ନୂଆଦିଲ୍ଲୀ : ଜାତୀୟ ନାଗରିକ ପଞ୍ଜୀକରଣ (ଏନଆରସି) ବ୍ୟବସ୍ଥାକୁ ଦେଶବ୍ୟାପୀ ଲାଗୁ କରାଯିବ ବୋଲି ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା କହିଛନ୍ତି। ହିନ୍ଦୁସ୍ତାନ ମିଡିଆ ଗ୍ରୁପ ପକ୍ଷରୁ ଆୟୋଜିତ ‘ପୂର୍ବୋଦୟ ହିନ୍ଦୁସ୍ତାନ’ କାର୍ଯ୍ୟକ୍ରମରେ ଯୋଗ ଦେଇ ଶାହା ବୁଧବାର ଏହା କହିଛନ୍ତି। ସେ କହିଛନ୍ତି ଯେ ଭାରତରେ ବେଆଇନ ଭାବେ ବସବାସ କରୁଥିବା ବିଦେଶୀ ନାଗରିକଙ୍କୁ ଠାବ କରିବା ଲାଗି ଏନଆରସିର ଆବଶ୍ୟକତା ରହିଛି। ଜଣେ ଭାରତୀୟ ଆମେରିକା, ବ୍ରିଟେନ, ରୁଷିଆରେ ବେଆଇନ ଭାବେ ରହିପାରିବ ନାହିଁ। ତେଣୁ ଅନ୍ୟ ଦେଶର ନାଗରିକ ଭାରତରେ ବେଆଇନ ଭାବେ କାହିଁକି ରହିବେ ବୋଲି ସେ ପ୍ରଶ୍ନ କରିବା ସହ ଏନଆରସିକୁ ଦେଶବ୍ୟାପୀ କାର୍ଯ୍ୟକାରୀ କରାଯିବାର ଆବଶ୍ୟକତା ରହିଥିବା କହିଛନ୍ତି। ଆସାମରେ ଏନଆରସି କାର୍ଯ୍ୟକାରୀ କରାଯାଇଛି। ଅଗଷ୍ଟ ୩୧ରେ ଏହାର ଚୂଡାନ୍ତ ତାଲିକା ପ୍ରକାଶ ପାଇଛି। ତେଣୁ ସାରା ଦେଶର ନାଗରିକଙ୍କ ତାଲିକା ପ୍ରସ୍ତୁତ ହେବା ଦରକାର।
