କଟକ: ଅନ୍ତର୍ଜାତୀୟ ଖ୍ୟାତିସମ୍ପନ୍ନ ସାହିତ୍ୟିକ ମନୋଜ ଦାସଙ୍କ ସଦ୍ୟତମ ଉପନ୍ୟାସ ‘ଶେଷ ତାନ୍ତ୍ରିକର ସନ୍ଧାନରେ’ ଉନ୍ମୋଚିତ ହୋଇଯାଇଛି। ଜଗନ୍ନାଥ ରଥ ପ୍ରକାଶନ ସଂସ୍ଥା ପକ୍ଷରୁ ଶୁଭାନ୍ବେଷ ରଥ ଲେଖକଙ୍କୁ ତାଙ୍କ ପୁଡ଼ୁଚେରି ବାସଭବନରେ ଏକ ନିରାଡମ୍ବର ପରିବେଶରେ ପ୍ରଥମ କପି ପ୍ରଦାନ କରିଥିଲେ। ଉପସ୍ଥିତ ସୁହୃଦ୍ ତଥା ମନୋଜ ସାହିତ୍ୟପ୍ରେମୀ ଲୋକାର୍ପିତ ଉପନ୍ୟାସର ଅଧ୍ୟାତ୍ମ, ଅଲୌକିକ ଅନ୍ବେଷା ଓ ସୃଜନାତ୍ମକତା ଓଡ଼ିଆ ସାହିତ୍ୟକୁ ନୂଆ ମାର୍ଗଦର୍ଶନ କରିବା ସହିତ ବାଣୀଭଣ୍ଡାରକୁ ସମୃଦ୍ଧ କରିବ ବୋଲି ମତପ୍ରକାଶ କରିଥିଲେ। ଉଲ୍ଲେଖଯୋଗ୍ୟ ଯେ ଏହି ଉପନ୍ୟାସ ପୁସ୍ତକାଳୟମାନଙ୍କରେ ଉପଲବ୍ଧ ହେବା ପୂର୍ବରୁ ପାଞ୍ଚଶହ କପି ଅଗ୍ରିମ ବିକ୍ରି ହୋଇଛି। କୌଣସି ଓଡ଼ିଆ ସାହିତ୍ୟିକଙ୍କ ପୁସ୍ତକ ଲୋକାର୍ପିତ ହେବା ପୂର୍ବରୁ ଏପରି ବିକ୍ରି ଏବଂ ପାଠକୀୟ ଚାହିଦା ବୃଦ୍ଧି ପାଇବା ଓଡ଼ିଆ ସାହିତ୍ୟ ଇତିହାସରେ ପ୍ରଥମ ଥର ପାଇଁ ଘଟିଛି।
