କେରଳ ଥୋଝୁପୁଡ୍ଡୁ ବାସିନ୍ଦା ପୁନ୍ନୁସ ଜ୍ୟାକବ୍ ଜଣେ ଅବସରପ୍ରାପ୍ତ ବ୍ୟକ୍ତି। ବୟସ ତାଙ୍କୁ ୬୩। ଘରେ ବସିବସି ତାଙ୍କୁ ବିରକ୍ତ ଲାଗିଲା। ଦିନେ ଘରପାଖ ବଜାରରୁ ମଞ୍ଜି କିଣି ଛାତ ଉପରେ ବଗିଚା ଆରମ୍ଭ କଲେ। ଧୀରେଧୀରେ ଏହି ସଉକ୍ ନିଶାରେ ପରିଣତ ହେବ ବୋଲି ସେ ଜାଣିନଥିଲେ। ୩,୫୦୦ ବର୍ଗ ଫୁଟ୍ ଛାତ ଉପରେ ଏବେ ସେ ଚାଷ କରୁଛନ୍ତି।
ପ୍ରତିଦିନ ୨୦-୨୫ କିଲୋ ପରିବା ଉତ୍ପାଦନ ହେଉଛି। ଋତୁ ଅନୁସାରେ ଫଳ ଚାଷ ମଧ୍ୟ କରୁଥିବା ଜ୍ୟାକବ୍ କହିଛନ୍ତି। ଦୈନିକ ଏତେ ପରିମାଣର ପରିବା ଫଳୁଥିବାରୁ ସେ ପାଖ ସୁପରମାର୍କେଟ୍ରେ ଯୋଗାଯୋଗ କରି ବିକ୍ରି କରୁଛନ୍ତି। ଜ୍ୟାକବ୍ ତାଙ୍କ ପରିବା ବ୍ୟବସାୟକୁ ‘ମଙ୍ଗଳମ୍ ଫୁଡସ୍’ ନାମ ଦେଇଛନ୍ତି। ସକାଳ ୬ଟାରୁ ସନ୍ଧ୍ୟା ୪ଟା ପର୍ଯ୍ୟନ୍ତ ସେ ଏହି ଛାତ ଉପର ବଗିଚାରେ ପହରା ଦେଇଥାନ୍ତି। ପନିପରିବାରେ କୀଟାନାଶକ ଭାବେ ସେ ଲଙ୍କା ଗୁଣ୍ଡ ପାଣି ବ୍ୟବହାର କରୁଥିବା କହିଛନ୍ତି। ଘରେ ବସିବା ପରିବର୍ତ୍ତେ ଅବସର ପରେ ଏମିତି କାମ କରି ସମୟ ଅତିବାହିତ କରିବାକୁ ଜ୍ୟାକବ୍ ଅନ୍ୟମାନଙ୍କୁ ପରାମର୍ଶ ଦେଇଛନ୍ତି।
