ଡକାୟତି ଗ୍ୟାଙ୍ଗର ୪ ଅଭିଯୁକ୍ତ ଗିରଫ, ୩ ଚୋରା ବାଇକ ଜବତ

ଘଣ୍ଟାପଡା: ପୁଲିସକୁ ଚକମା ଦେଇ କଣ୍ଟାମାଳ ଥାନା ଅଂଚଳରେ ବିଭିନ୍ନ ଚୋରି, ଡକାୟତି ଓ ଲୁଟ ଘଟଣା ଘଟାଇ ଚାଲିଥିବା ଡକାୟତି ଗ୍ୟାଙ୍ଗର ୪ ଅଭିଯୁକ୍ତ ଧରାପଡ଼ିଛନ୍ତି। ସେମାନଙ୍କଠାରୁ ପୁଲିସ ୩ଟି ଚୋରା ବାଇକ ଓ କିଛି ପୋଷାକ ଜବତ କରିଛି। କଣ୍ଟାମାଳ ଥାନାଧିକାରୀ ଭାବାନନ୍ଦ ପ୍ରଧାନଙ୍କ ଉପସ୍ଥିତିରେ ଏସଡିପିଓ କୁଲଦୀପ ମିନା ଥାନା ପରିସରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଏ ନେଇ ସୂଚନା ଦେଇଛନ୍ତି।

ଗିରଫ ଅଭିଯୁକ୍ତମାନେ ହେଲେ କଣ୍ଟାମାଳ ଥାନା ତିଲେଇମାଲ ଗ୍ରାମର ରାଜୀବ ଓରଫ ଜୟକୃଷ୍ଣ ନାୟକ(୨୬), ଅଭିଳାଷ ପାଣ୍ଡେ(୨୨), ମନମୁଣ୍ଡା ଥାନା ବଘାର ଗ୍ରାମର ରାଜେନ୍ଦ୍ର ରାଜହଂସ(୨୮), କଣ୍ଟାମାଳ ଥାନା ବଡ଼ଚ୍ଛପାପାଲି ଗ୍ରାମର ବାବୁ ଓରଫ ପ୍ରଭାତ କୁମାର ସାହୁ(୧୯)। ରାଜୀବ, ଅଭିଳାସ ଏବଂ ରାଜେନ୍ଦ୍ର ଗତ ସେପ୍ଟେମ୍ବର ୪ରେ ତିଲେଇମାଲରେ ଘଟିଥିବା ଡକାୟତି ଘଟଣାରେ ସାମିଲ ଥିଲେ। ସେହିପରି ପ୍ରଭାତ ଗତ ଅଗଷ୍ଟ ୨୮ରେ ରେଙ୍ଗାଲି ପଞ୍ଚାୟତ ଅନ୍ତର୍ଗତ ତିଲେଇମାଲରେ ଘଟିଥିବା ଡକାୟତି ଘଟଣାରେ ସମ୍ପୃକ୍ତ ଥିଲେ। ଗ୍ୟାଙ୍ଗର ଅନ୍ୟ ଅଭିଯୁକ୍ତମାନଙ୍କୁ ଖୁବଶୀଘ୍ର ଗିରଫ କରାଯିବ ବୋଲି ପୁଲିସ କହିଛି।