ନୂଆଦିଲ୍ଲୀ: ପ୍ରାୟ ୧୪ବର୍ଷ ଧରି କୋମାରେ ରହିଥିବା ଜଣେ ମହିଳା ଏକ ଶିଶୁପୁତ୍ରକୁ ଜନ୍ମ ଦେଇଛନ୍ତି । ଏହି ଘଟଣା ମହିଳାଙ୍କ ସମ୍ପର୍କୀୟ ଏବଂ ହସ୍ପିଟାଲର କର୍ତ୍ତୃପକ୍ଷ ଚକିତ କରିଛି । ଏଠାରେ ପ୍ରଶ୍ନ ଉଠିଛି ଯେ, ମହିଳାଙ୍କ ଏଭଳି ପରିସ୍ଥିତିରେ ଅନ୍ୟସହ ସମ୍ପର୍କ ସ୍ଥାପନ କରିବାକୁ ସେ କିଭଳି ସହମତି ଦେଲେ । ଉକ୍ତ ମହିଳାଙ୍କ ସହ ଯୌନ ଶୋଷଣ ହୋଇଥିବା ଆଶଙ୍କା କରି ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି ।
ସୂଚନାଅନୁଯାୟୀ, ଏହି ଘଟଣାଟି ଆମେରିକାର ଏରିଜୋନାରେ ଥିବା ଏକ ଘରୋଇ ହସ୍ପିଟାଲରେ ଘଟିଛି । ୧୪ ବର୍ଷ ପୂର୍ବରୁ ପାଣିରେ ବୁଡିଯିବା କାରଣରୁ ମହିଳା ଜଣଙ୍କ କୋମାକୁ ଚାଲିଯାଇଥିଲେ । ଗତ ଡିସେମ୍ବର ୨୯ ତାରିଖରେ ଉକ୍ତ ମହିଳା ଏକ ଶିଶୁପୁତ୍ରଟିକୁ ଜନ୍ମ ଦେଇଛନ୍ତି । ବର୍ତ୍ତମାନ ଉଭୟ ମା ଓ ଶିଶୁ ସୁସ୍ଥ ଥିବା ଜଣାପଡିଛି। ହେଲେ ମହିଳା ଜଣଙ୍କ ଶିଶୁଟିକୁ ଜନ୍ମ ଦେବା ପୂର୍ବରୁ ତାଙ୍କ ସମ୍ପର୍କୀୟ ଏପରିକି ହସ୍ପିଟାଲର କର୍ତ୍ତୃପକ୍ଷଙ୍କୁ ମଧ୍ୟ ଏହା ଜଣା ନଥିଲା ଯେ, ସେ ଗର୍ଭାବତୀ ଅଛନ୍ତି । ବର୍ତ୍ତମାନ ଶିଶୁଟି ପିତା କିଏ ଜାଣିବାକୁ ପୁଲିସ ତଦନ୍ତ ଚଳାଇଛି ।
ମହିଳା ଜଣଙ୍କ କୋମାରେ ରହିଥିବାରୁ ଦେଖାଶୁଣା ପାଇଁ ଅନବରତ ତାଙ୍କ ରୁମକୁ ଅନେକ ଲୋକେ ଯିବାଆସିବା କରନ୍ତି । କିନ୍ତୁ ଏହି ଘଟଣା ସାମ୍ନାକୁ ଆସିଲା ପରେ ତାଙ୍କ ରୁମକୁ ଯିବାଆସିବା ନିୟମ କଡାକଡି କରାଯାଇଛି । ଏହି ବିଷୟରେ ହସ୍ପିଟାଲ କର୍ତ୍ତୃପକ୍ଷ କୌଣସି ବୟାନ ଦେବାକୁ ମନା କରିଦେଇଛନ୍ତି ।
