କଲକାତା: କରୋନା ଭୂତାଣୁକୁ ନେଇ ସାରା ଦେଶରେ ଲକଡାଉନ ଘୋଷଣା କରାଯାଇଛି। ଏହାମଧ୍ୟରେ ପଶ୍ଚିମବଙ୍ଗରେ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ଉତ୍ତର କଲକାତାରେ ଜଣେ ବାପା ତା’ର ଦିବ୍ୟାଙ୍ଗ ପୁଅକୁ ତଣ୍ଟି ଚିପି ହତ୍ୟା କରିଛି। ପୁଅର ଭୁଲ ଏହା ଥିଲା ଯେ ସେ ମାସ୍କ ପିନ୍ଧିବାକୁ ମନା କରିଦେଲା। ବାସ ଏତିକିରେ ବାପା ହିତାହିତ ଜ୍ଞାନ ଭୁଲି ପୁଅକୁ ହତ୍ୟା କଲା। ପରେ ଅଭିଯୁକ୍ତ ବାପା ଥାନାକୁ ଯାଇ ଆତ୍ମସମର୍ପଣ କରିଛି।
ଜଣେ ବରିଷ୍ଠ ପୁଲିସ ଅଧିକାରୀଙ୍କ ସୂଚନା ଅନୁସାରେ, ଶନିବାର ସନ୍ଧ୍ୟା ୭ଟାରେ ଅଭିଯୁକ୍ତ ବଂଶୀଧର ମଲ୍ଲିକ(୭୮) ଥାନାରେ ପହଞ୍ଚିଥିଲା। ବଂଶୀଧର ଥାନାରେ କହିଥିଲା ଯେ, ସେ ତା’ର ନିଜ ପୁଅ ଶୀର୍ଷେନ୍ଦୁ ମଲ୍ଲିକ(୪୫)କୁ ତଣ୍ଟିଚିପି ହତ୍ୟା କରିଛି। ଏହା ପରେ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ପୁଲିସ ସୂଚନା ଅନୁସାରେ, ଅଭିଯୁକ୍ତ ବଂଶୀଧର ଏବଂ ତା’ର ପୁଅ ମଧ୍ୟରେ ସମ୍ପର୍କ ଭଲ ନ ଥିଲା। ପୁଅ ଦିବ୍ୟାଙ୍ଗ ହୋଇଥିବାବେଳେ ବେରୋଜଗାର ଥିବାରୁ ସେମାନଙ୍କ ମଧ୍ୟରେ ସବୁବେଳେ ଝଗଡ଼ା ହେଉଥିଲା। ବଂଶୀଧର ଶନିବାର ତା’ ପୁଅକୁ କହିଥିଲା ଯେ, ଯେତେବେଳେ ବି ବାହାରକୁ ଯାଉଛୁ ମାସ୍କ ପିନ୍ଧିକି ଯିବୁ, କିନ୍ତୁ ପୁଅ ମାସ୍କ ପିନ୍ଧିବାକୁ ମନା କରିଥିଲା। ଏଥିରେ ରାଗିଯାଇ ବଂଶୀଧର ପୁଅ ଶୀର୍ଷେନ୍ଦୁକୁ ତଣ୍ଟି ଚିପି ମାରିଦେଇଥିଲା।
