ଦିଗପହଣ୍ଡି: ଆନ୍ଧ୍ରକୁ ଧାନ ଚାଲାଣ ବେଳେ ଆଜି ପ୍ରଶାସନ ଚଢ଼ଉ କରି ୩୩୦ କ୍ୱିଣ୍ଟାଲ ଧାନବସ୍ତା ଜବତ କରିଛି।
ଚାଷୀ ଧାନ ଅମଳ କରି ଖଳାରେ ସାଇତି ରଖିଥବା ବେଳେ ଦିଗପହଣ୍ଡି ବ୍ଲକ୍ରେ ମଣ୍ଡି ଖୋଲାଯାଇଥିବାରୁ ଚାଷୀ ଶାଗମାଛ ଦରରେ ଆନ୍ଧ୍ର ବେପାରୀଙ୍କୁ ବିକୁଥିବା ଖବର ‘ସମାଜ’ରେ ବିସ୍ତୃତ ଖବର ପ୍ରକାଶ ପାଇଥିଲା। ଏହାକୁ ନେଇ ପ୍ରଶାସନିକ ତତ୍ପରତା ପ୍ରକାଶ ପାଇଥିଲା। ଏଥିପ୍ରତି ସଜାଗ ରହିଥିଲା ପ୍ରଶାସନ। ଆଜି ୩ଟି ଟ୍ରକ୍ ଓ ୨ଟି ଭ୍ୟାନରେ ୩୩୦ କ୍ୱିଣ୍ଟାଲ ଧାନବସ୍ତା ବୋଝେଇ ହୋଇ ଆନ୍ଧ୍ରପ୍ରଦେଶକୁ ଚାଲାଣ ପୂର୍ବରୁ ପ୍ରଶାସନ ଚଢ଼ଉ କରି ଜବତ କରିଛି। ବେପାରୀଙ୍କ ଠାରୁ ୧୪ହଜାର ୮୪୮ ଟଙ୍କାର ରାଜସ୍ୱ ଆଦାୟ କରାଯାଇଛି। ଟିକସ ଆଦାୟ ପରେ ଧାନବସ୍ତା ବୋଝେଇ ଟ୍ରକ୍ ଓ ଭ୍ୟାନ୍କୁ ଛଡ଼ା ଯାଇଥିଲା। ପ୍ରଶାସନର ଅଜଣାତରେ ଆନ୍ଧ୍ର ବେପାରୀ ଟିକସ ଫାଙ୍କି ଚୋରା ଚାଲାଣ କଲେ ଆଗାମୀ ଦିନରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରଶାସନ ପକ୍ଷରୁ ଚେତାବନୀ ଦିଆଯାଇଛି। ଏହି ଚଢ଼ଉରେ ତହସିଲଦାର ଅଦ୍ୱୈତ କୁମାର ସ୍ୱାଇଁଙ୍କ ସମେତ ଦିଗପହଣ୍ଡି ବଜାର ନିୟନ୍ତ୍ରିତ କମିଟି କର୍ମକର୍ତ୍ତା ଅରୁଣକୁମାର ମିଶ୍ର, ସଂଗ୍ରାମଜିତ୍ ପାଳ, ଶରତ ମଳିକ, ନୟନଚାନ୍ଦ ପଟ୍ଟନାୟକ,
ଶଙ୍କରପ୍ରସାଦ ଗୌଡ଼ ପ୍ରମୁଖ ଉପସ୍ଥିତ ଥିଲେ। ପ୍ରଶାସନର ଏଭଳି ଚଢ଼ଉ ଧାନ କିଣିବାକୁ ଜିଲାରେ ଡ଼େରା ପକାଇଥିବା ଆନ୍ଧ୍ର ବେପାରୀଙ୍କ ଚିନ୍ତା ବଢ଼ିଯାଇଛି। ଅନ୍ୟପଟେ ଶୀଘ୍ର ଦିଗପହଣ୍ଡି ବ୍ଲକ୍ରେ ଧାନମଣ୍ଡି ଖୋଲିବାକୁ ସିପିଏମ୍ ଜିଲା ସଂପାଦକ କୈଳାସ ଷଡ଼ଙ୍ଗୀ ଏବଂ କୃଷକ ଶ୍ରମିକ ନେତା ଅଶ୍ୱିନୀ ଦାସ ଦାବି କରିଛନ୍ତି।
