ଜାମ୍ମୁ : ଜମ୍ମୁ-କାଶ୍ମୀର ସରକାର ଦେଶରେ ପ୍ରଥମ ଥର ପାଇଁ ଆଡଭୋକେଟ ମାନଙ୍କୁ ଏକ କୋଟି ଟଙ୍କା ଆର୍ଥିକ ସହାୟତା ପ୍ରଦାନ କରିଛନ୍ତି । କରୋନା ଭାଇରସ୍ ସଂକ୍ରମଣ ରୋକିବା ପାଇଁ ମାର୍ଚ୍ଚ ୨୪ ତାରିଖରୁ ଲାଗୁ ହୋଇଥିବା ତାଲାବନ୍ଦ ଯୋଗୁଁ ଆଡଭୋକେଟ ମାନଙ୍କର ଜୀବିକା ଗୁରୁତର ଭାବେ କ୍ଷତିଗ୍ରସ୍ତ ହୋଇଛି ଏବଂ ପରେ ମେ ୩ ପର୍ଯ୍ୟନ୍ତ ଏହା ବୃଦ୍ଧି କରାଯାଇଛି । ତେଣୁ ଦେଶରେ ପ୍ରଥମ ଥର ପାଇଁ ଜାମ୍ମୁ-କାଶ୍ମୀର ସରକାର ଆର୍ଥିକ ଦୁର୍ବଳ, ଯୁବ ଆଡଭୋକେଟଙ୍କ ପାଇଁ ଏହି ସହାୟତା ପ୍ରଦାନ କରାଯାଇଛି ।
ଯୁବ ଆଡଭୋକେଟ ତଥା ଆଡଭୋକେଟମାନଙ୍କୁ ସର୍ବନିମ୍ନ ଆର୍ଥିକ ସହାୟତା ପ୍ରଦାନ କରି ଲେଫ୍ଟନାଣ୍ଟ ଗଭର୍ଣ୍ଣର ଗିରିଶ ଚନ୍ଦ୍ର ମୁର୍ମୁ, ଜେ ଆଣ୍ଡ କେ ହାଇକୋର୍ଟର ରେଜିଷ୍ଟ୍ରାର ଜେନେରାଲଙ୍କୁ ଏକ କୋଟି ଟଙ୍କାର ଚେକ୍ ପ୍ରଦାନ କରିଛନ୍ତି । ଜେ ଆଣ୍ଡ କେ ହାଇକୋର୍ଟ ବାର୍ ଆସୋସିଏସନ୍ ସଭାପତି ଅବୀନାଭ ଶର୍ମା ଏବଂ ଲେଫ୍ଟନାଣ୍ଟ ଗଭର୍ଣ୍ଣରଙ୍କ ମୁଖ୍ୟ ସଚିବ ବିପୁଲ ପାଠକ ଏହି ଅବସରରେ ମଧ୍ୟ ଉପସ୍ଥିତ ଥିଲେ । ସରକାରଙ୍କ ପକ୍ଷରୁ ସମାଜର ବିଭିନ୍ନ ବର୍ଗ ପାଇଁ ଘୋଷିତ ରିଲିଫ୍ ପଦକ୍ଷେପଗୁଡ଼ିକ ମଧ୍ୟରେ ପଞ୍ଜୀକୃତ କୋଠାବାଡି ନିର୍ମାଣ ଶ୍ରମିକ, ମନରୋଗା ଜବ୍ କାର୍ଡଧାରୀ ଏବଂ ବିଭିନ୍ନ ଯୋଜନାର ହିତାଧିକାରୀଙ୍କ ସମେତ ପେନସନଭୋଗୀଙ୍କୁ ସହାୟତା ପ୍ରଦାନ ଜାରି ରହିଛି।
