ଆରଡି : କରୋନାକୁ ନେଇ ଏବେ ସାରା ବିଶ୍ୱ ଚିନ୍ତିତ ହୋଇପଡ଼ିଛି। ଏପରିସ୍ଥଳେ ଗତ ଗୁରୁବାର ରାଜ୍ୟ ସରକାରଙ୍କ ନିଷ୍ପତ୍ତି ଅନୁଯାୟୀ ଶୁକ୍ରବାର ଠାରୁ ଆସନ୍ତା ଏପ୍ରିଲ ୧ ପର୍ଯ୍ୟନ୍ତ ସମସ୍ତ ଧାର୍ମିକ ପୀଠରେ ଆଗନ୍ତୁକ ଶ୍ରଦ୍ଧାଳୁମାନଙ୍କର ଦର୍ଶନ ଓ ପୂଜାର୍ଚ୍ଚନାକୁ ରୋକ ଲଗାଯାଇଛି। ଯାହାକୁ ନେଇ ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡିଧାମର ବାବା ଆଖଣ୍ଡଳମଣିଙ୍କ ମନ୍ଦିର ଶୁକ୍ରବାର ଭୋର ଖୋଲିବା ପରେ ମଙ୍ଗଳ ଆଳତୀ ସମ୍ପନ୍ନ ହେବା ପରେ ମନ୍ଦିର ବେଢାର ୪ଟି ଦ୍ୱାରକୁ ବନ୍ଦ କରିଦିଆଯାଇଥିଲା। ତାହାସହ ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର ଦ୍ୱାରା ଭକ୍ତ ସର୍ବସାଧାରଣଙ୍କୁ ସଚେତନତା କରାଯାଉଛି। ଅନ୍ୟପଟେ ସେବାୟତମାନଙ୍କ ଦ୍ୱାରା ମଣିବାବାଙ୍କ ନୀତିକାନ୍ତି ନିର୍ଦ୍ଧାରିତ ସମୟରେ ସମ୍ପନ୍ନ ହେଉଥିବା ବେଳେ ଜଗତର କଲ୍ୟାଣ ପାଇଁ ତଥା ମହାମରୀ କରୋନା ଯେପରି ବିଶ୍ୱରୁ ଦୂରିଭୂତ ହେବ ସେଥିପାଇଁ ମନ୍ଦିରର ସେବାୟତମାନେ ମଣିବାବାଙ୍କୁ ଜଳାଭିଷେକ କରିବା ସହ ଘୃତଦୀପ ଜାଳିଛନ୍ତି। ଏପଟେ କରୋନା ସଚେତନତା ପାଇଁ ଜିଲା ପ୍ରଶାସନ ପକ୍ଷରୁ ମନ୍ଦିର ବେଢା ଚତୁଃପାର୍ଶ୍ବ, ବସଷ୍ଟାଣ୍ଡ, ନଦୀଘାଟ, ଗାଡି ପାର୍କିଂ ସ୍ଥଳ ସହ ମୁଖ୍ୟ ବଜାରରେ ବ୍ୟାନର ଲଗାଯାଇଛି। ବିଶେଷକରି ପର୍ଯ୍ୟଟନ କ୍ଷେତ୍ର ଆରଡିପୀଠକୁ ଆଗନ୍ତୁକ ପର୍ଯ୍ୟଟକ ଓ ଶ୍ରଦ୍ଧାଳୁ ଭକ୍ତ ନଆସିବା ପାଇଁ ଡାକବାଜି ଯନ୍ତ୍ର ଦ୍ୱାରା ମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଉଥିବା ବେଳେ ଆସନ୍ତା ଏପ୍ରିଲ ୧ଯାଏଁ ମନ୍ଦିର ବନ୍ଦ ରହିବ ବୋଲି ସମସ୍ତ ସର୍ବସାଧାରଙ୍କ ଅବଗତି ନିମନ୍ତେ ନଟକା ଜାରି କରାଯାଇଥିବା ମନ୍ଦିରଟ୍ରଷ୍ଟି ତଥା ଭଦ୍ରକ ଉପଜିଲାପାଳ ପିତାମ୍ବର ସାମଲ ପ୍ରକାଶ କରିଛନ୍ତି। ସେହିପରି ମଣିବାବାଙ୍କ ପୁଷ୍କରିଣୀରେ ସର୍ବସାଧାରଣଙ୍କ ସ୍ନାନଶୈାଚ ଉପରେ ରୋକ ଲଗାଇଛି ପ୍ରଶାସନ। ଏପରିକି ମହାମାରୀ କରୋନା ନିମନ୍ତେ ଲାଗିଥିବା ରୋକକୁ ନେଇ ସମଗ୍ର ଆରଡିପୀଠ ଶୁକ୍ରବାର ଜନଶୂନ୍ୟ ହୋଇପଡିଥିଲା। କାଁଭାଁ କେତେକ ଶ୍ରଦ୍ଧାଳୁ ଭକ୍ତ ମଣିବାବାଙ୍କ ଦର୍ଶନ ପାଇଁ ଆସିଥିଲେ ମଧ୍ୟ ମନ୍ଦିର ବନ୍ଦ ରହିଥିବାରୁ ଫେରିଯାଇଥିଲେ।
Popular Categories
Previous article
Next article