ଚେନ୍ନଇ: କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ କେନ୍ଦ୍ରର ବିଜେପି ନେତୃତ୍ବ ଏନଡିଏ ସରକାରକୁ ତୀବ୍ର ସମାଲୋଚନା କରିଛନ୍ତି। ରବିବାର ଏଠାରେ ଏକ ସାଧାରଣ ସଭାକୁ ସମ୍ବୋଧନ କରି ରାହୁଲ କହିଛନ୍ତି ଯେ ବିଜେପି ନେତୃତ୍ବ ଏନଡିଏ ସରକାରର ଗୋଟିଏ ଉଦ୍ଦେଶ୍ୟ ହେଉଛି ଦେଶକୁ ଶାସନ କରିବା। ଏଥିପାଇଁ ବିଜେପି ଦେଶର ସମସ୍ତ ସାମ୍ବିଧାନିକ ଅନୁଷ୍ଠାନକୁ କରାୟତ କରିବାକୁ ଚେଷ୍ଟା ଚଳାଇଛି; ମାତ୍ର ବିଜେପିର ଏପରି ଚେଷ୍ଟାକୁ କଂଗ୍ରେସ କେବେହେଲେ ସଫଳ ହେବାକୁ ଦେବ ନାହିଁ। ଦେଶର ସଂସ୍କୃତି, ସଭ୍ୟତା ଓ ଅନୁଷ୍ଠାନକୁ କୌଣସି ପରିସ୍ଥିତିରେ ନଷ୍ଟ ହେବାକୁ ଦିଆଯିବ ନାହିଁ। ଏଥିପାଇଁ କଂଗ୍ରେସ ଏହାର ସମଭାବାପନ୍ନ ଦଳ ସହିତ ମିଶି ଲଢେଇ କରିବ ବୋଲି ରାହୁଲ କହିଛନ୍ତି। ଡିଏମକେର ପୂର୍ବତନ ନେତା କରୁଣାନିଧିଙ୍କ ପ୍ରତିମୂର୍ତ୍ତି ଉନ୍ମୋଚନ ଉତ୍ସବରେ ଯୋଗ ଦେବା ଅବସରରେ ରାହୁଲ କଂଗ୍ରେସର ସହଯୋଗୀ ଡିଏମକେ ପକ୍ଷରୁ ଆୟୋଜିତ ସାଧାରଣ ସଭାରେ ଉଦବୋଧନ ଦେଇ ବିଜେପିକୁ ଏପରି ସମାଲୋଚନା କରିଥିଲେ।
