ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ୧୯ ମେ ୨୦୨୩ରେ ୨ହଜାର ଟଙ୍କା ନୋଟ୍କୁ ସଞ୍ଚାଳନରୁ ବାହାର କରିଥିବା ଘୋଷଣା କରିଥିଲେ। ଏହା ପରେ ଏହି ନୋଟ୍ ଗୁଡିକୁ ସାରା ଦେଶରେ ଥିବା ବ୍ୟାଙ୍କମାନଙ୍କରେ ବଦଳାଇବାକୁ ବ୍ୟବସ୍ଥା କରିଥିଲେ। ନୋଟ୍ର ସମ୍ପୂର୍ଣ୍ଣ ପ୍ରତ୍ୟାହାର ଲାଗି ୩୦ ସେପ୍ଚେମ୍ବର ୨୦୨୩ ଧାର୍ଯ୍ୟ ହୋଇଛି। ଆରବିଆଇ ଫେରସ୍ତ ଆସି ସାରିଥିବା ୨ହଜାର ଟଙ୍କା ନୋଟ୍ର ତଥ୍ୟ ଜାରି କରିଛି। ଏଥିରେ ୩୧ ଜୁଲାଇ ୨୦୨୩ ସୁଦ୍ଧା ବଜାରରୁ ୩.୧୪ଲକ୍ଷ କୋଟି ଟଙ୍କା ମୂଲ୍ୟର ଦୁଇ ହଜାର ଟଙ୍କିଆ ନୋଟ୍ ବ୍ୟାଙ୍କକୁ ଫେରିସାରିଥିବା କହିଛନ୍ତି। ୧୯ ମେ ୨୦୨୩ ଠାରୁ ଏ ପର୍ଯ୍ୟନ୍ତ ୮୮ ପ୍ରତିଶତ ୨ ହଜାର ଟଙ୍କା ନୋଟ୍ ଫେରସ୍ତ ଆସି ସାରିଛି, ଯାହାର ମୋଟ ମୂଲ୍ୟ ୩.୧୪ ଲକ୍ଷ କୋଟି ଟଙ୍କା ହେବ।
ଏବେ ବଜାରରେ ୦.୪୨ କୋଟି ଟଙ୍କାର ନୋଟ୍ ଅଛି। ଜୁନ୍ରେ ବଜାରରୁ ୨.୭୨ କୋଟି ଟଙ୍କା ମୂଲ୍ୟର ୨ ହଜାର ଟଙ୍କା ନୋଟ୍ ବ୍ୟାଙ୍କକୁ ଫେରିସାରିଥିଲା। ବଳକା ୮୪ ହଜାର କୋଟି ଟଙ୍କାର ନୋଟ୍ ଲୋକଙ୍କ ପାଖରେ ଥିଲା। ତେବେ ମାସକରେ ଏହାର ଅଧା ନୋଟ୍ ଏବେ ବଜାରରେ ଅଛି। ଏବେ ବି ଲୋକଙ୍କ ପାଖରେ ୪୨ ହଜାର କୋଟି ଟଙ୍କାର ୨ ହଜାର ଟଙ୍କା ନୋଟ୍ ମହଜୁଦ ଅଛି। ଯଦି ଏହାକୁ ବଣ୍ଡଲ ହିସାବରେ ଦେଖାଯାଏ; ତେବେ ଲୋକଙ୍କ ପାଖରେ ଏବେ ବି ୨୧ ଲକ୍ଷ ବଣ୍ଡଲ ୨ ହଜାର ଟଙ୍କା ନୋଟ୍ ଅଛି। ଗୋଟିଏ ବଣ୍ଡଲରେ ୧୦୦ଟି ନୋଟ୍ ଥାଏ। ୩୧ ମାର୍ଚ୍ଚ ୨୦୨୩ ସୁଦ୍ଧା ଦେଶରେ ପାଖାପାଖି ୩.୫୬ ଲକ୍ଷ କୋଟି ଟଙ୍କା ମୂଲ୍ୟର ୨ ହଜାର ଟଙ୍କା ନୋଟ୍ ଥିଲା। ଏଥିରେୁ ୩୧ ଜୁଲାଇ ସୁଦ୍ଧା ବଜାରରୁ ୩.୧୪ ଲକ୍ଷ ଟଙ୍କା ମୂଲ୍ୟର ନୋଟ୍ ଫେରସ୍ତ ଆସି ସାରିଛି। ୨ହଜାର ଟଙ୍କା ନୋଟ୍କୁ ପ୍ରଚଳନରୁ ବାହାର କରାଯାଉଥିବା ନେଇ ଆରବିଆଇଙ୍କ ଘୋଷଣା ପରେ ନୂଆନୂଆ ବ୍ୟାଙ୍କରେ ଟଙ୍କା ବଦଳାଇବା ପାଇଁ ଲୋକଙ୍କ ଭିଡ ଜମିଥିଲା। ହେଲେ ସମୟ ସହ ଏବେ ଭିଡ କମି ଯାଇଥିବା ବେଳେ ଦିନକୁ ଜଣେ ଦୁଇ ଜଣ ବ୍ୟାଙ୍କକୁ ନୋଟ୍ ବଦଳାଇବାକୁ ଆସୁଥିବା ଦେଖାଯାଉଛି। ବ୍ୟାଙ୍କ ଛଡା ଆରବିଆଇ ୧୯ କ୍ଷେତ୍ରୀୟ କାର୍ଯ୍ୟାଳୟରେ ମଧ୍ୟ ଲୋକଙ୍କୁ ୨ ହଜାର ଟଙ୍କା ନୋଟ୍ ବଦଳାଇବାର ସୁବିଧା ଦେଇଥିଲେ। ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଲୋକଙ୍କୁ ନିର୍ଦ୍ଧାରିତ ସମୟ ମଧ୍ୟରେ ବ୍ୟାଙ୍କରୁ ଟଙ୍କା ବଦଳାଇ ନେବାକୁ ନିବେଦନ କରିଥିଲେ। କେନ୍ଦ୍ରୀୟ ବ୍ୟାଙ୍କଙ୍କ ନିବେଦନ ସଫଳ ହୋଇଥିବା ଏବେ ଦେଖାଯାଉଛି। ଏ ପର୍ଯ୍ୟନ୍ତ ୮୮ ପ୍ରତିଶତ ନୋଟ୍ ଆରବିଆଇଙ୍କ ନିକଟକୁ ଫେରି ଯାଇଛି।
