ନୂଆଦିଲ୍ଲୀ: ଭାରତୀୟ ରେଳ ବିଭାଗ ପକ୍ଷରୁ ମଙ୍ଗଳବାର ସାରା ଦେଶରେ ଚାଲୁଥିବା ୮ଶହରୁ ଅଧିକ ଟ୍ରେନକୁ ଆଂଶିକ ଏବଂ ସମ୍ପୂର୍ଣ୍ଣ ବାତିଲ କରାଯାଇଛି। ଏହି ଟ୍ରେନଗୁଡିକ ମଧ୍ୟରେ ଅନେକ ସଂଖ୍ୟାରେ ଯାତ୍ରୀବାହୀ ଟ୍ରେନ୍ ଏବଂ ସ୍ୱତନ୍ତ୍ର ଟ୍ରେନ୍ ରହିଛି। ସେହିପରି ଦିଲ୍ଲୀରୁ ବିହାର, ବଙ୍ଗଳା ଏବଂ ଉତ୍ତରପ୍ରଦେଶକୁ ଯାତ୍ରା କରୁଥିବା ଅନେକ ଟ୍ରେନ୍ ମଧ୍ୟ ବାତିଲ କରାଯାଇଛି। ଏହା ଦ୍ବାରା ସାଧାରଣ ଜନତା ସମସ୍ୟାର ସମ୍ମୁଖୀନ ହୋଇପାରନ୍ତି। ବାତିଲ ହୋଇଥିବା ଯାତ୍ରୀବାହୀ ଟ୍ରେନ ମଧ୍ୟରେ ସର୍ବାଧିକ ପଶ୍ଚିମବଙ୍ଗ ଏବଂ ଦକ୍ଷିଣ ଭାରତକୁ ସଂଯୋଗ କରୁଥିବା ଟ୍ରେନ୍ ରହିଛି।
ଭାରତୀୟ ରେଳ ଜାତୀୟ ଟ୍ରେନ୍ ଅନୁସନ୍ଧାନ ବ୍ୟବସ୍ଥାର ସୂଚନା ଅନୁଯାୟୀ, ମଙ୍ଗଳବାର ୮୨୭ ଟ୍ରେନ୍ ବାତିଲ କରାଯାଇଛି। ୫୭୧ ଟି ଟ୍ରେନକୁ ସମ୍ପୂର୍ଣ୍ଣ ଭାବେ ବାତିଲ୍ କରାଯାଇଥିବା ବେଳେ ୨୫୬ଟି ଟ୍ରେନକୁ ଆଂଶିକ ଭାବେ ବାତିଲ୍ କରାଯାଇଛି। ଆଂଶିକ ବାତିଲ ହୋଇଥିବା ଟ୍ରେନ୍ ଗୁଡିକ ପ୍ରସ୍ଥାନ ସ୍ଥାନରୁ ଛାଡିବା ପରେ ମଝିରେ କୌଣସି ଷ୍ଟେସନରେ ରହଣି କରିବ ନାହିଁ। ଅନେକ ଟ୍ରେନ୍ ଗନ୍ତବ୍ୟ ସ୍ଥଳ ପୂର୍ବରୁ ଅଟକିଯିବ।
ବାତିଲ ହୋଇଥିବା ଟ୍ରେନ୍ ଗୁଡିକ ମଧ୍ୟରେ ଅଧିକାଂଶ ଯାତ୍ରୀବାହୀ ଏବଂ ମେଲ୍ ଟ୍ରେନ୍ ରହିଛି। ସେହିପରି ଏକ୍ସପ୍ରେସ, ସୁପରଫାଷ୍ଟ, ହମସଫର, ସମ୍ପର୍କ କ୍ରାନ୍ତି ଏବଂ ଡବଲ୍ ଡେକର୍ ଭଳି କିଛି ଟ୍ରେନ୍ ମଧ୍ୟ ଅନ୍ତର୍ଭୁକ୍ତ ରହିଛି। ତାଲିକା ଅନୁଯାୟୀ କିଛି ଟ୍ରେନର ସମୟ ପରିବର୍ତ୍ତନ କରାଯାଇଛି ଏବଂ କିଛି ଟ୍ରେନର ରାସ୍ତା ବଦଳାଯାଇଛି।ଏପରି ପରିସ୍ଥିତିରେ ଯଦି ଆପଣ ମଙ୍ଗଳବାର ଯାତ୍ରା କରୁଛନ୍ତି, ତେବେ ପ୍ରଥମେ ରେଳବାଇ ଦ୍ୱାରା ଦିଆଯାଇଥିବା ତାଲିକା ଯାଞ୍ଚ କରନ୍ତୁ।
