ଓଡ଼ିଶା ଉପକୂଳ ଅତିକ୍ରମ କଲା ଡାଏ

ଭୁବନେଶ୍ୱର: ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟ ଝଡ଼ ‘ଡାଏ’ ଗୁରୁବାର ମଧ୍ୟରାତ୍ରିରେ ଓଡ଼ିଶା ଉପକୂଳ ଅତିକ୍ରମ କରିଛି। ଏହାର ପ୍ରଭାବରେ ସେଭଳି କିଛି କ୍ଷୟକ୍ଷତି ହୋଇ ନଥିଲେ ମଧ୍ୟ ରାଜ୍ୟର ବିଭିନ୍ନ ସ୍ଥାନରେ ପ୍ରବଳ ବର୍ଷା ହୋଇଛି। ସ୍ଥଳ ଭାଗ ଛୁଇଁବା ପରେ ଡାଏ ଦୁର୍ବଳ ହେବାରୁ ସେତେଟା କ୍ଷୟକ୍ଷତି ହୋଇନାହିଁ। କିନ୍ତୁ ବିଭିନ୍ନ ସ୍ଥାନରେ ପ୍ରବଳ ବର୍ଷା ଯୋଗୁଁ ରାଜ୍ୟର ବିଭିନ୍ନ ନଦୀରେ ଜଳପତ୍ତନ ବୃଦ୍ଧି ପାଇଛି।
ପାଣିପାଗ ବିଭାଗର ସୂଚନା ଅନୁଯାୟୀ, ଅବପାତ ଗତ ୬ ଘଣ୍ଟା ଭିତରେ ଉତ୍ତର ପଶ୍ଚିମ ଦିଗରେ ଗତି କରି ଛତିଶଗଡ଼ ମୁହାଁ ହୋଇଛି। ଆଜି ସକାଳ ୮ଟା ବେଳେ ‘ଡାଏ’ ଓଡ଼ିଶାର ଟିଟିଲାଗଡ଼ଠାରୁ ୮୦ କିମି ଦୂର ପୂର୍ବ ଓ ଦକ୍ଷିଣପୂର୍ବ ଛତିଶଗଡ଼ର ଅଞ୍ଚଳରେ କେନ୍ଦ୍ରୀଭୂତ ହୋଇଛି। ଆସନ୍ତା ୧୨ ଘଣ୍ଟା ମଧ୍ୟରେ ଏହା ଉତ୍ତରପଶ୍ଚିମ ଦିଗରେ ଗତି କରି ଦୁର୍ବଳ ହୋଇଯିବ।
‘ଡାଏ’ ପ୍ରଭାବରେ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ହୋଇଛି। ଏହାଫଳରେ କୋଲାବ ଜଳଭଣଣ୍ଡାର ଜଳସ୍ତର ବଢ଼ିଛି। ତେଣୁ ଆଜି ସକାଳୁ ଜଳଭଣ୍ଡାରର ଦୁଇଟି ଗେଟ୍‍ ଖୋଲି ଦିଆଯାଇଛି। ସେହିପରି ବାଲେଶ୍ୱର ଜିଲାର ମଥାନିଠାରେ ଜଳକା ନଦୀ ବିପଦସଙ୍କେତ ଉପରେ ପ୍ରବାହିତ ହେଉଥିବା ବେଳେ ବୈତରଣୀ ନଦୀ ଆଖୁଆପଡ଼ଠାରେ ବିପଦସଙ୍କେତର ସାମାନ୍ୟ ତଳେ ପ୍ରବାହିତ ହେଉଛି।