୩୩ବର୍ଷ ପୂର୍ବେ ‘ସୀତା’ ଜିତିଥିଲେ ନିର୍ବାଚନ; ଏବେ ହସ୍ତିନାପୁରରୁ ବିଜୟୀ ହେବେ କି ‘ରାମ’

ସମାଜ ଡିଜିଟାଲ ଡେସ୍କ: ଲୋକସଭା ନିର୍ବାଚନ ପାଇଁ ମାପିଚୁପି ପ୍ରାର୍ଥୀ ଚୟନ କରିଛି ବିଜେପି । କିଛି ପୁରୁଣା ନେତାଙ୍କ ଉପରେ ଦଳ ଭରସା କରିଥିବା ବେଳେ ଅନେକ ସ୍ଥାନରେ ନୂଆ ଚେହେରାଙ୍କ ଉପରେ ଭରସା କରି ସୁଯୋଗ ଦେଇଛି । ତାଲିକାରେ ରାଜନେତା, ଚଳଚ୍ଚିତ୍ର ଅଭିନେତା ଏବଂ ଟିଭି ଦୁନିଆର ଜଣାଶୁଣା କଳାକାର ସାମିଲ ହୋଇଛନ୍ତି । କଙ୍ଗନା ରାଣାୱତ ହିମାଚଳ ଏବଂ ଅରୁଣ ଗୋଭିଲ ବିଜେପିରୁ ଟିକେଟ ପାଇଁ ପ୍ରଥମ ଥର ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ଯାଉଛନ୍ତି । ଏହାପୂର୍ବରୁ ସୀତା ଭୂମିକାରେ ଅଭିନୟ କରିଥିବା ଦୀପିକା ଚିଖାଲିୟା ନିର୍ବାଚନ ଲଢିଥିଲେ । ସେତେବେଳେ ଜନସାଧାରଣ ତାଙ୍କ ଉପରେ ଭରସାକରି ଜିତାଇଥିଲେ । ବର୍ତ୍ତମାନ ଦେଖିବାକୁ ବାକି ରହିଲା ସୀତାଙ୍କ ପରି କଣ ରାମ ଅର୍ଥାତ ଅରୁଣ ଗୋଭିଲଙ୍କ ଉପରେ ଜନତା ସୁନା କଳସ ଢାଳିବେ ।
ରାମଙ୍କୁ ବିଜେପିରୁ ଟିକେଟ:
ଲୋକସଭା ନିର୍ବାଚନ ପାଇଁ ବିଜେପି ତାଲିକାରେ ସାମିଲ ହୋଇଛନ୍ତି ଲୋକପ୍ରିୟ ଧାରାବାହିକ ରାମାୟଣରେ ରାମ ଭୂମିକାରେ ଅଭିନୟ କରିଥିବା ଖ୍ୟାତାନାମା ଅଭିନେତା ଅରୁଣ ଗୋଭିଲ । ଅରୁଣଙ୍କୁ ଉତ୍ତରପ୍ରଦେଶର ମିରଟରୁ ପ୍ରାର୍ଥୀ କରିଛି ବିଜେପି । ଅରୁଣ ଗୋଭିଲ ଜାନୁଆରୀରେ ଅଯୋଧ୍ୟାରେ ରାମ ମନ୍ଦିର ପ୍ରତିଷ୍ଠା ସମାରୋହରେ ଯୋଗ ଦେଇଥିଲେ । ନିକଟରେ ଅନୁରାଧା ପୌଡୱାଲଙ୍କ ସହ ଅରୁଣ ମଧ୍ୟ ବିଜେପିରେ ସାମିଲ ହୋଇଥିଲେ । ମିରଟରୁ ବିଜେପି ସାଂସଦ ରାଜେନ୍ଦ୍ର ଅଗ୍ରୱାଲଙ୍କ ସ୍ଥାନରେ ଅରୁଣଙ୍କୁ ଟିକେଟ ଦେଇଛି ଦଳ ।

୩୩ ବର୍ଷ ପୂର୍ବେ ସୀତା (ଦୀପିକା ଚିଖାଲିୟା) ନିର୍ବାଚନ ଜିତିଥିଲେ: 
ଅରୁଣ ଗୋଭିଲଙ୍କୁ ବିଜେପିରୁ ଟିକେଟ ମିଳିବା ପରେ ସୀତା ଭୂମିକାରେ ଅଭିନୟ କରିଥିବା ଦୀପିକା ଚିଖାଲିୟା ମଧ୍ୟ ଚର୍ଚ୍ଚାରେ ରହିଛନ୍ତି । ସୀତାଙ୍କ ଚରିତ୍ରରେ ସେ ଅଭିନୟ କରି ଖୁବ ଲୋକପ୍ରିୟତା ହାସଲ କରିଥିଲେ । ୧୯୯୧ରେ ରାଜନୀତିରେ ପ୍ରବେଶ କରିଥିଲେ ଦୀପିକା । ବିଜେପିରୁ ଟିକେଟ ପାଇ ବଡୋଦା ସଂସଦୀୟ କ୍ଷେତ୍ରରୁ ନିର୍ବାଚନ ଲଢିଥିଲେ । ପରେ ସେ ନିଜ ଝିଅର ଯତ୍ନ ନେବା ପାଇଁ ରାଜନୀତି ଛାଡିଥିଲେ । ଏକ ସାକ୍ଷାତକାରରେ ଦୀପିକା କହିଥିଲେ ଯେ ଅନେକ ଦଳରୁ ସୁଯୋଗ ମିଳିବା ପରେ ସେ ବିଜେପିରେ ମିଶିଥିଲେ । କାରଣ ତାଙ୍କ ଜେଜେବାପା ଆରଏସଏସର କର୍ମୀ ଭାବେ କାମ କରୁଥିଲେ ।

ରାବଣ ମଧ୍ୟ ବିଜୟ ହୋଇଥିଲେ:
ରାମାନନ୍ଦ ସାଗରଙ୍କ ରାମାୟଣରେ ରାବଣ ଭୂମିକାରେ ଅଭିନୟ କରିଥିବା ଅରବିନ୍ଦ ତିୱାରୀ ନିର୍ବାଚନ ଲଢି ବିଜୟୀ ହୋଇଥିଲେ । ଗୁଜରାଟର ସାବରକାନ୍ତ ଲୋକସଭା ନିର୍ବାଚନମଣ୍ଡଳୀରୁ ବିଜେପିରୁ ଟିକେଟ ପାଇଁ ଲଢି ଜିତିଥିଲେ । ୧୯୯୧ ନିର୍ବାଚନରେ ସେ ଜନସାଧାରଣଙ୍କ ଠାରୁ ବହୁତ ଭଲ ପାଇବା ପାଇଥିଲେ । ୧୯୯୧ରୁ ୧୯୯୬ ପର୍ଯ୍ୟନ୍ତ ସଂସଦର ସଦସ୍ୟ ଭାବେ କାର୍ଯ୍ୟ କରିଥିଲେ ।

୨୪ ନିର୍ବାଚନରେ ଅରୁଣ ଗୋଭିଲ ବିଜୟ ହେବେ କି?
୩୩ ବର୍ଷ ପୂର୍ବେ ଯେତେବେଳେ ରାମାୟଣ ଧାରାବାହିକର ସୀତା ଦୀପିକା ଚିଖାଲିୟା ଏବଂ ରାବଣ ଅରବିନ୍ଦ ତିୱାରୀ ରାଜନୀତିରେ ପ୍ରବେଶ କରି ଲୋକଙ୍କ ଭଲ ପାଇବା ପାଇ ଜିତିଥିଲେ । ବର୍ତ୍ତମାନ ରାମ ଅର୍ଥାତ୍‍ ଅରୁଣ ଗୋଭିଲ୍‍ ମିରଟରୁ ନିର୍ବାଚନ ଲଢିବାକୁ ଯାଉଛନ୍ତି । ଏଠାରେ କହିରଖୁ ମିରଟକୁ ହସ୍ତିନାପୁର ମଧ୍ୟ କୁହାଯାଏ । ମିରଟ ଆସନ ବିଜେପି ପାଇଁ ସର୍ବଦା ବିଜୟ କ୍ଷେତ୍ର ସାବ୍ୟସ୍ତ ହୋଇଆସିଛି । ଏଠାରୁ ବିଜେପି କ୍ରମାଗତ ୩ଥର ଲୋକସଭା ଆସନରେ ବିଜୟୀ ହୋଇଛି । ବର୍ତ୍ତମାନ ଜନସାଧାରଣ ଅରୁଣଙ୍କ ଉପରେ ଆସ୍ଥା ପ୍ରକଟ କରି ଜିତାଇବେ କି ନାହିଁ ତାହା ଉପରେ ସମସ୍ତଙ୍କ ନଜର ରହିଛି ।