କୃଷି ଆଇନକୁ ୧୦ କୃଷକ ସଂଗଠନର ସମର୍ଥନ, କୃଷି ମନ୍ତ୍ରୀଙ୍କୁ ଭେଟିଲେ

ନୂଆଦିଲ୍ଲୀ: କେନ୍ଦ୍ର ସରକାର ଆଣିଥିବା ୩ଟି ନୂଆ କୃଷି ଆଇନ ବିରୋଧରେ ଦେଶବ୍ୟାପୀ ଚାଲିଥିବା ଚାଷୀ ଆନ୍ଦୋଳନ ସୋମବାର ୧୯ ଦିନରେ ପହଞ୍ଚିଛି। ଆଜି ଦେଶବ୍ୟାପୀ ଜିଲା ମୁଖ୍ୟାଳୟରେ ଚାଷୀମାନେ ବିକ୍ଷୋଭ କରୁଛନ୍ତି। ଏପରି ସ୍ଥିତିରେ ୧୦ଟି କୃଷକ ସଂଗଠନ ସରକାରଙ୍କ କୃଷି ଆଇନକୁ ସମର୍ଥନ ଜଣାଇଛନ୍ତି। ସେମାନେ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂହ ତୋମାରଙ୍କୁ ଭେଟି ନିଜର ସମର୍ଥନ ଜଣାଇଛନ୍ତି।

10 organisations from various states like Uttar Pradesh, Kerala, Tamil Nadu, Telangana, Bihar and Haryana, associated with All India Kisan Coordination committee, are meeting Union Agriculture Minister Narendra Singh Tomar, to extend their support on 3 Farm Bills. pic.twitter.com/FMnzpoO2c1

— ANI (@ANI) December 14, 2020

କୃଷି ଆଇନକୁ ସମର୍ଥନ କରିଥିବା ୧୦ ସଂଗଠନ ହେଉଛନ୍ତି ଉତ୍ତର ପ୍ରଦେଶ, କେରଳ, ତାମିଲନାଡୁ, ତେଲେଙ୍ଗାନା, ବିହାର ଏବଂ ହରିୟାଣା ରାଜ୍ୟର। ଏସବୁ ସଂଗଠନ ସର୍ବଭାରତୀୟ ସମନ୍ବୟ କମିଟି ସହିତ ଜଡ଼ିତ ରହିଛନ୍ତି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କୃଷି ଆଇନ ସପକ୍ଷରେ ମନ୍ତବ୍ୟ ଦେଇ କହିଛନ୍ତି, କୃଷି ଏପରି ଏକ କ୍ଷେତ୍ର, ଯାହା କରୋନାର ଖରାପ ପ୍ରଭାବରୁ ରକ୍ଷା ପାଇଥିଲା। ଆମର ଭଲ ଅମଳ ହୋଇଛି ଏବଂ ଗୋଦାମ ଶସ୍ୟରେ ପରିପୂର୍ଣ୍ଣ ରହିଛି। ଆମର କୃଷି କ୍ଷେତ୍ର ବିରୋଧରେ କୌଣସି ପଦକ୍ଷେପ ନେବା କଥା କେହି ଚିନ୍ତା କରିପାରିବ ନାହିଁ | ସମସ୍ତ କୃଷି ସଂସ୍କାର କୃଷକଙ୍କ ସ୍ୱାର୍ଥରେ ରହିଛି ବୋଲି ସିଂହ କହିଛନ୍ତି।

ସୂଚନାଯୋଗ୍ୟ, ୩ଟି ଯାକ ନୂଆ କୃଷି ଆଇନ ବିରୋଧରେ କୃଷକମାନେ ଆନ୍ଦୋଳନ ଜାରି ରଖିଛନ୍ତି। ଆଇନଗୁଡ଼ିକୁ କେନ୍ଦ୍ର ସରକାର ପ୍ରତ୍ୟାହାର କରିବା ଦାବି କରି ଚାଷୀମାନେ ଦିଲ୍ଲୀ ସୀମାରେ ଏକାଠି ହୋଇ ଅହୋରାତ୍ର ଧାରଣା ଚଳାଇଛନ୍ତି। ପ୍ରବଳ ବିରୋଧ ପରେ କେନ୍ଦ୍ର ସରକାର ଆଇନରେ ପରିବର୍ତ୍ତନ କରିବାକୁ ପ୍ରସ୍ତାବ ଦେଇଥିଲେ। କିନ୍ତୁ ଚାଷୀ ସଂଗଠନଗୁଡ଼ିକର ପ୍ରତିନିଧିମାନେ ଏହାକୁ ପ୍ରତ୍ୟାଖ୍ୟାନ କରିଦେଇଛନ୍ତି। ଆଇନ ପ୍ରତ୍ୟାହାର ଦାବିରେ ଅଟଳ ରହିଛନ୍ତି।