ଲକ୍ଷ୍ନୌ: ଉତ୍ତରପ୍ରଦେଶର ଭଦୋହୀ ଜିଲାରେ ରବିବାର ଏକ ଛାତିଥରା ଘଟଣା ସାମ୍ନାକୁ ଆସିଛି। ଜଣେ ମା’ ତା’ର ୫ ସନ୍ତାନଙ୍କୁ ଧରି ଗଙ୍ଗା ନଦୀକୁ ଡେଇଁ ପଡ଼ିଛି। ଘଟଣା ପରେ ମହିଳା ଜଣକ ପହଁରି ପହଁରି କୂଳକୁ ଚାଲିଆସିଥିବାବେଳେ ୫ଟି ଯାକ ପିଲା ପାଣିରେ ବୁଡ଼ିଯାଇଛନ୍ତି। ଖବରପାଇ ପୁଲିସ ଏବଂ ଅଗ୍ନିଶମ କର୍ମଚାରୀ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି।
ମହିଳା ଜଣକ ଭଦୋହୀ ଜିଲାର ଗୋପୀଗଞ୍ଜ ଥାନା ଅନ୍ତର୍ଗତ ଜହାଙ୍ଗୀରବାଦ ଗାଁର ମୃଦୁଳ ଯାଦବଙ୍କ ପତ୍ନୀ ମଞ୍ଜୁ ଯାଦବ। ଶନିବାର ବିଳମ୍ବିତ ରାତିରେ ସେ ତାଙ୍କ ୫ ପିଲା ଶିବ ଶଙ୍କର(୬), କେଶବ ଯାଦବ(୩), ଆରତୀ(୧୧), ସରସ୍ବତୀ(୭) ଏବଂ ମାତେଶ୍ବରୀ(୫)ଙ୍କୁ ଧରି ଘରୁ ପଳାଇ ଆସିଥିଲେ। ରବିବାର ଭୋର ସମୟରେ ମଞ୍ଜୁ ଗଙ୍ଗା ଘାଟରେ ପିଲାମାନଙ୍କୁ ଧରି ନଦୀକୁ ଡେଇଁ ଆତ୍ମହତ୍ୟା ଉଦ୍ୟମ କରିଥିଲେ। କିନ୍ତୁ ଡେଇଁପଡ଼ିବା ପରେ ସେ ନିଜେ ପହଁରି କୂଳକୁ ପଳାଇ ଆସିଥିଲେ। ଘଟଣା ପରେ ସେ ନଦୀ ଘାଟରେ ବସିଥିଲେ। ସ୍ଥାନୀୟ ଗ୍ରାମବାସୀ ଯେତେବେଳେ ତାଙ୍କୁ ଘାଟରେ ବସିଥିବା ଦେଖି ପଚାରିଥିଲେ, ସେତେବେଳେ ମଞ୍ଜୁ ଘଟଣା ବିଷୟରେ କହିଥିଲେ। ସେ ନିଜେ ପିଲାମାନଙ୍କୁ ପାଣିରେ ବୁଡ଼ାଇ ଦେଇଥିବା ମହିଳା ଜଣକ କହିଥିଲେ। ପିଲାମାନଙ୍କ ମଧ୍ୟରେ ୩ କନ୍ୟା ସନ୍ତାନ ଥିବାବେଳେ ୨ ଶିଶୁପୁତ୍ର ଥିଲେ। ଏହା ପରେ ଗ୍ରାମବାସୀ ପୁଲିସକୁ ଖବର ଦେଇଥିଲେ। ଅଗ୍ନିଶମ କର୍ମଚାରୀଙ୍କ ସହାୟତାରେ ନଦୀରେ ଉଦ୍ଧାର କାର୍ଯ୍ୟ ଜାରି ରହିଛି। ପିଲାମାନଙ୍କ ବାପା ଶନିବାର ଝାଡ଼ଖଣ୍ଡସ୍ଥିତ ତାଙ୍କ ସମ୍ପର୍କୀୟଙ୍କ ଘରକୁ ଯାଇଥିବାବେଳେ ଏ ସମ୍ପର୍କରେ ଖବର ପାଇ ଘଟଣାସ୍ଥଳରେ ପହଞ୍ଚିଛନ୍ତି। ସ୍ବାମୀଙ୍କ ସହିତ ଝଗଡ଼ା ହେବାରୁ ମହିଳା ଜଣ ଏପରି ପଦକ୍ଷେପ ନେଇଥିବା କହିଛନ୍ତି।
