ସମ୍ଭଲ: ଉତ୍ତର ପ୍ରଦେଶର ବରେଇଲ୍ଲୀ ସ୍ଥିତ ଗୁରୁ ଅମରପତି ସ୍ମାରକୀ ସ୍ଥଳ ନିକଟରେ ମାଟି ତଳୁ ୪୦୦ ବର୍ଷ ପୁରୁଣା ବହୁ ସଂଖ୍ୟକ ମୁଦ୍ରା ମିଳିଥିବା ନେଇ ସମ୍ଭଲ ଜିଲା ପ୍ରଶାସନ ତରଫରୁ ସୂଚନା ଦିଆଯାଇଛି। ଜିଲାପାଳ ବନ୍ଦନା ମିଶ୍ର ସମ୍ବଲ ଜିଲା ଅନ୍ତର୍ଗତ ଆଲିପୁର ଗାଁକୁ ପରିଦର୍ଶନରେ ଯାଇଥିବା ବେଳେ ସେଠାକାର ବାସିନ୍ଦା ପୁରୁଣା ମୁଦ୍ରା ଓ ମାଟିପାତ୍ରର ଭଗ୍ନାବଶେଷ ତାଙ୍କୁ ପ୍ରଦାନ କରିଥିଲେ। ଗ୍ରାମବାସୀଙ୍କ କହିବାନୁଯାୟୀ ସେମାନେ ଦୀର୍ଘବର୍ଷ ହେବ ସୋଟ୍ ନଦୀ ନିକଟରେ ଘର କରି ରହି ଆସୁଛନ୍ତି।
କିଛିଦିନ ତଳେ ନଦୀଶଯ୍ୟାରୁ ସେମାନଙ୍କୁ ପୁରୁଣା ମୁଦ୍ରା, ମାଟିପାତ୍ରର ଭଗ୍ନାବଶେଷ ଆଦି ମିଳିଥିଲା। ସେଗୁଡ଼ିକୁ ସେମାନେ ନିଜ ପାଖରେ ରଖୁଥିଲେ। ଜିଲା ପ୍ରଶାସନର ସୂଚନାନୁଯାୟୀ ସେହି ମୁଦ୍ରା ମଧ୍ୟରେ ରାମ, ସୀତା, ଲକ୍ଷ୍ମଣଙ୍କ ଛବି ଥିବା ଏକ ମୁଦ୍ରା ରହିଛି। ଏଥିସହ ବ୍ରିଟିଶ ଶାସନ ସମୟରେ ପ୍ରଚଳିତ ଥିବା କେତେକ ମୁଦ୍ରା ମଧ୍ୟ ମିଳିଛି। ଏହି ଅଞ୍ଚଳରେ ଅଧିକ ଅନୁଧ୍ୟାନ କରାଗଲେ ଆହୁରି କେତେକ ଐତିହାସିକ ପଦାର୍ଥ ମିଳିବାର ସମ୍ଭାବନା ରହିଥିବା ଜନୈକ ଅଧିକାରୀ କହିଛନ୍ତି।
