ଆଠଗଡ : ଆଠଗଡ ସହର ନିକଟବର୍ତ୍ତୀ ରାଧାଗୋବିନ୍ଦପୁର ଗ୍ରାମ ଓ ଆଖପାଖ ଅଞ୍ଚଳରେ ଗତ ୬ଦିନ ହେବ ପାନୀୟଜଳ ଯୋଗାଣ ବ୍ୟାହତ ହୋଇଥିଲା । ସେ ଅଞ୍ଚଳକୁ ପାନୀୟଜଳ ଯୋଗାଣ ହେଉଥିବା ଷ୍ଟାଡିୟମ ନିକଟ ପମ୍ପ ହାଉସରେ ଦୁଇଟି ପାଣି ମଟର ଅଚଳ ହୋଇପଡିବାରୁ ଏପରି ସଙ୍କଟ ସୃଷ୍ଟି ହୋଇଥିଲା । ଏ ସମ୍ପର୍କରେ ଗ୍ରାମ୍ୟ ପାନୀୟଜଳ ଯୋଗାଣ ବିଭାଗକୁ ସ୍ଥାନୀୟ ଅଞ୍ଚଳବାସୀ ବାରମ୍ବାର ଅଭିଯୋଗ କଲା ପରେ ମଧ୍ୟ କୌଣସି ସୁଫଳ ମିଳିନଥିଲା । ଫଳତଃ ବର୍ଷା ଋତୁ ସତ୍ତ୍ୱେ ରାଧାଗୋବିନ୍ଦପୁର ଓ ଆଖପାଖ ଅଞ୍ଚଳର ୨ ହଜାର ଲୋକ ଗତ ୬ ଦିନ ହେଲା ଜଳ ସଙ୍କଟ ଯୋଗୁଁ ହନ୍ତସନ୍ତ ହେଉଛନ୍ତି ।
ଏହି ପାନୀୟଜଳ ସଙ୍କଟ ମନୁଷ୍ୟକୃତ ବୋଲି ଦର୍ଶାଇ ସ୍ଥାନୀୟ ଅଞ୍ଚଳର ଉତ୍ୟକ୍ତ ଲୋକ ସହର ଉପକଣ୍ଠସ୍ଥ ମୁଣ୍ଡଳି ରାସ୍ତାର ରାଧାଗୋବିନ୍ଦପୁର ହନୁମାନ ମନ୍ଦିର ନିକଟରେ ସକାଳ ୯ ଟାରେ ରାସ୍ତାରୋକ କରିଥିଲେ । ଫଳରେ ଉକ୍ତ ରାସ୍ତାରେ ଗାଡିମଟର ଚଳାଚଳ ବାଧାପ୍ରାପ୍ତ ହେବା ସହ ବହୁ ଗାଡି ଉଭୟ ପାର୍ଶ୍ବରେ ଅଟକି ରହିଥିଲା । ଖବର ପାଇ ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ମଧ୍ୟ ଜଳ ଯୋଗାଣ ନହେଲେ ସେଠାରୁ ହଟିବେନି ବୋଲି କହିଥିଲେ । ଗ୍ରାମ୍ୟ ପାନୀୟଜଳ ଯୋଗାଣ ବିଭାଗ ସହକାରୀ ଯନ୍ତ୍ରୀ ସୁବୋଧ ମଣ୍ଡଳ ଓ ଅନ୍ୟ କର୍ମଚାରୀ ସେଠାରେ ପହଞ୍ଚି ଦୁଇ ଘଣ୍ଟା ମଧ୍ୟରେ ପାଣି ପମ୍ପ ସଜାଡି ଜଳ ଯୋଗାଣ କରାଯିବ ବୋଲି ପ୍ରତିଶ୍ରୁତି ଦେବା ପରେ ରାସ୍ତାରୋକ ପ୍ରତ୍ୟାହୃତ ହୋଇଥିଲା । ତେବେ ବିଭାଗ ପକ୍ଷରୁ ପାଣି ପମ୍ପ ମରାମତି କରି ସନ୍ଧ୍ୟା ସୁଦ୍ଧା ରାଧାଗୋବିନ୍ଦପୁର ଅଞ୍ଚଳକୁ ପାନୀୟଜଳ ଯୋଗାଣ ସ୍ଵାଭାବିକ କରାଯାଇଛି ବୋଲି ଜଣାପଡିଛି ।
Comments are closed.