ନୂଆଦିଲ୍ଲୀ: ବିଶିଷ୍ଟ ଗାନ୍ଧିବାଦୀ ନେତା ତଥା ସମାଜସେବୀ ଅନ୍ନା ହଜାରେ ଶୁକ୍ରବାରଠାରୁ ସ୍ଥାନୀୟ ରାମଲୀଳା ଗ୍ରାଉଣ୍ଡରେ ଅନଶନ ଆରମ୍ଭ କରିବାକୁ ଯାଉଛନ୍ତି। ଏଥିପାଇଁ ଗୁରୁବାର ଦିଲ୍ଲୀ ପୁଲିସ ଅନ୍ନାଙ୍କୁ ଅନୁମତି ପ୍ରଦାନ କରିଛି। ରାମଲୀଳା ଗ୍ରାଉଣ୍ଡକୁ ଯାଞ୍ଚ କରାଯିବା ସହ ଅନ୍ନାଙ୍କ ନିରାପତ୍ତା ସମ୍ପର୍କରେ ନିଶ୍ଚିତ ହେବାପରେ ଏଭଳି ଅନୁମତି ପ୍ରଦାନ କରାଯାଇଛି ବୋଲି ଦିଲ୍ଲୀ ପୁଲିସର ଜଣେ ବରିଷ୍ଠ ଅଧିକାରୀ କହିଛନ୍ତି। ଅନ୍ନା ଓ ତାଙ୍କ ସମର୍ଥକମାନେ ମହାରାଷ୍ଟ୍ର ସଦନରୁ ସିଧାସଳଖ ରାଜଘାଟ ଯିବେ। ସେଠାରେ ଜାତିର ପିତା ମହାତ୍ମାଗାନ୍ଧିଙ୍କ ସମାଧିପୀଠରେ ଶ୍ରଦ୍ଧାଞ୍ଜଳି ଜ୍ଞାପନ କରିବାପରେ ସେମାନେ ରାମଲୀଳା ଗ୍ରାଉଣ୍ଡରେ ପହଞ୍ଚିବେ ବୋଲି ଜଣାପଡିଛି।
