ନୂଆଦିଲ୍ଲୀ: ପର୍ଯ୍ୟଟକଙ୍କ ପାଇଁ ଖୁସିର ଖବର । ଦେଶର ସମସ୍ତ ଐତିହ୍ୟ ସ୍ଥଳି ମାଗଣାରେ ବୁଲିପାରିବେ ପର୍ଯ୍ୟଟକ । ଏଏସଆଇ ଅଧୀନରେ ଆସୁଥିବା ସମସ୍ତ ଐତିହ୍ୟ ସ୍ଥଳି ଆଜି ଦିନକ ପାଇଁ ଦେୟମୁକ୍ତ କରାଯାଇଛି । ବିଶ୍ୱ ଐତିହ୍ୟ ସପ୍ତାହ ପାଳନ ଦିବସ ଅବସରରେ ଆଜି ପାଇଁ ପର୍ଯ୍ୟଟକ ମାନେ ମାଗଣାରେ କୀର୍ତ୍ତିରାଜି ବୁଲି ପାରିବେ ବୋଲି କୁହାଯାଇଛି । ଅର୍ଥାତ୍ ଆଜି ପର୍ଯ୍ୟଟକ ମାନେ ଏଏସଆଇ ଅଧୀନରେ ଆସୁଥିବା ଐତିହ୍ୟ ସ୍ଥଳି ଗୁଡ଼ିକରେ ବୁଲିଲେ କୌଣସି ଅର୍ଥ ଦେବାକୁ ପଡ଼ିବ ନାହିଁ । ଏହି ବ୍ୟବସ୍ଥା ଦେଶ ଓ ରାଜ୍ୟର ସବୁ ଏଏସଆଇ ଐତିହ୍ୟ ସ୍ଥଳିରେ ଲାଗୁ କରାଯାଇଛି ।
ବିଶ୍ୱ ଐତିହ୍ୟ ସପ୍ତାହ ପ୍ରତିବର୍ଷ ନଭେମ୍ବର ୧୯ରୁ ୨୫ ତାରିଖ ଯାଏଁ ପାଳନ କରାଯାଏ । ଆଜିର ଦିନରେ ଭାରତୀୟ ପର୍ଯ୍ୟଟକ ଓ ବିଦେଶୀ ପର୍ଯ୍ୟଟକ ମାନେ ତାଜମହଲ, ଆଗ୍ରା ଦୁର୍ଗ, ଫତେହପୁର ସିକ୍ରି ଭିଳି ଅନେକ ବଡ଼ବଡ଼ ସ୍ଥାନ ମାଗଣାରେ ବୁଲିପାରିବେ । ଏନେଇ ଏଏସଆଇର ଅଧୀକ୍ଷକ ପ୍ରତ୍ନତତ୍ତ୍ୱବିତ୍ (ଆଗ୍ରା ସର୍କଲ) ରାଜ କୁମାର ପଟେଲ କହିଛନ୍ତି ।
ସେ ଆହୁରି କହିଛନ୍ତି ଯେ, ଆଜି ପାଇଁ ତାଜମହଲରେ ପ୍ରବେଶ ମାଗଣା ବ୍ୟବସ୍ଥା କରାଯାଇଛି । ହେଲେ ସ୍ମାରକୀ ଭିତରେ ବୁଲିବାକୁ ହେଲେ ପର୍ଯ୍ୟଟକଙ୍କୁ ୨ଶହ ଟଙ୍କା ଦେବାକୁ ହେବ । ବିଶ୍ୱ ଐତିହ୍ୟ ସପ୍ତାହରେ ସାଧାରଣ ସାଂସ୍କୃତିକ କାର୍ଯ୍ୟକଳାପ ଏବଂ ସ୍ମାରକପତ୍ରରେ ସଚେତନତା କାର୍ଯ୍ୟକ୍ରମ ଆୟୋଜିତ ହେବ।
Comments are closed.