ଡେସ୍କ: କେନ୍ଦ୍ର ସରକାର ଗୁରୁବାର ସଂସଦରେ ଭାରତୀୟ ଅର୍ଥନୀତି ଉପରେ ଏକ ଶ୍ୱେତପତ୍ର ଉପସ୍ଥାପନ କରିଛନ୍ତି। ସଠିକ ନୀତି, ସଠିକ ଉଦ୍ଦେଶ୍ୟ ଏବଂ ସଠିକ୍ ନିଷ୍ପତ୍ତି ଦ୍ୱାରା ସଠିକ ଅର୍ଥନୈତିକ ପରିଚାଳନା ଏବଂ ଶାସନ ମାଧ୍ୟମରେ ୨୦୧୪ ପୂର୍ବରୁ ପ୍ରତ୍ୟେକ ଆହ୍ୱାନକୁ ଅତିକ୍ରମ କରାଯାଇଥିଲା। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ସଂସଦର ଉଭୟ ଗୃହରେ ଉପସ୍ଥାପିତ କରିଥିବା ଶ୍ୱେତପତ୍ରରେ କୁହାଯାଇଛି ଯେ ଏହା ଦେଶକୁ ନିରନ୍ତର ଉଚ୍ଚ ଅଭିବୃଦ୍ଧି ପଥରେ ଅଗ୍ରସର କରୁଛି। ଶ୍ୱେତପତ୍ରରେ କୁହାଯାଇଛି ଯେ ୨୦୧୪ରେ ନରେନ୍ଦ୍ର ମୋଦୀ ସରକାର କ୍ଷମତାକୁ ଆସିବା ବେଳକୁ ଅର୍ଥନୀତି ସଂକଟାପନ୍ନ ଅବସ୍ଥାରେ ଥିଲା ଏବଂ ଆର୍ଥିକ ସ୍ଥିତି ଖରାପ ଥିଲା। ଅର୍ଥନୈତିକ ଅବ୍ୟବସ୍ଥା ଓ ଆର୍ଥିକ ଶୃଙ୍ଖଳାହୀନତା ତଥା ବ୍ୟାପକ ଦୁର୍ନୀତି ଏହି ସଙ୍କଟ ସୃଷ୍ଟି କରିଛି।
ଅର୍ଥନୀତି ଏବେ ସ୍ଥିର ହୋଇଛି ଏବଂ ପୁନରୁଦ୍ଧାର ଓ ବିକାଶ ପଥରେ ଚାଲିଛି। ବିଗତ ୧୦ ବର୍ଷ ମଧ୍ୟରେ ସରକାର ପୂର୍ବ ସରକାର ଦେଇଥିବା ଆହ୍ୱାନକୁ ସଫଳତାର ସହ ଅତିକ୍ରମ କରିଛନ୍ତି।
ଶ୍ୱେତପତ୍ରରେ କୁହାଯାଇଛି ଯେ, ୟୁପିଏ ସରକାରଙ୍କ ଖରାପ ନୀତି ଯୋଜନା ଏବଂ କାର୍ଯ୍ୟକାରିତା ଯୋଗୁଁ ଅନେକ ସାମାଜିକ କ୍ଷେତ୍ର ଯୋଜନା ପାଇଁ ବିପୁଳ ପରିମାଣର ଅର୍ଥ ଖର୍ଚ୍ଚ ହୋଇପାରିନାହିଁ। ୟୁପିଏ ସରକାରରେ ପ୍ରତିରକ୍ଷା କ୍ଷେତ୍ରରେ ଭ୍ରଷ୍ଟାଚାର ଓ ଦୁର୍ନୀତି ଯୋଗୁଁ ନିଷ୍ପତ୍ତି ନେବାରେ ଅସମର୍ଥ ହେବାରୁ ପ୍ରତିରକ୍ଷା ପ୍ରସ୍ତୁତି ବାଧାପ୍ରାପ୍ତ ହୋଇଥିଲା। ଆର୍ଟିଲାରୀ ଓ ଆଣ୍ଟି ଏୟାରକ୍ରାଫ୍ଟ ବନ୍ଧୁକ, ଲଢୁଆ ବିମାନ, ବୁଡ଼ାଜାହାଜ ଏବଂ ରାତ୍ରି ଯୁଦ୍ଧ ଉପକରଣ କିଣିବାରେ ସରକାର ବିଳମ୍ବ କରିଥିଲେ।
ରାଜନୈତିକ ଓ ନୀତିଗତ ସ୍ଥିରତା ସହ ନରେନ୍ଦ୍ର ମୋଦୀ ସରକାର ଅର୍ଥନୈତିକ ଉନ୍ନତି ପାଇଁ କଠୋର ନିଷ୍ପତ୍ତି ନେଇଛନ୍ତି ବୋଲି ଶ୍ୱେତପତ୍ରରେ କୁହାଯାଇଛି। ଆଗାମୀ ଦଶନ୍ଧିର ଅର୍ଥନୈତିକ ପ୍ରଦର୍ଶନକୁ ତ୍ୱରାନ୍ୱିତ କରିବା ପାଇଁ କେନ୍ଦ୍ର ସାହସିକ ସଂସ୍କାର ଆଣିଛି। ସରକାର ସୁଦୃଢ଼ ଭିତ୍ତିଭୂମି ନିର୍ମାଣ ସହ ଅର୍ଥନୀତିରେ ଉନ୍ନତି ଆଣିଛନ୍ତି। ଦେଶ ଏବେ ଶ୍ରେଷ୍ଠ ପାଞ୍ଚଟି ଅର୍ଥନୀତି ମଧ୍ୟରେ ସ୍ଥାନ ପାଇଛି। ଦେଶରେ ରେକର୍ଡ ୬୨୦ ବିଲିୟନ ଡଲାରରୁ ଅଧିକ ବୈଦେଶିକ ମୁଦ୍ରା ଭଣ୍ଡାର ରହିଛି।
ଏହି ଶ୍ୱେତପତ୍ରର ଉଦ୍ଦେଶ୍ୟ ହେଉଛି ସଂସଦର ସଦସ୍ୟ ଏବଂ ଦେଶର ଜନସାଧାରଣଙ୍କୁ ଶାସନର ପ୍ରକୃତି ଏବଂ ବ୍ୟାପକତା ଓ ଅର୍ଥନୈତିକ ଏବଂ ବିତ୍ତୀୟ ସଙ୍କଟ ବିଷୟରେ ସଚେତନ କରାଇବା। ବର୍ତ୍ତମାନର ସରକାର ଅର୍ଥନୀତିକୁ ପୁନରୁଦ୍ଧାର କରିବା ଏବଂ ସଶକ୍ତ କରିବା ଓ ବର୍ତ୍ତମାନର ଏବଂ ଅମୃତ କାଳର ଲୋକଙ୍କ ବିକାଶ ଆକାଂକ୍ଷା ପୂରଣ କରିବାରେ ସକ୍ଷମ କରିବା ପାଇଁ ଦୃଢ଼ ନୀତି ଏବଂ ପଦକ୍ଷେପ ଗ୍ରହଣ କରିଛନ୍ତି।
Comments are closed.