କେନ୍ଦୁଝର ସଦର : ସୋମବାର କେନ୍ଦୁଝର ବନ୍ଦ। କେନ୍ଦୁଝର ଟ୍ରକ୍ ମାଲିକ ସଂଘ ବନ୍ଦ ପାଳନ କରୁଛି। ସକାଳୁ ସକାଳୁ କେନ୍ଦୁଝର ଷ୍ଟେସନରେ ଟ୍ରକ୍ ମାଲିକ ସଂଘର କର୍ମକର୍ତ୍ତାମାନେ ଆନ୍ଦୋଳନ କରୁଛନ୍ତି। କେନ୍ଦୁଝର ଶୁଆକାଠିସ୍ଥିତ ଓଏମସି ଗନ୍ଧମାର୍ଦ୍ଦନ ମାଇନ୍ସଠାରୁ ଗୁହାଳଡିହି ରେଲୱେ ସାଇଟିଂ ପର୍ଯ୍ୟନ୍ତ ରେଳ ଲାଇନ ପ୍ରକଳ୍ପକୁ ବିରୋଧ କରି ଟ୍ରକ ମାଲିକ ସଂଘ ଆନ୍ଦୋଳନକୁ ଓହ୍ଲାଇଛି। ସୋମବାର ସକାଳ ୬ ଟାରୁ ମଙ୍ଗଳବାର ସକାଳ ୬ ଟା ପର୍ଯ୍ୟନ୍ତ ୨୪ ଘଣ୍ଟିଆ କେନ୍ଦୁଝର ଜିଲ୍ଲା ବନ୍ଦ ପାଳନ କରାଯାଉଛି। ହେଲେ ଆମ୍ବୁଲାନ୍ସ,କ୍ଷୀର ଗାଡି,ଔଷଧ ଦୋକାନ ଆଦି ଜରୁରୀକାଳୀନ ସେବା କୁ ଏହି ବନ୍ଦ ରୁ ବାଦ ଦିଆଯାଇଛି । ସକାଳୁ ସକାଳୁ ଶହ ଶହ ଟ୍ରକ ମାଲିକ ମାନେ କେନ୍ଦୁଝରଗଡ ରେଳ ଷ୍ଟେସନ ଠାରେ ପିକେଟିଂ କରୁଥିବା ଦେଖିବାକୁ ମିଳିଛି। ସକାଳ ୬ ଟା ରେ ଛାଡ଼ିବାକୁ ଥିବା କେନ୍ଦୁଝରଗଡ- ଖୋର୍ଦ୍ଧା ରୋଡ଼ ପାସେଞ୍ଚର ଓ ମାଲବାହୀ ଟ୍ରେନ ଷ୍ଟେସନ ରେ ଟ୍ରକ ମାଲିକ ମାନେ ଅଟକ ରଖିଛନ୍ତି । ଜିଲା ଦେଇ ଯାଇଥିବା ୪୯ ଓ ୨୦ ନମ୍ବର ଜାତୀୟ ରାଜପଥ ର ବିଭିନ୍ନ ସ୍ଥାନରେ ଟ୍ରକ ମାଲିକ ମାନେ ପିକେଟିଂ କରୁଛନ୍ତି। ଫଳରେ ଏଥିରେ ଚଳାଚଳ କରୁଥିବା ଶହ ଶହ ସଂଖ୍ୟାରେ ଯାନ ବାହାନ ରାସ୍ତାରେ ଅଟକି ରହିଛି । ସହରର ସମସ୍ତ ଦୋକାନ ବଜାର , ପରିବା ବଜାର , ପେଟ୍ରୋଲ ପମ୍ପ , ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ ଆଦି ବନ୍ଦ ଥିବା ଦେଖିବାକୁ ମିଳିଛି । ସେପଟେ ଏହି ବନ୍ଦ କୁ ଘରୋଇ ବସ ସଂଘ ସମର୍ଥନ କରୁଥିବା ରୁ ଜିଲା ରେ ବସ ଚଳାଚଳ ସଂପୂର୍ଣ୍ଣ ବନ୍ଦ ରହିଛି ।
Comments are closed.