ରାଞ୍ଚି: ଝାଡ଼ଖଣ୍ଡର ଗୋଡ୍ଡା ଜିଲା ଅନ୍ତର୍ଗତ ଡୁଲ୍ଲୁ ଗ୍ରାମରେ ମଇଁଷି ଚୋରି ସନ୍ଦେହରେ ଦୁଇ ସଂଖ୍ୟାଲଘୁ ସମ୍ପ୍ରଦାୟର ଯୁବକଙ୍କୁ ହତ୍ୟା କରାଯାଇଛି। ପୁଲିସ ଏହି ଘଟଣାରେ ୪ଜଣଙ୍କୁ ଗିରଫ କରିଛି। ସମ୍ପୃକ୍ତ ଗ୍ରାମର ମୁନ୍ସୀ ମୁର୍ମୁ ନାମକ ବ୍ୟକ୍ତିଙ୍କ ଗୁହାଳରୁ ମଙ୍ଗଳବାର ରାତିରେ ୧୩ଟି ମଇଁଷି ଚୋରି ହୋଇଥିବା ଅଭିଯୋଗ ହୋଇଥିଲା। ଏଥିନେଇ ବୁଧବାର ସକାଳେ ଗ୍ରାମବାସୀ ଦୁଇ ସଂଖ୍ୟାଲଘୁ ସମ୍ପ୍ରଦାୟର ଯୁବକ ସିରାବୁଦ୍ଦିନ ଆନସାର(୩୫) ଓ ମୁରାତାଜା ଆନସାର(୩୦)ଙ୍କ ପ୍ରତି ସନ୍ଦେହ ବ୍ୟକ୍ତ କରିଥିଲେ। ସେମାନେ ବାଙ୍କାଟି ଅଞ୍ଚଳରେ ମଇଁଷିଙ୍କୁ ଲୁଚାଇ ରଖିଥିବା ଅଭିଯୋଗ କରି ଦୁଇ ଜଣଙ୍କୁ ବାନ୍ଧି ନିର୍ଘାତ ପ୍ରହାର କରିବରେ ସେମାନଙ୍କର ଘଟଣାସ୍ଥଳରେ ମୃତ୍ୟୁ ହୋଇଯାଇଥିଲା। ଖବର ପାଇ ପୁଲିସ ସେଠାରେ ପହଞ୍ଚି ଦୁଇ ଯୁବକଙ୍କୁ ଉଦ୍ଧାର କରିଥିଲା। ପୁଲିସ ମୁର୍ମୁଙ୍କ ସମେତ କିଷାନ ଟୁଡୁ, ହରଜୋହାନ କିସ୍କୁ ଓ କାଲେଶ୍ୱର ସୋରେନଙ୍କୁ ପୁଲିସ ଗିରଫ କରି ମାମଲାର ତଦନ୍ତ ଚଳାଇଛି।
