ସମାଜ ଡିଜିଟାଲ ଡେସ୍କ: ଶୀତତାପ ନିୟନ୍ତ୍ରିତ ଯନ୍ତ୍ର ବା ଏସି (ଏୟାର କଣ୍ଡିସନର) କଥା ଉଠିଲେ ତା’ ସହିତ ଟନ୍ ଶବ୍ଦଟି ନିଶ୍ଚୟ ବ୍ୟବହାର କରାଯାଇଥାଏ। ସାଧାରଣତଃ ଘରେ ୧, ୧.୫ ଅଥବା ୨ ଟନ୍ର ଏସି ଲଗାଯାଇଥାଏ। କିନ୍ତୁ ଏସିରେ ଏହି ଟନ୍ର ଅର୍ଥ କ’ଣ ? ଏହି ପ୍ରଶ୍ନର ଉତ୍ତର ବହୁତ କମ୍ ଲୋକ ଜାଣିଥିବେ। ଅନେକ ଲୋକ ଭାବନ୍ତି ଯେ, ଟନ୍ ଦ୍ୱାରା ଏସିରେ ରହିଥିବା ଗ୍ୟାସକୁ ମପାଯାଇଥାଏ। କିନ୍ତୁ ଏହା ଭୁଲ। ଏସିରେ ଟନ୍ର ଅର୍ଥ ହେଉଛି ଏହା ଦ୍ୱାରା ଗୋଟିଏ କୋଠରୀରୁ ବାହାର କରାଯାଉଥିବା ଗରମ ହାୱା। କୌଣସି ଏସି ଗୋଟିଏ କୋଠରୀରୁ ଏକ ଘଣ୍ଟାରେ କେତେ ଗରମ ହାୱା ବାହାର କରିପାରୁଛି ତାହା ଟନ୍ରୁ ଜଣାପଡ଼ିଥାଏ।
୧ ଟନ୍ର ମୂଲ୍ୟ ହେଉଛି ୧୨୦୦୦ ବିଟିୟୁ। ବିଟିୟୁ ଅର୍ଥ ବ୍ରିଟିଶ ଥର୍ମାଲ ୟୁନିଟ୍। ଗୋଟିଏ ଏସିର ଥଣ୍ଡା କରିବାର କ୍ଷମତାକୁ ମାପିବାର ମାନକ ହେଉଛି ବିଟିୟୁ। ୧ ଟନ୍ ଏସି ୧୨୦୦୦ ବିଟିୟୁର ହୋଇଥାଏ। ସେହିପରି ୧.୫ ଟନ୍ ଏସି ୧୮୦୦୦ ବିଟିୟୁ ଏବଂ ୨ ଟନ୍ ଏସି ୨୪୦୦୦ ବିଟିୟୁର ହୋଇଥାଏ। ଯଦି କୋଠରୀ ଛୋଟ ହୋଇଥାଏ, ତେବେ ୧ ଟନ ଏସି ଯଥେଷ୍ଟ। ଇଣ୍ଟରନେଟ୍ରୁ ମିଳିଥିବା ତଥ୍ୟ ଅନୁସାରେ, ୧୫୦ ବର୍ଗ ଫୁଟ କୋଠରୀ ପାଇଁ ୧ ଟନ୍ ଏସି ଠିକ୍ ଭାବେ କାମ କରିଥାଏ। ୨୦୦ ବର୍ଗ ଫୁଟ ଏସି ପାଇଁ ୧.୫ ଟନ ଏସି ଠିକ୍ ରହିଥାଏ।
ଅନ୍ୟପଟେ ଏସି ଯେତେ ଅଧିକ ଟନ୍ର ହେବ ଘର ସେତେ ଅଧିକ ଥଣ୍ଡା ରହିବ। ତେବେ କୋଠରୀର ଆକାର, ଇନସୁଲେଶନ, ଛାତର ଉଚ୍ଚତା ଏବଂ ଝରକାର ଆକାର ଆଦି ଏସିର ଥଣ୍ଡା କରିବାର କ୍ଷମତାକୁ ପ୍ରଭାବିତ କରିଥାଏ।
