ଶ୍ରୀନଗର : ଜାମ୍ମୁ କାଶ୍ମୀରର ସୋପାରାରେ ବୁଧବାର ସୁରକ୍ଷା ବାହିନୀଙ୍କ ଗୁଳିରେ ଲସ୍କର-ଇ-ତୋଇବାର ସଦସ୍ୟ ତଥା କୁଖ୍ୟାତ ଆତଙ୍କବାଦୀ ଆସିଫ ନିହତ ହୋଇଛି।
ସୋପାରରେ ଜଣେ ଫଳ ବେପାରୀଙ୍କ ପରିବାରର ୩ ସଦସ୍ୟଙ୍କୁ ଗୁଳି ମାରିବା ଘଟଣାରେ ଆସିଫ ସମ୍ପୃକ୍ତ ଥିଲା। ଏଥିରେ ଜଣେ ଯୁବତୀ ଆସମା ଗୁରୁତର ହୋଇଥିଲା। ଏହାବାଦ ପ୍ରବାସୀ ଶ୍ରମିକ ଆଲମ ଉପରେ ମଧ୍ୟ ଆସିଫ ମରଣାନ୍ତକ ଆକ୍ରମଣ କରିଥିଲା। ସୂଚନା ଅନୁସାରେ ଏକ କାର ଯୋଗେ ଆସିଫ କେଉଁଆଡେ ଯାଉଥିବାବେଳେ ସୁରକ୍ଷା ବାହିନୀଙ୍କ ହାବୁଡ଼ରେ ପଡିଥିଲା। ଯାଞ୍ଚ ବେଳେ ସେ ଗାଡ଼ିକୁ ନଅଟକାଇ ସୁରକ୍ଷା କର୍ମୀଙ୍କ ଉପରକୁ ଗୁଳି ମାଡ଼ କରିଥିଲା। ସୁରକ୍ଷା କର୍ମୀଙ୍କ ଜବାବୀ କାର୍ଯ୍ୟାନୁଷ୍ଠାନରେ ଆସିଫ ନିହତ ହୋଇଛି। ଜାମ୍ମୁ କାଶ୍ମୀର ଡିଜିପି ଦିଲବାଗ ସିଂହ କହିଛନ୍ତି ଯେ ଆସିଫ ସୋପାରାରେ ଆତଙ୍କ ଖେଳାଇଥିଲା। ଗତ ମାସେ ହେବ ସେ ଏହି ଅଞ୍ଚଳରେ ସକ୍ରିୟ ଥିଲା ଓ ଲୋକଙ୍କୁ ଦୋକାନ ନଖୋଲିବା ପାଇଁ ଧମକ ଦେଉଥିଲା। ଅନେକ ଲୋକ ଓ ସୁରକ୍ଷା କର୍ମୀଙ୍କ ଉପରେ ଆକ୍ରମଣରେ ସମ୍ପୃକ୍ତ ଥିଲା। ଗୁଇନ୍ଦା ସୂଚନା ଆଧାରରେ ବୁଧବାର ସ୍ଥାନୀୟ ଅଞ୍ଚଳକ ଘେରାବନ୍ଦୀ କରି ତଲାସୀ ଅଭିଯାନ କରାଯାଇଥିଲା। ସେହି ସମୟରେ କାରରେ ଯାଉଥିବା ଆସିଫ ଚେକପୋଷ୍ଟରେ ନଅଟକି ସୁରକ୍ଷା କର୍ମୀଙ୍କ ଉପରକୁ ଗୁଳି ମାଡ଼ କରିଥିଲା। ସୁରକ୍ଷା କର୍ମୀଙ୍କ ପ୍ରତିଜବାବାରେ ସେ ନିହତ ହୋଇଛି।
