ଝାରସୁଗୁଡ଼ା/ସମ୍ବଲପୁର : ପ୍ରଚଣ୍ଡ ଖରା ହେତୁ ଅଧ କିଲୋମିଟର ଚାଲିବା ମଧ୍ୟ କଷ୍ଟକର। ଏଭଳି କଠିନ ପରିସ୍ଥିତିରେ ୧୯୦୦କିଲୋମିଟର ଗୁରୁଣ୍ଡି ଗୁରୁଣ୍ଡି ଯିବା ପାଇଁ ଏକନିଷ୍ଠ ସଂକଳ୍ପ କରି ଯାତ୍ରା ଜାରି ରଖିଛନ୍ତି ଜଣେ ସାଧୁ। ସେ ହେଉଛନ୍ତି ଅଯୋଧ୍ୟା ନିବାସୀ ବାବା ରାମ ଦାସ। ପ୍ରାୟ ୭ମାସ ପୂର୍ବରୁ ସେ ପୁରୀ ଆସିଥିଲେ ଜଗନ୍ନାଥ ଦର୍ଶନ ପାଇଁ। ସେଠାରୁ ସାଷ୍ଟାଙ୍ଗ ପ୍ରଣିପାତ କରି କରି ବଦ୍ରିନାଥ ଧାମ ଯିବା ପାଇଁ ବାହାରିଛନ୍ତି। ସାଧୁ ଜଣକ ଭୂମିରେ ଲମ୍ବ ହୋଇ ସାଷ୍ଟାଙ୍ଗ ପ୍ରଣିପାତ କରନ୍ତି। ହାତ ଯେତିକି ଦୂର ଯାଏ ସେଠାରେ ଗୋଟିଏ ଘଣ୍ଟି ରଖି ଦିଅନ୍ତି। ପୁଣି ସେଠାରୁ ସାଷ୍ଟାଙ୍ଗ ପ୍ରଣିପାତ କରନ୍ତି। କିଛି ବାଟ ଗଲା ପରେ ସାଥିରେ ଥିବା ତାଙ୍କ ରିକ୍ସାଟି ନେବା ପାଇଁ ଚାଲି ଚାଲି ଫିରନ୍ତି। ପୁଣି ଚିହ୍ନ ଦେଇଥିବା ସ୍ଥାନରେ ପହଞ୍ଚିଲେ ରିକ୍ସା ରଖିଦେଇ ଅନୁୁରୂପ ପ୍ରଣିପାତ କରି ଆଗକୁ ବଢ଼ନ୍ତି।
ରାସ୍ତାରେ କେହି ଅଟକାଇ ଛାଇରେ ବସାଇବା ସହିତ ପାଣି ମନ୍ଦେ ଦେଲେ ଭଲ ନ ହେଲେ ସେ କାହାରି ଠାରୁ କିଛି ଆଶା କରନ୍ତି ନାହିଁ। ସେ କହନ୍ତି ବିଶ୍ବ କଲ୍ୟାଣ ସକାଶେ ଜଗନ୍ନାଥ ସ୍ବାମୀ ଏହି ଆଦେଶ ଦେଇଥିବାରୁ ବାହାରିଛି। କଷ୍ଟ ହେଉଛି କି ବୋଲି ପଚାରିବା ବେଳକୁ ସାମାନ୍ୟ ହସି ଦେଇ ଉପରକୁ ମୁହଁ କରି କୁହନ୍ତି ସିଏ ଥିଲେ କି କଷ୍ଟ। ଗତ ୬ମାସ ୨୨ଦିନ ହେଲା ସେ କେବଳ ୩୦୦କିଲୋମିଟର ପୁରୀରୁ ସମ୍ବଲପୁର ଆସି ପାରିଥିବା ବେଳେ କେବେ ବଦ୍ରିନାଥ ଧାମ ପହଞ୍ଚିବେ ସେ ଖୋଦ୍ ଜାଣନ୍ତି ନାହିଁ। ହେଲେ ଦିନେ ନା ଦିନେ ନିଶ୍ଚୟ ପହଞ୍ଚିବେ ବୋଲି ତାଙ୍କର ଦୃଢ଼ ବିଶ୍ବାସ।
