ବେଜିଂ: ଚୀନରେ ପୁଣି ଲେଉଟୁଛି କରୋନା । ସୁସ୍ଥ ହୋଇ ଡ଼ାକ୍ତରଖାନରୁ ଫେରିଥିବା କିଛି ଲୋକଙ୍କ ଦେହରେ ପୁଣି କରୋନା ଲକ୍ଷଣ ସୂଚନା ମିଳିବା ପରେ କରାଯାଇଥିବା ପରୀକ୍ଷାରେ ସେମାନେ ପୁଣି କୋବିଦ-୧୯ ଭୂତାଣୁ ସଂକ୍ରମିତ ହୋଇଥିବା ଜଣାପଡ଼ିଛି । ସେନ୍ଜହେନ୍ ଥାର୍ଡ଼ ପିପୁଲ ହସ୍ପିଟାଲ ପକ୍ଷରୁ ପ୍ରକାଶିତ ରିପୋର୍ଟକୁ ଆଧାର କରି ହିନ୍ଦୁସ୍ତାନ ଟାଇମସ ଏ ସମ୍ପର୍କରେ ସୂଚନା ଦେଇଛି । ରିପୋର୍ଟ ଅନୁସାରେ ଏହି ଡ଼ାକ୍ତରଖାନାରୁ କରୋନାମୁକ୍ତ ହୋଇ ବାହାରିଥିବା ୧୭୨ ରୋଗୀଙ୍କ ମଧ୍ୟରୁ ୧୪.୫% ରୋଗୀଙ୍କଠାରେ ପୁନର୍ବାର କରୋନା ଲକ୍ଷଣ ପ୍ରଦର୍ଶିତ ହୋଇଛି ।
ଅନ୍ୟପକ୍ଷରେ ରବିବାର ଚୀନରେ ମୋଟ ୯୯ ଜଣ କରୋନାରେ ଆକ୍ରାନ୍ତ ହୋଇଛନ୍ତି। ଏମାନେ ସମସ୍ତେ ଏବେ ଚିକିତ୍ସାଧୀନ ରହିଛନ୍ତି ବୋଲି ଚୀନ ଜାତୀୟ ସ୍ୱାସ୍ଥ୍ୟ କମିଶନ ଏହି ସୂଚନା ଦେଇଛି । ୯୯ ଆକ୍ରାନ୍ତଙ୍କ ମଧ୍ୟରୁ ୯୭ ଜଣଙ୍କ ଟ୍ରାଭେଲ ହିଷ୍ଟ୍ରୀରେ ବିଦେଶ ଭ୍ରମଣ ରହିଛି ଓ ଅନ୍ୟ ଦୁଇଜଣ ଚୀନ ହେଇଲୋଙ୍ଗଜିଆଙ୍ଗ ବାସୀ ବୋଲି ଚାଇନାର ଇଏଫଇ ନ୍ୟୁଜ ପ୍ରକାଶ କରିଛି । ମାର୍ଚ୍ଚ ୨୮ ରେ ଦେଶରେ ବିଦେଶୀ ନାଗରିକଙ୍କ ପ୍ରବେଶ ଉପରେ ଏକ ସାମୟିକ ପ୍ରତିବନ୍ଧକ ଲଗାଇଛି ଚୀନ । ହେଲେ ବିଦେଶରେ ଥିବା ଅନେକ ଚୀନ ନାଗରିକ ଏବେ ଦେଶକୁ ଫେରୁଛନ୍ତି। ଯାହାକି ସରକାରଙ୍କ ପାଇଁ ମୁଣ୍ଡବ୍ୟଥା ପାଲଟିଛି।
