ଭୁବନେଶ୍ବର (ମହେଶ ଶର୍ମା) : ଅନୁଗୋଳର ସାତକୋଶିଆ ଏବଂ ମୟୂରଭଞ୍ଜର ସିମିଳିପାଳ ପରେ ଏବେ ନୂଆପଡାର ସୁନାବେଡାକୁ ବ୍ୟାଘ୍ର ସଂରକ୍ଷଣ ପ୍ରକଳ୍ପର ମାନ୍ୟତା ପ୍ରଦାନ କରାଯାଇଛି। ସୂଚନା ଅନୁସାରେ ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣ(ଏନଟିସିଏ) ଓଡ଼ିଶାର ସୁନାବେଡା ଅଭୟାରଣ୍ୟକୁ ବ୍ୟାଘ୍ର ସଂରକ୍ଷଣ ପ୍ରକଳ୍ପର ମାନ୍ୟତା ପ୍ରଦାନ କରିଛନ୍ତି। ଏଠାରେ ଏବେ ଜଙ୍ଗଲରେ ବାଘ ଗର୍ଜନ ଶୁଣିବାକୁ ମିଳିବ। ଏହା ହେଉଛି ଓଡ଼ିଶା ଏବଂ ଛତିଶଗଡ଼ର ସୀମାବର୍ତ୍ତୀ ଜଙ୍ଗଲ। ଏନଟିସିଏ ପକ୍ଷରୁ ବ୍ୟାଘ୍ର ସଂରକ୍ଷଣ ପ୍ରକଳ୍ପର ମାନ୍ୟତା ଦେବା ପରେ ସ୍ବୟଂ କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରୀ ପ୍ରକାଶ ଜାବଡେକର ରାଜ୍ୟସଭାରେ ଏକ ପ୍ରଶ୍ନର ଉତ୍ତରରେ କହିଛନ୍ତି।
ସୁନାବେଡା ଅଭୟାରଣ୍ୟକୁ ବ୍ୟାଘ୍ର ପ୍ରକଳ୍ପ ଭାବେ ଘେଷଣା କରିବା ପାଇଁ ଦୀର୍ଘ ଦିନରୁ ଦାବି ହୋଇ ଆସୁଥିଲା। ନିକଟରେ ପ୍ରକାଶ ପାଇଥିବା ବାଘ ଗଣନା ରିପୋର୍ଟକୁ ଦେଖିବା ତ, ସୁନାବେଡା ଅଭୟାରଣ୍ୟରେ ଗୋଟିଏ ମଧ୍ୟ ବାଘ ନାହାନ୍ତି। ତେବେ ଜିଲା ବନ ଅଧିକାରୀ କହିଛନ୍ତି ଏଠାରେ ୩୫ ରୁ ୪୦ ଚିତା ବାଘ ଦେଖିବାକୁ ମିଳିଛନ୍ତି। ଏହି ଆଧାରରେ ସୁନାବେଡାକୁ ସଂରକ୍ଷିତ ବ୍ୟାଘ୍ର ପ୍ରକଳ୍ପ ଭାବେ ଘୋଷଣା କରିବା ପାଇଁ ଓଡ଼ିଶା ସରକାର ଦାବି କରିଥିଲେ।
୨୦୧୬ ବାଘ ଗଣନାରେ ସମୟରେ ଏଠାରେ ୪ଟି ବାଘ ଥିବା ଜଣାପଡିଥିବା ବେଳେ ୨୦୧୮ରେ ଏଠାରେ ଗୋଟିଏ ହେଲେ ବାଘ ମିଳି ନ ଥିଲେ।
ତେବେ ଜଙ୍ଗଲ ସଚିବ ମୋନା ଶର୍ମା କହିଛନ୍ତି ଯେ ଏନଟିସିଏର ଅନୁମୋଦନ ମିଳିବା ପରେ ରାଜ୍ୟ ସରକାର ବ୍ୟାଘ୍ର ସଂରକ୍ଷଣ ପ୍ରକଳ୍ପ ନେଇ ଅଧିସୂଚନା ଜାରି କରିବେ। ଏହି ଅଭୟାରଣ୍ୟର କ୍ଷେତ୍ରଫଳ ହେଉଛି ୧୦୮୩ ବର୍ଗ କିଲୋମିଟର । ପରେ ଆନ୍ତରାଜ୍ୟ ବୈଠକ ଅନୁଷ୍ଠିତ ହୋଇ ବାଘମାନଙ୍କର ସୁରକ୍ଷିତ ସହାବସ୍ଥାନ ପାଇଁ ଯୋଜନା ପ୍ରସ୍ତୁତ କରାଯିବ।
