଭାରତରେ କରୋନା ରେକର୍ଡ ପରେ ରେକର୍ଡ ଭାଙ୍ଗିବାରେ ଲାଗିଛି। ପ୍ରତିଦିନ ସଂକ୍ରମିତଙ୍କ ସଂଖ୍ୟା ବଢ଼ି ଚାଲିଛି। ଗୋଟିଏ ଦିନରେ ପୁଣି ରେକର୍ଡ ସଂଖ୍ୟକ ୨୬ ହଜାର ୫୦୬ ନୂଆ ରୋଗୀ ଚିହ୍ନଟ ହେବା ପରେ ଶୁକ୍ରବାର ସୁଦ୍ଧା ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୭ ଲକ୍ଷ ୯୩ ହଜାର ୮୦୨ରେ ପହଞ୍ଚିଛି। ସେହିପରି ୨୪ ଘଣ୍ଟାରେ ୪୭୫ ରୋଗୀଙ୍କ ମୃତ୍ୟୁ ଘଟିଛି। ଫଳରେ ଦେଶରେ ମୋଟ ମୃତ୍ୟୁ ସଂଖ୍ୟା ୨୧ ହଜାର ୬୦୪କୁ ବୃଦ୍ଧି ପାଇଛି। ଦେଶରେ ବର୍ତ୍ତମାନ ୨ ଲକ୍ଷ ୭୬ ହଜାର ୬୮୫ ସକ୍ରିୟ ରୋଗୀ ଥିବାବେଳେ ୪ ଲକ୍ଷ ୯୫ ହଜାର ୫୧୩ ଜଣ ସୁସ୍ଥ ହୋଇଥିବା କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
ଦେଶରେ ସର୍ବାଧିକ କରୋନା ଆକ୍ରାନ୍ତ ମହାରାଷ୍ଟ୍ରରେ ରହିଛନ୍ତି। ଏଠାରେ ଆକ୍ରାନ୍ତଙ୍କ ସଂଖ୍ୟା ୨ ଲକ୍ଷ ୩୦ ହଜାର ୫୯୯ରେ ପହଞ୍ଚିଛି। ସେହିପରି ମୃତ୍ୟୁ ସଂଖ୍ୟା ୯ ହଜାର ୬୬୭କୁ ବଢ଼ିଛି। ଦିଲ୍ଲୀରେ ୧ ଲକ୍ଷ ୭ ହଜାର ୫୧ ଜଣ କରୋନାରେ ଆକ୍ରାନ୍ତ ହୋଇଥିବାବେଳେ ୩୨୫୮ ଜଣ ପ୍ରାଣ ହରାଇଛନ୍ତି। ତାମିଲନାଡୁରେ ୧ ଲକ୍ଷ ୨୬ ହଜାର ୫୮୧ କରୋନା ସଂକ୍ରମିତ ଏବଂ ୧୭୬୫ ରୋଗୀଙ୍କ ମୃତ୍ୟୁ ଘଟିଛି। ଗୁଜରାଟରେ ସଂକ୍ରମିତ ସଂଖ୍ୟା ୩୯ ହଜାର ୨୮୦କୁ ବୃଦ୍ଧି, ୨୦୦୯ ଜଣଙ୍କ ମୃତ୍ୟୁ ହୋଇଛି। ଏହାବ୍ୟତୀତ ଉତ୍ତରପ୍ରଦେଶରେ ୩୨ ହଜାର ୩୬୨ ସଂକ୍ରମିତ ଓ ୮୬୨ ମୃତ, ପଶ୍ଚିମବଙ୍ଗରେ ୨୫ ହଜାର ୯୧୧ ଆକ୍ରାନ୍ତ ଓ ୮୫୪ ମୃତ, ହରିୟାଣାରେ ୧୯ ହଜାର ୩୬୪ ଆକ୍ରାନ୍ତ ଏବଂ ୨୮୭ ମୃତ, ଆନ୍ଧ୍ରପ୍ରଦେଶରେ ୨୩ ହଜାର ୮୧୪ ଆକ୍ରାନ୍ତ ଏବଂ ୨୭୭ ମୃତ, ତେଲେଙ୍ଗାନାରେ ୩୦ ହଜାର ୯୪୬ ସଂକ୍ରମିତ ଓ ୩୩୧ ମୃତ, କର୍ଣ୍ଣାଟକରେ ୩୧ ହଜାର ୧୦୫ ଆକ୍ରାନ୍ତ ଓ ୪୮୮ ମୃତ, ରାଜସ୍ଥାନରେ ୨୨ ହଜାର ୫୬୩ ଆକ୍ରାନ୍ତ ଓ ୪୯୧ ମୃତ, ଜାମ୍ମୁ-କାଶ୍ମୀରରେ ୯୦୫୧ ସଂକ୍ରମିତ ଓ ୧୫୪ ମୃତ, ମଧ୍ୟପ୍ରଦେଶରେ ୧୬ ହଜାର ୩୪୧ ସଂକ୍ରମିତ ଓ ୬୩୪ ମୃତ, ବିହାରରେ ୧୩ ହଜାର ୯୭୮ ଆକ୍ରାନ୍ତ ଓ ୧୦୯ ମୃତ, ଆସାମରେ ୧୪ ହଜାର ୬୦୧ ଆକ୍ରାନ୍ତ ଓ ୨୭ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି।
